“Ka pa hian vawi khat mah min fak ka la hre lo a, ka thil tih reng reng hi a ngaihsan awm pawh ka la hre lo,” tia mittui parawl kiang chunga min hrilhtu rawlthar kha ka va khawngaih em! %%%%%%%%% FAKTU THINLUNG CHANGKANG Tun hnai khan Mission Veng Kohhranin Mizoram pum huap khawmpui lian kan thleng a. Thlarau lam malsawmna dawn tuma kan inbuatsaih nasat tluk zetin ‘khawmpui thlen that’ tumin kan inbuatsaih nasa a. Khawmpui kan dawng zing si a, a hah fal rei tawhte chuan khawmpui chu ‘ninawm’ te pawh an ti hial ta ve ang! Mizorama thalai hruaitu rual, a fing chin kal khawm an ni bawk a, khawmpui lai atangin a thlengtu hah tawh takte tihahdam tawk velin min han fak tan a, khawmpui tiak hnuah pawh facebook lamahte thinlung tilawmtu ‘fakna’ kan han dawng zui ta zel a le! Hah a dam huai huai mai! Inbuatsaih vanglaia a hah zual, nikum lam atanga inkhawmpui vawi tam tak thlenga la buai char char, inkhawmpui kham thawkhat takte pawh kha chung fakna rimawi chuan a ti-tha-tho thar leh a, “Hei aia khawmpui lian pawh kan thleng zo ang,” te an ti rilru ta hial a nih awm kha! Kan cho loh thin kha kan cho ru deuh tlat tawh! Chhan dang a awm lo, faktu fakna khan min tiphur a, cho loh pui kan cho lek lek mai dawn reng asin! Fakna tur hmu duh thalai an tam khan min tilawm leh zual! Tun hma deuh khan, “Mizo thalai zingah phunchiar, sawisel tur zawng reng, lawmna tur hre lo, lungawina tur hmu duh lo kan tam,” tiin rilru hrisel zawk kan neih theih nan mahni phak tawkin ka lo tlangau ve thin a. Tunah chuan ka ngaihdan ka sawh sawn ta e. Khawmpui palaite khan sawisel tur zawng ta se an hmu teuh ang. Fel lo a tam lutuk. Mahse chung zawng zawng haider a, a tha tawk lo lai en khum a, fakna tur lai zawng ngar ngar a, hmai chhanah leh mipui vantlang zinga fak hreh hauh lotute rilru kha a va ropui em! Thalaite rilru sukthlek hi a saptawng takin a ‘positive’ ve tawh tlat. Mi inchei dan te, mi tawng dan te, mi khawmpui thlen dante sawiselna tur kan zawn vak vak thin lai kha kan kal pel ta a ni awm e. Mi dinhmun ngaihtuah chiang miah loa a him chin atanga sawisel bawrh bawrh kan ching ta lo hi hmasawnna ropui tak a ni. Rilru hrisel lo zia, sawiselna tur hre chuang miah lo chung pawh a, ‘mah reng reng se..ka ngei zawng tak a ni hrim hrim’ la ti talh thin kha an vang tawh. Fak tur a awm reng lai pawha fak tha duh hauh lo rilru te an awm tawh lo. Fakna tur zawng hram hram a, fak tlak chu fak mai thin thalai an tam ta a ni e. Fak duhtu thinlung hi a changkang asin! Mahni awmna kohhran sawisel thin aiin fak thintu hi kohhran tan an hlu a. Mi kohhran sawisel duh hauh loa an fakawmna zawng thin mi hi an zahawm. Mahni ram hruaitute fak thin hnam chu an ropui zual thin. Mahni nu leh pa sita mi nu leh pa awt thintu chuan a awh thin ang chiah chu nei mahse a sit leh tho ang. Mahni fate fak nachang hre lo nu leh pa chuan a fate chu a lo chan ta a nih pawhin thiamthu sawi tur a nei dawn em ni?? Faktu thinlung changkang hian thil a tithei a, mi a tiphur a, a aia tha leh zuala tang turin mi a fuih thin. A pa fakna beiseia beidawng ta hial rawlthar khawngaihthlak hian a pa fakna aw ka vawi khat tal han hre hman hlauh se aw!