Zawhna 1: Kum 17 mi chauh ka la ni a, ka kut dinglam hian darthlalang ka hnek avangin ka kut zungpui hi a thahrui a dik lova, civil ah kan kal a, a tha hrui an zawm in ka hria, chuan tun thleng hian a zeng ang deuhin a awm a, ka tiche thei tho a, mahse a khawng deuhin ka hria,a function vak tawh lova, a la vung reng bawk. A hma ang khan ka kutzungpui hi ka control vak thei tawh lova, ka duh duh dan in ka ti thei tawh lo, zeng ang deuhin a awm. Ka inthiam lo em em a, mi zinga awm te hian ka inthlarung thei khawp mai; an thuina ser pawh a la awm reng. Engtin nge ka tih that leh theih ang? Ka mangang khawp mai. A ser pawh hi tih reh dan awm se, inenkawl dan te a la awm ang em le, engtin nge ka tih ang? Chhanna: Darthlalang hi hnek tura siam anih loh avangin intihpalh a awl viau tih hriat phawt a tha. A keh them hi vun chhunga a luh palh chuan tisa insiam tha leh hian a hual hnan thin a, thenfai kim a har duh viau. Engpawhchu nise, kutzungpui tihrawl engemaw ber a khawih pawi anih hmel a, a tira an khawih lai khan a thahrui/tihrawl kha an siam fuh loh chuan che tha thei lovin a awm thin a, hman mumal loh phei chuan Disuse atrophy an tih mai, hman loh rei vanga tihrawl sawng te a awm thei a ni. Chutiang avang chuan heng intihpalh thilah hi chuan physiotherapy a ngai thin reng ani. I intihpalh atanga hun a liam tam tawh anih chuan a buaithlak duh deuh dawn a, siam that leh pawh a huphurhawm mai thei. A vung a la reh lo anih chuan him dam fel lo a la awm tihna ani bawk a, darthlalang them a la awm te pawh ani thei bawk. A enkawl that theih leh theih loh hre tur chuan ruh doctor (Orthopedic Surgeon) entir a ngai anga, zai leh chi anih leh nih loh pawh anmahni thutlukna siam tur ani ang. Ser lam erawh Scar Revision an tih hmangin zaiin a siam mawi theih a, General Surgeon entir la an pui thei ngei ang che.