Zawhna: Pasal nei lai fa 3 nei tawh, kum 30 mi ka ni a, ka serh hi a ro tlat mai a, ka entir nasa tawh a, cancer test leh ultrasound te pawh ka ti tawh a, ka tha vek si a. Mahse sex hman hi ka la thei tlat lo mai a, ka pasal lakah pawh ka inthlahrung thei em em a, thla khat chuang a ni ta. Khawngaihin min lo tanpui thei em? Ka ei turte min lo hrilh hram teh, khawngaihin. Chhanna:    Hmeichhe serh ro/hul hi a chhan ni thei a awm nual chungin a chhan hriat kher loh pawh tam tak an awm a. Thi hul hnu hi chuan hormones a lo tlem tawh avangin a awm tura ngaih a ni a, tin, chhul paih tawhte hian an nei duh viau bawk. Hmeichhe serh chhung bang (vaginal wall) hian amah tinaltu tuihnang a siam ve reng a, mahse thi hul hnu te, thi neih mumal lo vang te leh, cancer radiation therapy vang te hian a hul ve fo thin. Hmeichhe hormones bik Estrogen an tih mai tlakchham vangin a awm fo thin a, chuvangin hormone test tih theih a tha hle. Hei bakah hian thyroid lam fel loh vangin (a bik takin hypothyroidism-thyroid hormones tlakchham) a awm fo bawk a, thyroid function test lo ti tel thei bawk la. Infection vang tea a awm theih vangin zun test leh swab test te pawh tih a tul mai thei bawk. Infection (hrik engemaw tak) hi hmuh chhuah theih mai si loh, mahse kai awlsam tak a awm thei a. A bikin hygiene uluk lo, serh silfai tha lovin sex an hman hian a awm duh zual. A enkawl dan chungchangah chuan a chhan hriat chhuah tum phawt a tha a, hormones ang chi te pawh hi ei mai mai chi a ni lo. Infection i nei hranpa lo a nih chuan serh tih nâl-na lubricants (hnawih chi) ang te pawh a hman theih a, VLG/Vagisil lubricants tih te pawhin damdawi dawrah an zuar. Engpawhnise, Gynecologist hnenah lo inentir phawt la a tha ber ang.