Zawhna 1: Nula kum 22 mi ka ni a, ka dar vei lamah bawk te vak lo a awm a, kum 3 lai chu ni tawh. A nat bawk si loh avangin ka ngawihpui mai mai a, a rawn chhuah dan ka rin chu kum 2008 March thlaah ka zak hnuaiah bawk ka nei a, chu chuan ka khua a tisik ser ser a. Doctor rawn kan tum lai takin a bawk chu a rawn hnai a, ka sawr hnuah a ka dam ta mai a.Chuta tang chuan ka dar vei lam hi a bawk phahin ka hria a, a hlauhawm dawn em? Chhanna: Infected sebaceous cyst an tih ang chi hi a nih duh hmel hle mai. Thlan chhuahna lai kua hi a in-block chuan arngeng ang hi a insiam a, bawlhhlawh a luh khan hrik a lut tel a, hnai a insiam tel ta thin a. Chumi chu sawr hnuah pawh a chhuah kim loh chuan pawng deuh, ruh telh ang hian a awm thei a ni. Thil hlauhawm chu ani hran lovang; mahse a thang a nih erawh chuan zai a ngaih hmel. Zawhna 2: Kum 19 ka ni mek a,ka ha hmai pahnih hi ka ka chhung lam atangin a khem a, a chhan chiah pawh ka hre lo, mahse ka rin dan chuan kum 3 kal ta khan thing kung atangin ka tla a, lungah ka sawh a, ka hmui chu lungah chuan ka sawh tlang a, ka ha hmai zawnah tak chuan, ka pu tunah chuan a nghing deuh tawh a, a thlawn ka hlau ru khawp mai. Doctor chu ka la pan miah lo thung, thlawn ta se ha thlawn theih loh ang hi a vuah theih ang em? Zirlai mai ka ni sia, ka ngaihtuah hian ka zak dawn hian ka hria, engtin nge ka tih ang, nature ang tak hi a vuah theih ang em? Vuah man a to em? Khawngaihin ka zawhna hi hun rem hmasa berah min chhansak thei la, ka lawm ngawt ang. Chhanna: Ha lam hi a thiam bik Dental doctor an awm a, anni hi rawn thei la chu a tha hle. Ha hmai hi fimkhur a ngai khawp a, ha tak tak a insiam hnua a bal leh hian a dang a to leh thei tawh lo va; chuvangin, ha lem vuah a ngaih phah thin a ni. Chuvangin, a rang lamin Dentist lo inentir la, an pui thei ngei ang che. Zawhna 2: Kum 45 ka ni a, ka thi neih hi thla hnih danah te a ni a, ka hnute a tang na vak a, mahse ka nei lo leh thin. Ka inentir hian a tha an ti bawk sia, engtin nge ni ang? Engtia tih chi nge? Chhanna: I kum a tam deuh tawh a, thi neih mumal lo pawh a awm viau a, i thi a hul hnai te pawh ani thei. Hmeichhe thi hul hun hi a in ang lo viau mai a, average a lak chuan kum 45-48 inkar angah hian a ngaih theih a, chuti chung chuan kum 40 tlin hmaa thi hul ta mai te, kum 50 pelh hnu pawha la nei te an awm nawk. Hengah hian fel lohna an nei hran chuang lo. Amaherawhchu, kan lo tarlan fo tawh angin hormones hnathawh a nih avang hian Hormone test ti thei la chu a tha hle. Chu bakah chuan chhul leh chi bawm lam fel lo i nei nge ngei lo hriat chian nan ultrasound te pawh ti thei la, chuan Pap Smear phei chu kum khatah vawi 2 emaw te ti thei la, chungah pawha fel lohna a awm hran loh chuan ngaih that lohna awm hran lovah a ngaih theih ang. Thisen (Hb) hniam nei hian thi neih mumal lo an nei duh viau bawk.