Zawhna : Pa kum 70 mi ka ni a, Pathianin aw tha tak min pe a, Amah faka zai hi nuam ka ti thin in, ka zai nasa thin hle bawk. Mahse kum 2010 vel atang khan ka aw hi a chhuak tha thei ta hauh lo mai a. A chang phei chuan tawng chhuah pawh a har hial thin. Ka hrawk lam insawiselna ka nei bawk si lova, a chhan min hrilh theih chuan ka lawm khawp ang. Tin, damdawi chawh nghal theih a nih chuan min chawh nghal la ka lawm hle bawk ang. CHHANNA : Kan aw (voice) lo insiamna hi kan hrawk dawta aw bawm "vocal cord" atangin a ni a. He kan aw bawm hi thazam nerve in fel taka a chawm ani a, an chet dan fel lo, rual lo emaw thazam lam fel lo vanga zawi te anih chuan aw a lo danglamin, chhuak tha thei lo ang te-in a awm thei a ni. Vocal cord hi chhan hrang hrang vangin a chet a buai thei a. Bawk insiam (nodule) te, hrawk chhung vung vanga che tha thei lo - pharyngitis/laryngitis vang te, hrawk zawna thal awm thyroid bawkin a nawr vang te, tin, a thazam chawmtu Recurrent Laryngeal Nerve fel lo vang te (chaw kawng cancer te, lung vung te, TB vanga chuap bul thal vungin a nawr vang tein a awm thei) leh, kum tam vanga cord zawi vang te pawhin a awm thei a ni. Kuhva leh meizial tih nasat hian a thlen fo bawk a ni. A chhan hre tur chuan hrawk chhung enchian fel a ngai phawt a. Chumi tur chuan ENT Doctor inentir a ngai phawt ang. Chaw kawng lam fel lo confirm nan endoscopy tih a ngai bawk anga, Chest X-Ray te pawh tih a ngai bawk ang. I thyroid fel lo anih chuan Surgeon entir a tul thei bawk. A chhan azirin enkawl dan tur a hriat chauh anga, a puitu atan tuilum hu hip te, tuilum chi al a hrawk thuah te, vicks vaporub ang chi hmanga hrawk zut te pawh hi a tangkai phian bawk.