Zawhna: Ka pu, hmeichhia kum 26 mi ka ni a, thla thum kalta khan pasal ka nei a. Ka pasal neih hma hi chuan ka hrisel tha pangngai viau a, ka thi neih pawh a mumal viau. Pasal ka neih hnu hian insawiselna ka nei ta neuh neuh mai a, tun hnaiah phei chuan tai na, thi neih mumal lo, khawsik ang lek lekte ka nei thin a. Ka nâk te hi a kham ut ut zel. Pasal nei hlimte ka nih avangin ka insawiselna hi ka chhungte bulah ka sawi lang ngam lo va, nachhawkna ka ei leh ngawt mai zel. Ka ziaawm thei chuang si lo va, engtin emaw min puih theih dan a awm em? Doctor han pan ngawt chu ka inthlahrung ve deuh bawk si nen, min puih theih chuan ka lawm hle ang.

Chhanna: I dinhmun chu a hriat thiamawm viau mai. Hmeichhia hi pasal han neih hlim hi chuan inthlahrunna tur hi a tam duh a, chhungkaw thara va lawi lut an nih avang hian han nawmsam loh changte pawhin sawi mai hi a inthlahrunawm duh viauin a rinawm. Pasala chhungte hmaizah vanga mahni nawmsam loh sawi ngam lote pawh hi an awm fo awm e. Chuti chung chuan tun hnai chhoah hian chhungkaw tinte hma kan sawn chho ve zel a, inhriatthiamnate pawh kan ngah ve tial tial a. Chuvang chuan inthlahrung lovin nawmsam lohna i neihte chuan sawi hreh lo thei la, an lo hrethiam phian mai thei che asin… ka’n ti hmasa ang e.
I harsatna han sawi atang hian zun kawng lam emaw hmeichhe lam infection - Urinary Tract Infection (UTI)/Reproductive Tract Infection (RTI) i nei a nih duh hmel viau mai. Nupui pasal neih hlimchhawnah hian hetiang insawiselna, a bikin phing (bladder) infection hi a common duh phian a, a hmingah pawh ‘Honeymoon Cystitis’ te an ti thin a ni. Nupa nun hman atanga infection eng emaw ber lo awm a ni thin a. Hygiene lam inthlahdahah te a awm duh zual. UTI kan tih hi chuan zun siamtu kal (kidney) atanga zunkawng (urete), phing (bladder) leh zun chhuahna dawt (Urethra) te hi a huam thei vek a. RTI-ah erawh chuan a bikin phing bakah chhul (Uterus), chibawm (Ovaries) leh chikawng (Fallopian Tubes) leh a bul hnai tisa te a kawk deuh bik.
Hmeichhia hi an zun chhuahna dawt (Urethra) hi mipa aia a tawi zawk avangin mipa aiin infection hi an nei hma duh a. Chumi infection chuan zun kawng hi zawh chho in kal (kidney) thlengin a han khawih buai thei a, phing leh kal vung te a siam a, a nasa zualah phei chuan khawsik tlunte thlenin zun thite hial pawh an nei thei a ni. UTI-ah hian tai na, nak nuam lo, khawsik, zun in leh zun zawnga serh bawr na, ek zawh a e kham lo anga inhriatna te an nei thei a. A confirm na atan chuan zun test (Urine R/E) leh Culture te, Ultrasound te kan tihtir thin. UTI enkawlna atan chuan antibiotic leh nachhawkna, zun kawng lam buai bik atan Flavoxate (Urispas tih te pawhin a awm) hi ni khatah vawi 3 kan ei tir thin. Tui in tam a pawimawh a, zun a insiam tam khan a dam hma bawk a ni. Antibiotic pek hma hian Urine Culture tih te pawh a tha viau.
RTI bik hi enkawl uluk a ngai viau a, a chhan pawh chikawng a khawih buai chuan a tiping thei a, nau neih theih lohte a thlen thei a ni. RTI zingah hian PID (Pelvic Inflammatory Disease) hi an nei fo bawk. PID-ah hi chuan investigation-ah engmah vak hmuh awm si lovin insawiselna an nei reng thei bawk. RTI enkawl danah pawh hian UTI nen a inang tlang viau a, thi neih buai a awm tel erawh chuan hmeichhe doctor inentir ngei theih a tha ber. Ultrasound tih pawh a tha tel bawk ang.
Nupa nun hman kawngah hian advice han inpe tel lawk ila. Kan tarlan tak angin hygiene a pawimawh viau mai a. Inhman hma leh zawhah insilfai ulukte a pawimawh a, tuna i nawmsam loh emaw treatment i laka i dam chian hma hi chuan i pasal hrilh tlang mai la, invenna (condom) hman hrihte pawh a tha viau mai. Mipa hian nachang kan hriat loh fo chu kan sazu hmawr hi a vun lip hnuah silfai thin a pawimawh a, a chhan chu kan baw lo chhuak chambang hi betin chu chuan hrik a kawl duh viau mai a ni.