Zawhna: Ka Pu, ka fapa kum 10 mi hi tonsil na a sawi fo mai a, doctor kan entir chuan paih mai min chawh deuh a. Mahse tonsil hi paih chuan harsatna eng eng emaw a awm duh a, an than te pawh a ti buai thei ni te hian an sawi sia, paih tir mai chi nge ni dawn le? Hei bakah hian adenoid an tih mai hi a vung tel thin an ti bawk a, hritlang hi a kum rual pui dang aiin a nei ngun bik hian ka hre deuh bawk a, engtia tih chi nge ni ber ang? Paihtir mai nge tha, a na a chhuah apianga antibiotic hmanga enkawl leh mai thin hi? Min chhan theih chuan ka lawm ngawt ang.   Chhanna: Tonsil kan tih mai hi kan dang chhung bang lehlam lehlama thal awm a ni a, Adenoid hi chu dangmawn hnung bang, hnarkua leh hrawk a inzawmna lai taka thal (lymph gland) dang a ni. Kan taksa ah hian thisen ni lo tuihnang dang “Lymph” a awm a, hei hi thisen atanga insiam tho niin thisen zam blood vessels atanga peng hrang a, kan thal lymph node ah in filter thin an ni. He lymphatic system hi kan taksa vengtu “Immune System” atan an pawimawh em em mai a, natna hrik dotu Antibodies siamtu ber an ni bawk. Kan taksa peng hrang hrang ah hian heng thal te hi an awm a, ke emaw kut/ban kan tih pem a a pun chuan hrik lo lut a tai darh tur kha heng thal hian a lo dang hmasa a, a rawn vung ta thin a, chuvang chuan zakhnuai ah te, kap zawnah te heng thal vung hi a lo lang chhuak fo ta thin ani. Chutiang chiah chuan Tonsil leh Adenoid te hi kan hrawk a hrik natna thlen thei lo filter tu ber an ni a, infection engemaw kan neih khan a lo vung ta thin a, mahse hrik kha thi kim lova a awm chuan a rawn vung chhuak fo thin a ni. Adenoids te hi chu kum a lo tam tial tial hian a te tial tial a, puitlingah phei chuan a bo titih mai thin bawk. Infection a lo awm a, a vun khan thawk te a ti harsa in a ti buai thei a, chu bakah chuan hnar chhung leh air filter kan tih mai sinus ho nen a inzawm kual avangin sinusitis kan tih te pawh hi a awm fo bawk. Tin, beng leh hnar kawchhung inzawmna eustachian tube te pawh a vung hian a khawih tel chuan beng chhette a thlen tel thei a ni. Engpawhnise, tonsil na avanga a vung leh hnai la hial thin te anih chuan paih te pawh a tha zawk thei a. Naupangah chuan kum 3 hnuai lamah an paih meuh lo va; tin, Kg 15 hnuai lam an nih chuan khawih loh a tha mah zawk. Sawi tak angin ka chhung hygiene hi tonsil na laka inven nan chuan a pawimawh khawp mai a. Zing leh zanah te an ha nawh zawhah tuilum chi al a kam leh hrawk thuah fai hi a tangkai hle. A vun lai phei chuan an thil ei zawh apiangin thuah thei se, chu chuan hrik insiam pung lakah a veng fo bawk. Antiseptic mouthwash/gargle Betadine ang te pawh hi a nawm loh lai chuan hrawk thuah nan a tangkai. Han sawi belh ngai chu naupang bikah antibiotic hi mahni thuin inchawh lo ila, kan pe a nih pawhin a ei hun chhung leh ei hunbi ah thlap thlap pe thei ila, chu chuan antibiotic resistance lakah a veng anga, tin, a thawk tha zawk bawk ang.