Zawhna: Ka pu, Phungzawl kan tih mai hi chi hrang hrang a awm emni? Kan nau pakhat, kum 21 mi lek hi nikhaw hre lova awm tawp a ching thin a, lung lam fel lohna a nei lo an ti bawk sia, phungzawl lam anih te an ring a, min hrilh chiang thei em? Engtia tih chi nge, tunge entir chi ang? Chhanna: Mizo hian phungzawl hi kan ti mai a, a hming hi kan phuah fuh lo viau mai, hming dang mawi deuh te hmang thei ila a duhawm khawp ang. Engpawhnise, Epilepsy tiin kan sawi mai a, a awlsam zawngin "fits" ti te pawhin an sawi thin. I rawn sawi ang hian chi hrang hrang a awm a, a chhan pawh a in ang vek hek lo. Phungzawl tia kan sawi ber hi thluak lam atanga fel lo engemaw vanga taksa control theih loha awm thut, kut ke leh taksa ingeuh vak vak, khur chawr chawr ang hi ani a, chu chu Grandmal Epilepsy tiin an sawi a. A chhan hriat loh a awm a, thenkhat erawh thluaka lama bawk awm vang te ani thei bawk. A dang leh ah chuan absence seizure an tih mai a awm leh a, hei pawh hi chi hrang hrangin a awm thei a, nungchang danglam thut, tawng thei lova melh ngai melh reng te, nikhaw hre lo, biak hre lo ang te pawhin an awm thei bawk a ni. A chhan hi kan sawi tak angin chi hrang hrang a awm thei a, thluak bawk engemaw ber, cancer chi te, TB vang te leh infection dang engemaw ber vang te ani thei. Accident vanga lu sawh palh vang te pawhin a hnu lamah hetiang hi a thleng thei bawk a ni. Chhan awm hran lo, psychiatric illness vang te pawhin a awm thei ve bawk. A chhan hrang hrang a awm vangin investigation tih ngai ngei ngei te chu - Electro-encephalography (EEG), MRI emaw CT Scan te an ni a. Engpawhnise, medicine lam doctor rawn a tha ber a, duhthusam ah chuan Neurologist inentir theih nise. Trinity Diagnostic Center, Zairema Building ah hian thla khatah kar khat vel chamin Dr.Judy, Neurologist a lo kal thin a, lo inentir thei ula, a puih theih ngei che u ka beisei.