Zawhna 1: Ka pu, kum 19 mi ka ni a, hnungzang na leh kawng na ka nei thin a, ka ke hi a sa vak zel bawk a, engtia enkawl chi nge ni ang? Chhanna: Mipa nge hmeichhia i nih i sawi lova, hmeichhia ah chuan thi neih fel lo, buai te hian kawngna a siam duh khawp mai a. Tin, rih (thau) lutuk hian hnungzang leh kawng na te hi a awm duh viau bawk. Engpawh chu nise, a chhan hriat hmasak phawt a tha hle. Nachhawkna ei khan rei lo te a chhawk anga, a lo chhuak leh tho dawn a. Chuvangin a nat chhan hriat tum hmasak nise, chumi atan chuan X-Ray Spine tih a tul anga, hei bakah hian pum leh tai lam fel lo a awm nge awm lo hriat nan Ultrasound ti leh thei la. Kal leh zunkawng lam fel lo te anih theih avangin Urine exam pawh a tul bawk ang. Ke sa i rawn sawi hi nerve lam fel lo vang ani thei a, chu bakah chuan Thyroid function buai vang te pawhin a awm thei bawk. Ruhseh, ruh chuktuah na te i neih tel phei chuan Arthritis lam te pawh ani thei bawk ang. A enkawl dan tur chungchang ah chuan a chhan a zir ani anga, Orthopedic Surgeon lo inentir hmasa la, a tul ang zelin an lo pui thei ang che. Zawhna 2: Ka vun thak hi November thla khan Civil Hospital-ah ka entir a, a dam duak a, mahse a lo thak tha leh a.  March thla khan ka entir leh a, an damdawi min chawhte ka hnawih zova, a ngaitein a rawn thak leh zel tho a, a dam hlen theih na min chawh thei em? Chhanna: Vun thak i tih hian thak satliah nge, vual tel nge, durh pep pep emaw phuhlip awm tel nge tih te i sawi lang lova. Vun thak tam ber chu thil huat vang (Allergic Rash) ani a. Thil hrang hrang a huat theih a, boruak vawt leh sa te, bawlhhlawh leng vak te, thawmhnaw thenkhat vang te leh, ei leh in vang te ani bawk. Damdawi huat te pawh hi a awm fo bawk a, thenkhat chu na chhawkna paracetamol hua te pawh an awm thei. Allergic rash reng reng hi chu a huat zawng laka inven loh chuan a reh mawh khawp mai a, reh hun lai te awm mahse a rawn chhuak leh thin. Thil huat zawng hriat nan hian Allergy Test an tih tir thin bawk a, chumi test in a hmuh chhuah huat zawng te laka inven/insum chuan thenkhat chu an ziaawm phah fo bawk. Chutih rualin natna dang vangin a awm thei a, Cancer te, SLE, Rheumatoid Arthritis leh ril lam that lohna te, rulhut pai vang te pawhin a awm thei bawk a. A dam hlen theih ang em tih lai erawh chiang zawka investigate a tul a rinawm.