Zawhna: Ka pu kum 19 mi ka ni a,hnungzang na leh kawng na ka nei thin a ka ke hi a sa vak zel bawk a, engtia enkawl chi nge ni ang? Chhanna: Hnungzang na, kawng na, khel na tam ber hi nunphung leh khawsak dan fel lo vang a ni tiin mi thiamte chuan an sawi thin. Chumi awmzia ber chu taksa rih lutuk (overweight) vang te, mut dan rualrem lo te, hnathawhna hmuna thutna dik lo te, lirthei chuan nasat lutuk vang te, taksa insawizawi tlem lutuk vang te, a thenah chuan taksa in a tlin phak baka nasaa taksa sawizawi emaw sports lam tih nasat vang te a ni fo thin. I kum a la naupang viau mai a, mipa nge i nih hmeichhia i insawi lova, i nat chhan tur awm ang te i han ngaihtuah pahin a enkawl dante sawi ka’n tum dawn ang e. Nat dan kan sawi hi a awlsam zawk nan “Low Back Pain (LBP)” tiin khaikhawm dawn mai ila. LBP hi na thut “Acute Pain” a nih chuan sports emaw thil rit chawi vanga inhliam vang tein a awm duh ber a. Kawngherh tia kan sawi tam ber pawh hi chutianga lo intan chu a ni chawk. Hemi na hi thla thum aia a rei chuan Chronic Back Pain (benvawn) tiin an sawi thin bawk. Kawng tih nat reng reng hi darkar 72 chhunga a reh mai loh chuan doctor inentir ngei nise a tha ber. Hnungzang/kawng ruh “Spine” hi ruh mal te te fel taka inchuktuah, an inkara a thawmna awm vek a ni a. Heng ruh karah hian kan thluak atanga thazam hlawm lian pui mai Spinal Cord lo chhuk thla chu a veng a. Heng ruh te hi an chhiat mai loh nan hnungzang tihrawl (muscle) lian leh chak pui puiin a veng khup mai a, hei bakah hian tha (ligaments)-in a la venpui teuh bawk a ni. Eng emaw position dik lo taka kan awm palh hian heng ruhte hi a chhiat mai loh nan heng tihrawl leh tha te hi a lo insang mar vak mai thin a, chung chu an tha an thlah leh mai lo thin a, chutiang avang chuan na hi a awm chhunzawm thin a ni. A enkawl nan hian heng tha leh tihrawl tawm/sang mar tizawi tur damdawi Muscle Relaxant te an chawh thin reng a ni. Spinal Cord atang hian thazam pawimawh tak Sciatic Nerve chu mawngtam zawnah hian a rawn chhuak thla a, chu chuan malpui chin hnuai lam a chawm a. He nerve hi kawngruh tih fuh loh vangin tihpalh a awm fo bawk a. Chumi avanga na chu Sciatica tia kan sawi fo hi a ni bawk. Hemi na hian mawngtam atangin ke a zawh thla fo a, ke hmawr hit chawmawlh te a thlen tel bawk thin a ni. Kan sawi tak rit chawi vanga kawngin a tawrh te, thutna chair rualrem lo vanga kawng na te hi ruh chuktuah inrem fel lo vanga awm thin a ni a. Chutiang avang chuan rit chawi pawhin khup char lova chawi tur tih te pawh advice an pe thin a, chair pawh hnungzang mil “Ergonomic Chair” te hmang turin an chawh thin bawk. Bag ah rih lutuk avang te in a awm thei bawk a, tunlai high school naupang te pawh hi an bag a rit thei viau mai a, kawngna insawisel an awm fo a ni. Eng emaw avangin ruh inkara a thawmtu Disc hi a lo tawlh chhuak thei a (Herniated Disc), chu chuan thazam a rawn nek a, na a thlen fo bawk. Hmeichhia bikah chuan chhul leh chi bawm chi kawng fel lo vang te in kawng na a awm duh viau mai bawk a. Ultrasound hmanga heng organs te hi enfel a tul thin bawk. Engpawhnise, a nat chhan ber hre tur chuan examination fel deuha neih a tul ang a. Mahni a lo inhriat theih dan pakhat ah chuan mu chung leh khup char chunga ke kan a a nat chuan Sciatica vang hi a ni thei. Doctor inentir ngei chu a tha ang. Mutna khum leh mattress rualrem tha a pawimawh a, khum dup lutuk a mut loh te, rihna tihniam zawnga hmalak, taksa sawizawi uluk te, rit chawi zawnga hnathawk tan insum deuh te, zin nasa tan chuan kawng vengtu kawnghren ang chi hman te hi a pawimawh viau bawk. A reh thei lo anih chuan X-Ray leh CT Scan te pawh tih a tul thei a, Physiotherapy an mamawh fo bawk. Ortho Doctor te lo rawn phawt mai la, a enkawl dan dik takin an lo enkawl thei ngei ang che.