Zawhna: Ka Pu, damdawi chi khat Alprazolam hi ei ka ching a, ka addict chu a ni ber tawh mai. Ka ei loh chuan mi bula awm te, mi biangbiak hrim hrim ka chak lo va; tin, ka ei loh chuan ka muhil thei miah tawh si lo. Engtingnge ka tihtawp ang? Khawngaih takin min tanpui thei em? Chhanna: Alprazolam damdawi hi ruihhlo ngai te zingah chuan AP tiin an hre lar a, hmansual hi a tam hle mai. Mi tam zawk chuan “mutna damdawi” tih angin kan hre fo thin a; mahse, mutna damdawi atana an siam ni lovin taksa tihahchawl a, rilru hah chhawkna tura an siam “Anti-Depressant Drugs” zawk a ni. Chutiang a nih avang chuan a hnathawh dan chiang zawkin tarlan tum ila, chuta tang chuan a tangkaina leh a hlauhawm theih dan te kan hre chiang thei zawkin a rinawm. Alprazolam, Diazepam, Nitrazepam, Clonazepam, Chlordiazepoxide ang chi damdawiho hi group khat niin Benzodiazepines tiin kan sawi thin. Heng damdawi te hian mihring taksa leh rilru hnathawh hi a timuang a, chu chuan vei neih run (anxiety) a chhawk bakah taksa hahdam a thlen thin a ni. Direct taka thluak lama hnathawk an ni a, thluak a chemical lo dawngsawngtu chi khat GABA receptor an tih a hna zuk thawk thin an ni. He an hnathawh lan chhuah dan deuh ber te chu - mut chhuak leh zawi, rilru hah reh nan te, kaih (epilepsy-phungzawl tiin kan hre lar) ven nan te, leh tihrawl tang mar tihziaawm nan te ani ber. Alprazolam bik hi kan ram mai ni lovin khawvel ram dangah pawh an hmang sual nasa viau mai a. A lawng ai mahin damdawi dang leh zu nen te an hman pawlh nasa khawp mai. A ngawl vei a awl khawp mai a, damdawi atana kan chawh pawh hian ni 10 aia rei bak kan chawh meuh lo. Chu mai ni lovin an ei tawp dawn pawhin thlah thut hian an ei hmaa harsatna ang kha nasa zawka a lo lan leh theih avang (rebound effect) leh a ngawlvei chhunzawm a awl em avang hian a nazawngin kan chawh lo a ni. Damdawi tam tak hian a ngawlvei theihna power (addictive property) an nei fur a. Ngawlvei chuan a damdawi mamawhna a sang tial tial a (tolerance), chu bakah ei lohin mi a thing let thin (withdrawal). Chutiang avang chuan damdawi tam ber hi chu doctor chawh (prescription) ngei loh chuan ei mai mai loh a him ber ani. Doctor te’n damdawi kan chawh chuan ni khata ei dan tur, ei hun chhung, a chak tawka ei dan (strength- eng mg zat nge tih te) te kan ziak tel thin ani. Mahni duhthu a damdawi ei kan chin thin avang hian damdawi tha tak tak hi kan hmang sual fo thin reng a ni. Alprazolam hi a ngawl i lo vei tawh tak tak a nih chuan Pyschiatrist emaw Psychologist enkawlna i mamawh ngei dawn a. Specific taka enkawlna damdawi a awm lova, psychological - counseling, behavioral therapy te hmanga enkawl i ngaih a rinawm. Chuvangin, zak lovin Psychiatrist emaw, Psychologist emaw lo pan ta la, an puih theih ngei che ka beisei. Nangmaha i nghei thut chuan rilru lam harsatna chi hrang hrang i nei thei a, a hrehawm thei viau bawk.