Zawhna: Ka pu, kum 30 mi ka ni a. Ka tum loh deuhin hmeichhia ka mutpui a, chumi hnu chuan ka sazu a thip ta tlat mai a, ka zun zawng te hian a na thin a. Ka in entir a, STD i kai anih hi an ti a, damdawi min chawh a. An mi chawh ang chen ka ei a, ka zia viau tawh hnuah a rawn na thar leh tlat mai a, sazu hmawr hi nuam lo deuh hian ka feel reng mai a. Ka en chianin engtinmah a awm bawk silova, a rawn awm leh tihna nge ni ang? Min puih theih chuan ka lawm viau ang. Chhanna: STD (Sexually transmitted disease) tia kan lo sawi thin kha tunah chuan STI (Sexually transmitted infections) tiin an thlak tawh a, a chhan ber pawh Disease (Natna) emaw insawiselna thlen kher lovin Infection hi natna hrik thenkhatin a thlen ve vang te pawh a ni. Hmeichhia ah phei chuan insawiselna nei lovin rei tak chhung a hrik an pai thei a ni. I hmeichhe kawp hi eng ang mi nge anih tih te, insawiselna a nei ve lo emni tih te i sawi lang tel lova. Engpawhnise, tunlai ah chuan inkawp mai mai hi a hlauhawm tawh avangin sex hman chuan Condom hman ngei ngei tluk a awm lo a ni. STI natna bakah HIV te pawh hi rin loh deuh deuha kai an awm nawlh nawlh tawh reng a ni. STI i kai anga an sawi a nih chuan blood test an tihtir che em tih i sawi lo va. Duhthusamah chuan VDRL test ti ngei thei la, a bakah chuan Urine Routine test leh Culture te pawh ti thei ta la, chumi azir chuan damdawi inchawh pawh a tha nge nge dawn a. I damdawi ei hi eng ber nge i rawn sawi lo va, engtia rei nge i ei tih pawh hriat a chakawm viau mai. I damdawi ei kha i lo ennawn leh theih chuan Doxycycline a tel em tih en la, a lo nih chuan STI enkawl nan hi chuan ni 10 chhung tal ei a ngai thin. VDRL test hi a positive chuan a enkawlna tha ber chu Penicillin Injection ani a, an huat erawh chuan damdawi dang kan chawh thin thung. Urine test leh culture ah hian infection a awm leh awm loh a hriat chian theih anga, hrik a lo to anih chuan eng antibiotic ber nge sensitive ang tih a hriat leh theih dawn a, chuta tang chuan damdawi hi kan chawh thin a ni. Damdawi i ei chuan a hrik a thah kim tawh pawhin i sazu-a cells thenkhat kha a tivung ve a, chumi reh fel lo avang chuan i insawiselna residual pain ang te pawh hi a awm thei a ni. Tin, viral infection engemaw tak te a lo nih phei chuan i sazu chawmtu nerve kha a ti buai ve thei a, chu chuan na ni chiah silova nuam lo feeling ang hi a siam thei bawk a ni. Chutiang anih chuan engemaw chen chu hetiang feeling hi a awm thin a, zawimuangin a reh ve leh chawk. Nachhawkna ah vung rehna damdawi Serratiopeptidase tel ang chi te lo ei ta la a ziaawm phah thei bawk. Pawimawh ta viau mai chu sex in hman vang hian HIV emaw Hepatitis B/C i kai leh kai loh hriat a tha hle mai. Duhthusam ah chuan sex i hman atanga thla thum hnuah HIV, Hepatitis B leh C te hi lo test la, i dinhmun hriat chian a pawimawh hle a ni. I hmeichhe kawp hi i nel tak anih chuan test ho hi lo ti ve vek thei bawk se. Chuan insawiselna a neih loh pawhin damdawi i lo ei tawh ang chu lo ei ve tho bawk se. A reh thei lo anih chuan doctor lo inentir nawn leh la a tha ber ang. I test result te pawh doctor entir ngei chu a tha bawk.