KAN HIM EM? Hmanni lawk khan pavalai, kum 45 mi, hmel felfai tak damlo ka lo en chu a damlohna te ka zawt a. Amah lah hi a hrisel hmel phian a, a insawi dan chuan eng damlohna vak pawh a nei hran lova, annual check-up neih ve reng reng tha a tih vangin a in check tir a, Hepatitis C a lo nei reng hi a lo nia, treatment a lak a ngai a, chumi vanga rawn inentir hi a lo nia. Hetiang case hi an awm ta fo mai a, chuvangin kan fimkhur tlan theih nan tun tumah hian Triple Test pawimawhna chungchang ka han thai lang dawn ani. Natna inkaichhawn theih zingah hian HIV, Hepatitis B leh C te hi tute emaw, nungchang tha lo nei te kai tur bika ngaihna hi a lian viau mai a. A dikna lai te chu a awm meuh mai a, drugs a inchiu thin te hi heng hrik hi lakah hian an derthawng zual bik a, Hepatitis C phei chu drugs inchiu thin 70-80% lai mai hian an nei a ni. Chutih rual chuan inchiu ngai lo, ruihhlo hrim hrim khawih ngai lo, an kai dan tur pawh hre lo, mahse heng hrik pathum zinga a engemaw ber lo kai nawlh nawlh hi an awm ta fo mai a ni. Civil Hospital lama kan Surgeon te pawh hian an damlo zai tur routine test an han tih tir hian an hmu chhuak leh nawlh thin a, an tam tawlh tawlh tih an sawi bawk. HIV hi a nawlpui chuan kan hlau in kan la tih viau a, mahse heng hrik pathum zingah rau rau chuan kaichhawn a har ber zawk a. Hepatitis B hi kai a awl ber a, a dawtah Hepatitis C, HIV chu a pathumna chauh a ni. Mahse chuti chung chuan a hrik kai kawp (Co-Infection) hi a common khawp thung. HIV+ te hian HCV an nei kawp duh khawp mai nia. A buaithlakna lai ber zawk chu heng natna pathum te hi an thawm a zawi riau mai hi ani. Hun rei tak chhung chu a natna vei te hian insawiselna nei lovin an awm thei a, chutiang avang chuan an hriat loh karah mi dang an kai darh fo bawk. An inhriat meuh chuan a lo tlai fo bawk a, enkawl a buaithlak tawh thin a ni. Chutiang avang chuan annual check-up neih fo hi a tha hle a. A bik takin heng test pathum te hi kum tinin in test tir thin ila. Kan him anih chuan a tha a, kan lo him lo palh anih pawhin enkawlna dawn thuai hian midang kai theihna chance a ti tlem bawk ani. Kan chhungkua chenpui te emaw hnaivai tak, thian kawm tam te heng hrik pathum zinga engemaw ber kai an awm phei chuan enkawlna dawng thuai tura kan hrilh a tha a. Hmanraw hriam, a bikin hmuihmul mehna, chem te hi hman fimkhur a tha a, bengverh duh leh tatoo chhut tir duh phei chuan mi hmanraw hman hnu hman loh hram nise a him ber a ni. Chutih rual chuan fimkhur uchuak vanga tih emaw râp te hi a tul kher lova, thinhrikna kan neih phah duh ani tih hriat a tha bawk.