Zawhna: Ka pu, hmeichhia kum 18 mi ka ni a, ka mal atanga ka châwn vel thleng hian bawl te reuh te te a khat vek a, mahse a bawl chu a thak chuang lo; a dum deuh zel a, a reh thei bawk si lo. Damdawi lam thiam kan rawn pawn an siam chawp bak min hnawih tir ngai bawk si lova. Pawnfen ka fen ngam loh phah a, khawngaih tak in min pui hram teh, ka beidawng tawh lutuk. - Fakpuii Zawhna: Ka pu ka hmai hi te reuh te tein a bawl nasa lutuk a, chubakah arngeng lian deuh a rawn awm a, a reh a, a awm leh a, a in chhawk reng mai a, a chang chuan lu te a tina a, hmai a timawm bawk a, a nasat ka hlauh vangin thil dang vak ka hnawih lova eng nge hmang ila tha ang? - Maeni, Chanmari. Chhanna: Heng zawhna pahnih hi vun lam harsatna anih vangin chhan kawp ka han tum ange. Vun harsatna tam ber hi engemaw thil huat vang (allergy) ani thin a. A awmna hmun azir te, a lan dan te leh a thak leh thak loh, a bul hnai vun a vung em tih te atangin a chhan hrang hrang a awm thei a ni. Limbs (kut ke, ban leh mal) a awm tam tak hi allergy chi khat "Contact Dermatitis" vang a ni thin a, tin, ni sa in a em duh lai anih vangin ni zung natna kan tih mai ang chi pawh a ni duh viau. Cream engemaw tak huat vang te pawh ani thei. Vein lam fel lo (Varicose veins) vang te pawhin a awm thei a, thisen zam lam fel lohna engemaw vang te pawhin a awm thei. Zunthlum (Diabetes) nei te hian heng harsatna hi an nei duh viau bawk a, chuvangin blood sugar test tih theih a tha hle. Hmai lam hi tleirawl kum la naupang deuh ah chuan arngeng vangin a awm duh a, arngeng awm nasa, a rei hnua dum leh ang chi "acne vulgaris" an tih ang te a ni thei a, a langsar a, nun a ti hrehawm duh viau. Hmai mawm nasa chi te'n an nei duh bik a, tin, tleirawl chhoh hun lai hi taksa inthlak danglam nasat hun lai anih vangin a awm duh zual bawk a ni. Hmai mawm leh thlan nasa chi te hi inenkawl uluk a ngai zual a, sahbawn a hmai phih nasat erawh chuan a venghimtu oil a tlem leh lutuk vangin harsatna dang a awm thei bawk. Hmai phih pawhin sahbawn ai mahin Facewash chak lo hman thin nise, zan mut dawnah astringent dal chi hmanga dim taka hruk fai thin ni bawkse, chu chuan a ti ziaawm thei. Sawi ang bawkin allergy vanga awm anih chuan chumi enkawl chu a ngai tel thei bawk ang. Vun enkawl dan chungchangah hian fimkhur a tha khawp mai a, thian leh hmelhriat te ngeih zawng hi kan ngeih vek kher lo. Tin, damdawi thenkhat, a composition hriat theih mang loh, khawchhak damdawi an tih te phei chu hman loh theih nise a duhawm hle. Steroid pawlh te hi an ching a, a tirah ngeih angin lang mahse a rei hnuah harsatna dang a siam phah fo thin. Chuvangin, tha ber chu Skin Doctor inentir a, an damdawi chawh ang te uluk taka hman nise. Kan ngeih lo anih pawhin midang pan nghal lovin kan doctor pan ngai bawk inentir leh phawt ila, a tul dan azirin mi dangte pawh min kawhhmuh mai ang.