Zawhna: Mipa kum 60 chuang tawh ka ni a, kum tam fe chhung chu ka hrawk hi a za thin a, ni khatah vawi tam tak khuha aw ka han then hian hrawk za chu rei vak lo a reh ve mai thin. ENT Doctor ka rawnten allergy an ti mai thin a, an damdawi min chawhin awmzia a nei rei thei lo. Zuk leh hmuam, meizial, ruih theih thil ka ti ngai lo. Engtia enkawl tur nge ni ang? Chhanna: Kan hrawk zawnah hian taksa peng pawimawh tak tak a awm thluah mai a, chaw kawng bakah thawk dawt (trachea) intanna te, aw bawm (vocal cord) te a awm a, chungho chu vun pan chi (mucous membrane) hian a tuam a, chumi hnuai teah chuan kan hrawk chawmtu thazam (nerve) chi hrang hrang a awm bawk a ni. Hei mai bakah hian kan hrawk bawr hi hnar leh beng bakah hmai zawna boruak vawngtu sinus te nen an inzawm kual vek bawk. Chutiang chu a nih vangin thil huat (allergy) vang ni kher lo pawh hian thil hrang hrang vangin hrawk bawr ro te, vung te a awm thei a, sinus lam fel lo te, beng lam fel lohna avangtein hrawk insawiselna hi a awm thei a ni. Allergy chu hrawk zat chhanah chuan a common pawl tak a ni a, damdawi ei fo tawh mah la allergy vang a nih si chuan i thil huat eng ber emaw ni kha i taksa nen a inhnimhnaih si chuan a chhuak leh thin dawn a, damdawi i ei laiin i ziaawm ang a, i ei loh veleh a chhuak leh thin dawn a ni. Meikhu te, boruak a leng vak bawlhhlawh engemaw ber te, ei leh in lam te, thawmhnaw engemaw ber te i haw thei a, chutiang chu hriat chhuah theih chuan a tangkai thei ang. Hemi atan hian Allergy Test te pawh an tihtir thin a ni. ENT Doctor i lo inentir tawh chuan i hrawk chhungte pawh an ensak ngei tawh chein ka ring a, hlauhthawnawm thil a awm lo chu a nih hmel phawt mai. A dang lehah chuan hrawk ro vangin a awm thei ang. Kan chil siamtu Salivary Glands fel lo vangin chil leh hrawk bawr tinaltu tuinal (mucus) a insiam tlem thin a, hrawk tihnawm leh naltu a tlem chuan a lo ro a, hrawk za a rawn siam vat zel a ni. Tin, tui tlakchham dehydration vangin chutiang chu a awm thei bawk. Tui in tam a pawimawh hle ang. Hritlang hnar ping vanga ka (mouth)-a kan thawk fo hian hrawk a ro hma bawk a, chu chuan hrawk za a thlen duh viau. Damdawi thenkhat hian hrawk ro a thlen thei a, chil siam titlem thei, a bikin anticholinergic drugs (khuh damdawi te leh allergy damdawi atana hman) te hian hrawk ro an siam fo. A dang lehah chuan hrawk vung, aw bawm vung vangin a awm thei. Zai nasat te, tawng tam lutuk te hian a awm thei a, zirtirtu hnathawk te ah hian a awm duh viau mai. Infection eng emaw ber vangin a awm thei a; mahse, antibiotic te an chawh tawh che a rinawm a, a chhan anih hmel lem loh. Beng lam fel lo, infection te, bengek hnawh te, beng leh hnar inzawmna eustachian tube block vang te in hrawk za hi a awm thei bawk. Sawi tak angin Sinus vung vanga air circulation tha thei lo (sinusitis tia kan sawi mai hi) hian hrawk za a thlen thei bawk a, beng ri hriatna te thlengin a tibuai thei a ni. Kum upa lamah chuan natna dang vangin hrawk fel lo a awm fo thei a, chung zingah chuan ruhseh benvawn te hi a chhan common ang reng tak a ni. Thyroid vung emaw thang lian hian hrawk zawna thazam a nek thei a, chutiangin bawk eng emaw ber (tumour) a awm chuan a bul hnai hrawk bawra organ dangte a nek thei bawk a, chu chuan hrawk za hi a thlen thei bawk. Pumpui lam fel lo, a bikin GERD kan tih mai, acid thur irh let leh hian chaw kawng (esophagus) hi a tivung duh a, chu chuan hrawk za a thlen thei. A chhan ber hriat chhuah theih nise a tha hle mai. Endoscopy te pawh lo ti thei la chu i chawkawng leh pumpui lam fel lo rule out nan a tha hle. A enkawl kawngah pawh a chhan azirin enkawl a tul hmel a, sinus dinhmun hriat nan Para-nasal (PNS) X-Ray te, beng check-tirte pawh a tul thei ang. Tuilum chi al a hrawk thuah thin hi a tangkai khawp a, tui emaw chawhmeh vawt lutuk emaw sa lutuk te insum la, hma i sawn thei beisei phawt ang.