Mi thu ziak sa hi ruk mai a chakawm thin! Mahni irawm atanga tih chhuah tur hriat ve si loh chuan! &&&&&& ZIAKTU HLUTNA Ka thianpa, kawmchhakpa ni bawk Rcha, Chief of Aizawl Thunder hian hmeichhe pakhat FB status min rawn thawn a, “Hei hi i sawi kha a ni lawm ni?” a rawn ti a. Nula pakhatin “V Day pualin ti ve keuh teh ang,” tiin ka tawngkam, “Kar leh lawka ‘saw saw ka ex’ tih theih reng in ni tih inhria ula…mi dang ngaihzawn leh tlakin fimkhur ang che u” tih thu, Tleirawl Sexy atanga lak chhuah, whatsapp group hrang hranga mi changkang thenkhatin ka hming nena an thehdarh ve kha a lo ni a. Ama thuchah niawm takin a lo ziak ve keuh a nih chu! Keia thusawi ve mai mai a lo la chhawng ve duh a nih chuan a lawmawm viau! Tu emaw talin ngaihzawng neih kawngah a lo fimkhur phah hlauh phei chuan a tha tho mai. Mahse, Rcha a lawm tlat lo! Rcha’n min hrilh zel dan phei chuan, amah Rcha’n tleirawl lung den hlum a uina thu nalh tak a ziak chu he nu tho hian ama irawm chhuak ni awm takin group hrang hrangah a lo thehdarh bok a ni awm e! Uluk leh muk taka a ngaihtuah chhuah thuril hlu tak, thluak pawh hmang ve eih loa kut zungtang hmanga mahni ziak niawm taka lo thehdarh ngawt chu a ngeiawm ve det mai thei reng a ni! Whatsapp velah hian thu nalh tak tak, thu tha tak tak hi a sawitu hriat lem loh a darh thin a. Tam tak chu a ziaktu pawh hriat theih a ni lo ang. Mahse mi fing deuh chuan copy paste tih te an dah tel thin. Ama ziah a ni lo tih an tilang ngam. An changkang tlat! Heng thu mawi tak tak hi a ziaktu hriat ka chak thin. Mi thuziak leh thusawite hi kan la chhawng emaw, kan tidarh emaw a nih chuan a sawitu/ziaktu hming chham tel hi a mawi em em a ni. Inruksak ringawt mai hi chu a fair lo deuh! Hmanah pawh pa pakhatin lehkahabu a ziak a, a bu chhung thu chanve vel chu ka pa lehkhabua mi a lak chhuah a ni! A lehkhabu khawi laiah mah chuan ka pa hming chu a dah lang hauh si lo! Thu ziah hi thil namen a ni lo. Zalen titi, phek khat lek ziak tur hian darkar thum zet ka hman zante zuk awm a! Zirtawp zan hi chuan thil dang ka thawk hman lo. Article thui deuh ziah chang phei chuan ni tam tak a ngai thin. Kolasib-a YMA General Conference a awm tum khan an souvenir ah thuziak turin min ti ve a. Zoram pum huap a nih bawk avangin phur takin ka ziak a. Min sawm ve duh kha ka lawm hle bawk. Conference-naah thu ka zu sawi a tul ve bawk avangin Pu Jacob-a nen kan kal ve a. An Souvenir enkawltupa chuan bu khat leh Rs 1000/- min lo pe a nih chu! Ka va lawm em! Ka beisei loh a ni. An changkang tlat! Kei tehlul hi magazine / souvenir velah thu ziak turin min sawm ve zauh zauh a. Thatchhiat nen, thiam loh nen, hun neih loh nen ka ziak tlem khawp a. Min ngen ngawih ngawih han ziahsak tak thenkhatte phei hi chuan a bu tak ngial pawh min rawn pe leh ta lo thin zu nia! Ziah dawn laia an ngenngawl tlauh tlauh nen khan! Ziakmite hi duat ve tur a ni. Ziakmite hlut nachang hria an awm ta nual! MEITHALLAWN magazine changkang zet mai buaipuitute hi an changkang! A ziaktute hi engemaw an pe ziah! Hralh leh tura lehkhabu kan siam a, tu emaw kan pur a nih ngai chuan thu ziaktute hnena lawmman pek nachang hriat ve hi a hun. Kohhran leh pawl engemawin souvenir etc kan siam a nih pawhin thu ziaktute lawmman tur hi hisap tel sa zel hi a finthlak! Ziaktu hlutna hi ziahtirtu hian hre ve se!