Kan nuna mi pawimawh, vawi khatmah lawmthu hrilh la tawng an awm ang em? &&&&&& LAWMTHU HRILH TAWNG LO Boston University-a zirtirtu hna a chelh laiin William Stidger-a chuana nuna mi pawimawh ni si, lawmthu pawh a la hrilh miah lohho chanchin chu a ngaihtuah kual mai mai a. Kawng hrang hranga a nuna thusawitu leh amah lo kaihhruai tawhtute, a chauh laia a nun lo chhemharhtute leh phurna lo petute chu a ngaihtuah chhuak zut zut a. Chung zinga pakhat, a sikul kal laia hlachham mi lam tuitirtu, hun rei tak a chanchin a hriat ngai tawh loh an zirtirtunu chu lawmthu sawina lehkha a thawn ta a. A lehkhathawn chhanna chu a dawng thuai a. A kutziak atang pawhin pitar kutziak a ni tih hriat theih mai lehkhathawn chu, “Duhtak Willie,” tiin a rawn intan a. Will-a chu kum 50 zet a ni ve tawhna a, a sam pawh a tlakawlh vek tawhnaa, University professor hial a ni ve tawhna a, ‘Willie’tia la ko thin dam an awm pawh a rin tawh loh laia chutianga kotu lehkha a’n hmu chu a hlim hle a. Chu lehkhaah chuan hetihian a lo inziak a : Duhtak Willie, I lehkha ka hmuha ka lawmzia hi ka sawi chhuak thiam lo. Tunah hian kum 80 ka ni tawh a. Pindan tereuhteah keimahin, mahnia chaw inchhum chawpin, favang hnah til hnuhnung ang maiin, mal tak leh khawhar takin ka khawsa mek a ni. Kum 50 chuang sikulah zirtir hna ka thawk kha a ni a, i lehkha hi lawmthu sawi ka dawn hmasak ber a ni tih hi i hre châk ve ngawtin ka ring! Thlasik zing khawvawt vin tuk maia i lawmthu sawina lehkha ka’n chhiar chu a nuam ngei mai. Kum tam tak chhunga ka hriat tawh ngai loh hlimna nasa tak min pe a ni. Pa tah belh lo tak a nih tehlul nen, chu lehkha a’n chhiar zawh meuh chuan Will-a mittui chu a hnam tiam tiam mai a ni. A hun kal tawha a nuna mi ropui, lawmthu hrilh la tawng ngai lo zirtirtunu lehkha chu a bih vawngvawng a. Mi tin hian kan nunah hian mi chhinchhiahtlak kan nei theuh ang. Kan naupan laia min duattu takthenawm tlangval a ni mai thei. Kan sikula zirtirtu min duhsak riautu pawh a ni thei e. Ka hriatthiam lohPathian thu min hrilhfiahtu Sande skul zirtirtu pawh a ni thei. Mahni inrintawkna min siamsaktu tuemaw kha. Kan nun min sawi danglam a, kan nihna tur ang kan thlen theih nana min puitu an tam mai. Mi thenkhat chu kan la inhmelhriat chho zel a ni mai thei. A thente erawh chu an chanchin kan hriat zui tak vak lohte pawh an ni ang. A then chu kan hriat, mahse kan biak tawh ngai lem lohte pawh an ni thei bawk e. Will Stidger-a chuan anmahni a ngaihsanna leh lawmthu sawi dan tur a ngaihtuah chhuak a, lehkha a thawn mai. Lawmthu hrilh phu si, lawmthu hrilh la tawng si lo mi eng emaw zat an awm ngei ang. “Ka lawm e,” han tih nan khua a la tlai lo mai thei asin! KM High School-a kan hotupa Upa Lalthankima kha lawmthu ka hrilh hmain a thi hman a, a pawi hle. Ka mawl rei vang a ni e. Hemi kaltlang hian a thlarau hnenah tal, “Ka lawm e!” ka’n ti tlai khawhnu a nge! Lawmthu hrilh tawng lo mi dang ka’n dap zui teh ang! A tlai hma hian…