Mi pawh an lo hlawhchham zing khawp! Mi pawhin Depression te an lo nei ve tawh thin..mahse.. %%%%%%%%% BEIDAWNG DUH HAUH LO CHU William S. Banowsky-a’n America ram hruaitu pakhat chanchin a chhinchhiah dan han en hi chuan hlawhchhamna vawi tam tak kara mi luhlul beidawng duh hauh loa tilui tlat chanchin hi a lang chiang riau asin! Khai aw: 1831-ah sumdawnnaah a tla chhia a. 1832-ah an ram rorel khawl (state legislature) inthlanna a chuh ve a, a chak lo a. 1833-ah sumdawnna a bei tha leh a, a hlawhchham let leh der a. 1834-ah State Legislature inthlanaah a tling ve khauh a. 1835-ah a bialnu a thi a. 1836-ah rilru lam harsatna tawkin ‘depression’ nasa tak a nei ta a. 1838-ah Speaker thlannaah a chuh ve a, a tling lo a. 1840-ah Elector thlannaah a chak lo leh a. 1843-ah Congress thlannaah a chak lo leh a. 1846-ah term khat atan Congress ah thlan tlin a ni ve leh khiah a. 1848-ah Congress ah a tling lo leh a. 1855-ah Senate inthlan a chuh ve a, a tling zo lo leh a. 1856-ah Vice President inthannaah a chuh ve a, a chak lo a. 1858-ah Senate inthlanah a chak lo leh a. A tawpa tawpah chuan, kum 1860-ah khan, United States of America President atan thlan tlin a ni ta a ni. Heng hi Abraham Lincoln-a nuna hun harsa thenkhat tlem te mai chauh a ni lehnghal! A chawr chhuahna leh a kalkawng paltlang hi bumboh ve tak a ni. President a nih hnua hun harsa tak tak a tawh, phurh zawh loh mai tur khawpa phur ritin a delh chang a la tam an ti! Sumdawnnaa a tlakchhiat nawn awn awn lai khan leiba a ngah em avanga dam a thlakhlelh loh thu a sawi lo a, politics huanga a hlawhchham zin em avangin eng ngawl emaw a vei tak thu kan hre lo. Thihna kut vawtin a duhlai chawnbana a kaih liam dawr dawr lai chuan bianga mittui luang chungin thihna piah lam a thlir tlat a, a thil tawn hrehawm tak takte avanga Depression a neih laiin hruihrual a chuh lem lo a ni awm asin! A hlawhchhamnaah tumah a puh ngawt lo a, a duh hmuh nan tumah ‘inthahah a vau’ pawh ka ring lo e! Hlawhchhamna livir-in a hip luh bik niawm taka mi vanduai khan, ‘Van a duai chuang e’ tih hla saa indawm kun duh hauh loin vau kam a thlir lui tlat a. Ban tha thla hauh loin beidawnna lipuiah chuan a inchhek kang lui tlat a, zalenna vaukam mawi tak chu a hleuh kai ta zawk a nih kha. Beidawng ve duh lo, mi tum ruh leh rilru puthmang nghet nei tlat Abe Lincoln-a chu America President ropui berte zing ami a ni kumkhua ta a nih hi. Beidawng duh hauh lo chu an heti tlat zel. Naktuk hian ni thar, boruak thar, thil thar, beiseina thar a rawn chhuahpui leh thin tih ring tlattu tan chuan dam man a awm bik awm mang e! “Kar ru, kar ru, vau kam lam pan ru..”