Phone hi kan chelek ta viau si a. Hmel inhmu hauh lo pawh inbiak a tul fo thei. Tih fuh loh ni chuan zan mut hmuna han zah thar leh chem chem tumte hi a awm thei! &&&&&& NGAM ZAWK BIAK Zan dar 8-a chhungkaw rorel turin pa berin min ko khawm a. Dar riat rik hma hret chuan ka phone a lo ri a. Ka hriat loh number a ni. “Hello!” kan ti a. “Pu Hrekima a ni em aw?” “Aw ni e..” “I hman em? I biak lawk theih em? “Aw, hman e, biak theih e, mahse rei lo te aw..dar 8 ah hian tihtur kan nei a..” Patling aw a ni a. A fapa ruihhlo ngai chungchang nge a rawn sawi dawn a, a fanu intihhlum tum chungchang aw tihte kha rilruah a lang a (phone number te kan lo tlangzarh ve laklawh tawh si a, chulam chu rilru hian a tin deuh to reng mai a!), hun a heh leh zek mai ang tih hlauin, “Rei lo te aw..’ ka’n ti nghal hram kha a ni a. Mi thenkhat hian an harsatna hi tawi fel takin an sawi thiam a, tih tur inhrilhin kal zel dan tur ruahmannate hi kan siam fel mai thin a. Mi thenkhat erawh hi chuan, phone-ah pawh nise, essay type-in , Pu Vana Special Report ang maia kimchang leh ngaihnawm hian an han sawi ta thin a. Hun nei deuha thingpui-sen-hang dawm paha ngaihthlak chite pawh hi an awm ve fo thin. Zing atanga zan thlenga damlo buaipui tawh hnua nupui fanaute bula thlamuanga hahchawlh ve tum tawh laia dam lohna chungchang bawk phone-a han sawi leh hrep hi ‘ka ning’ tih chi chu a ni lo na a, a tuk lama hmaichhana inhrilh mai hi ka tlin zawk tawh fo thin a. Ka biak mek chu tunge a nih ka hre lo. Mawi lo tak leh chaltlai tak chuan ka chhang lo na a, min biak rei ka hlauh deuh avanga, “Rei lo te aw..” ka’n tih kher danah khan, ka ngaihtuah let hian, ka ‘ngam zawk biak’ deuh hret chuan ka inhre hnuhnawh deuh. Amah lah chu a hawihhawm phian a. “Aw le, a rei lo ang, rei lote kan be zawk duh che... Lalmalsawma, CS ka nia,” a rawn ti ta a. Ka aw ki ka thlak nghal ta hlek kha zana ka zah thar lehna chu a ni! A hma lawka ka ‘ngam zawk biak’ kha ka’n ‘ngam loh zawk biak’ thar leh ta thut kha a ni berin ka hria! CS a ni tih ka hriat veleha ka aw ki ka thlak kha ka zak lo, zahna aw ki ka hman kha ka tihtur a ni. Aw ki thlak ngaia tuemawni ka bia kha a ni ka zahpuiawmna chu! Huai zawk aw ki leh dawih zawk aw ki ka han nei hrang vel kha ka tenawm deuh tlatin ka inhria! Ka ngaihtuahzui tak thil pahnih a awm. Pakhatna chu : Tupawhin min rawn be thei a, number hriat loh pawh ni se, aw ki thlak danglam leh thut ngai lo tur hian a tir atangin tupawh hi zah takin biak mai tur a ni tih hi. Kei takngial lakah pawh aw ki thlak chu an awm ve tho nia! Ka va biak tirha rawn “hello” ngaihno bei vak lo, ka insawi hnua han nem leh hrette pawh ka tawng ve! Khami ni atang khan phone ka chhanin, ka la a nih rau rau chuan (lak loh ka ngah, a ri loa lo dah nilen palh tumte a awm a, kan hotupa Dr. Hmuchhuaka pawh ka chungah a lawm tawh lo!), aw ki thlak leh thut ngai lo tura chhan zel ka tum ta a ni. Mahse hah deuh tum te, nin deuh tum te, thinchhiat ni deuh tawngfuhte pawh an la awm zui mahna! Pahnihna chu: Mi kan va biak hian insawi hmasak thuai tur a ni. Kan number an lo nei lo thei a, kan aw atang ringawt chuan min lo hre kher lo thei. “Hello, Lianchhiari, Dungtlang khua ami kha ka nia..Chawngfianga i ni em aw?” tih mai tur a ni. Min lo hre nghal a nih leh a lawmawm. Kan va biak tura te khan chiang sarha min biak theih nan kan va insawi pawhin chiang takin, min lo hriatchhuah theihna tura va insawi mai hi a tha. CS khan hawihhawm takin a hming leh nihna rawn sawi nghal thuai lo se chu, khami zan pawh khan ka che nawi zui rei viau thei tlat! Hmanah kan kawmthlangnu kha ka pain a bia a, hawihhawm takin, “Rosiama ka nia,” a ti ve thlap mai a. Kawmthlangnu chuan Forest hotupa Rosiama biakin a be tho!! “Pastor Rosiama ka nia, i kawmchhakpa,” han ti mai se an buai hauh lo tur! Tum khat pawh phone-in min rawn bia a, “Patea ka nia,” a ti mai a. Patea ka hriat ho chu kan ngaihtuah kual ruai ruai a. Ka kawmthlangpa Pu Pate nge Pu Patea of Zarkawt (kan Health Minister a nih hma)? Kan senior doctor U Patea nge ni a, Pastor pension fapa Patea zawk? KM High School kan kalpui, ka thianpa Patea nge ka pu thi tawh fapa Patea zawk aw? Ka tawng buai viau tawh. Hman deuh khan Upa Sawta of Mission Veng hian min rawn phone a, “Hei, kan hotuten an be duh che a..” a ti mai a. A hming a sawi si lo a, kan be zui ve mai bawk a. Upa Sawta meuhin, ‘kan hotu’ a tih chu ka zah si, a aw atangin ka hre thei si lo, ka zawt ngam tawh si lo, nawi ang reng taka biain kan ina lo kal lawk mai turin ka ti a. Pu R.Lalzirliana, MLA (tuna kan Home Minister ni ta hi) a lo ni a. Ka inluah lai, mi inhnuaiah chuan a lo kal ve mai bawk a! Ka zak leh deuh a! Tupawh be dawn ila, hawihhawm takin, aw ki thlak leh hnuhnawh ngai lo turin be mai ila. Tupawh be dawn ila, chapona leh inngaihtlawmna lam rilru pu hauh loin tha takin insawifiah nghal mai ila a him ber mai! ‘Ngam zawk biak’ hnu lawka ‘ngam loh zawk biak’ leh thar velte kha a buaithlak tlat! A huaisen zawk kha a dawih zawkah kan tang leh hma thin ropui si a!