Hmangaihna tehfung dik hi a awm em? Inhmu loa awm thei lo ai chuan inhmu reng chunga awmho rei theite hi ka dah sang ta zawk riau mai! &&&&&& CHAPTER HAR BER “Rilru lama harsatna chungchanga rawn be rawntute zingah hian englam harsatna nge tam ber ang,” tia min zawh hian, “Relationship kaihhnawih’ tiin ka chhang thuai thin. Relationship tih chuan mihring inlaichinna leh inkungkaihnain a ken tel zawng zawng a huam. Nula leh tlangval kara inngaihzawnna te, nupa leh fate kara inlaichinna te, nupa inkungkaihna te, mo leh a pi inkar thu te, inneihna avanga chhungte thar in-laws te nena inkar thu te, thiante nena inkawmngeih dante leh thenawm khawvengte nena in-chu-kha dan te a huam. Chutiang ‘relationship’ lam buainaah chuan inngaihzawnna leh nupa nun kaihhnawih buaina hi a tam khawp mai. Pathian min din dan a ni bawk a, inngaihzawn nachang hi kan va han hre tak em! Ngaihzawng nei ruala kan ngaih lem loh, inchhungkhura kan ‘naute’ te thleng thleng hian kal ril fu fu an awm teuh tawh awm asin! Inngaihzawnnain a ken niawma kan ngaih zawng zawng hi kan tikim thuai thuai zel lehnghal a. ‘A la hun lo,” tih hian kan nunah thu a sawi thui loh chang a tam khawp mai. Tleirawl inngaizawng hlim inngaihzawn nasat zia hi ka ngaihtuah thin! Nuam an va han ti em! An va han inngaizawng tak em! Hmangaihna chawrno tir hi a duhawm a, a hmuhnawm bawk. Inngaihzawnna hi an la na, an la thutak, an la urhsun bawk. Hmangihna hi a ropui em avangin lak thutak hle tur a ni reng a ni. Thenkhat erawh zawngin an ti lutuk ta deuh thin a, anmahni zawh tawk baka chakin an kal a, a fan theih chin tawp a thleng thuai a, a puak keh chu a darh nasa thei khawp mai. Inngaihzawn thiam si lo inngaizawng ve vak ringawtte hian thianghlimna ramri an thiat ta duai duai thin a. Chumi kaihhnawih buaina hmachhawn leh ngam si loa nau tihtlak tum ta uaih uaih, thih mai tum leh ut ut lawi site hian ramri an kan hma khan ngaihtuah lawk kim ve thin se an heti lo tur hi a nia! Inngaihzawn tirha chatuan sawi thleng thuai, bialnu bialpate hming tattoo hman tawh si, thla thum hnu leka inthen leh, tattoo siam danglam remchang si loa thai pherh ta mai maite pawh an awm mai thei. Inneihnain a ken tel tur harsatna hmachhawn dan zir peih hauh si loa innei ve chawt, harsatna pangngai tak pawh harsatna lianpui nia ngaia hmachhawn leh ngam si lo an awm fo. ‘Inneih chu nuam ta vek dawn’ nia ring tlat khawpa hmangaihnain a bual at, Rs. 420 chauh senga mumang khawvela chen reng tum lui, a tak ramin a ben harh leh si, a tak ram hmachhawn leh hleithei lo khawpa nawi ru tlat site hian fahrah engzat tak siam tawh ang maw? “Dam dun chhung zawngin ka nei ang,” tia intiam thlup thlup si kum thum pawh daih leh si lote pawh an awm ta ve ang. “I tan chauh rinawmin,” tia lehkhathawn tawpna khar ve ziah si, inneih hnu lawk atanga ngaihzawng inneihsan lehte pawh an tam a ni mahna! Inngaizawn laia inngaihzawn vak aiin inngaihzawn rei a pawimawh zawk. Induhna tihlan chiam chiam aiin induh rei a pawimawh zawk. Hrisel that laia kut hlei riau, awm dun apianga inkhalh a, inkaih a, inkhawih neuh neuh aiin dammawh hriltlan leh mangan laia mittui hruk hulsaktu kut a hlu zawk. Hmel inhmu loa awm theih loh aiin hmel inhmu reng chunga chen dun rei theih a ropui zawk. Hmangaihna tehfung dik, mi tin tana rintlak hi siam theih a ni kher lo ang. Mahse ‘a reina leh a tlona‘ hi a tehfung hmantlak ber tur a nih ka ring. Pitar leh putar chak tawh lo takin kun keuh keuh chunga Biak in kawng an la zawh dun rial rialte hi a va hmuhnawm em! Tlairawl tha za leh vanglai tha chak nei tawh lo chu an tlu awlsam a ni mai thei e, mahse an inhmangaihna chu a va nghet tha si em! An kailawn kai tur leh an kawng kan tur fimkhur taka an kut zur taka an inkai laite chu a hmuhnawm lutuk ringawt. An kut hmawr a insik avanga current tek chuai chuai a awm tawh lo a nih pawhin an inhmangaihnaah chuan load shedding a awm ve ngai lo a nih hmel! Dawhkana pitar leh putar tarmit awm dun rial mai hlutzia hi i ngaihtuah ngai em? Hmangihna tlo tehfung atan ka duh riau tlat! Mihring inlaichinna hian ken tel a ngah lutuk a, inngaihzawnna hian paipawn a ngah em em a, inneihna hian thuam chhawm a keng tam teh asin! Tawngpawng basa ngam ngawt chi a ni lo. Fekfawn taka enthlak a, rilru fim pu chunga chik taka inzir dun a, thawm dim taka inveh chunga luhchilh chi a ni. Chung zawng zawng chungah chuan ngaihdamnaa hnu khar zel a ngai thung. Hringnun zirlaiah hian Relationship chapter hi thiam bel awlsam lo ber a nih ka ring. A va har tehlul ve le! Mahse a va hlimawm si em! Nimin (October ni 3, 2015) kha ka nupui neih kum 20-na a lo ni ve ta reng mai! Nun kawnga chapter har ber mai hi kan thiam lo nasa mai si a, kan fail teuh thin teh asin! Ngaihdamna avanga grace mark hmu chungin pawl kan sawn tawk tawk a, hei chen hi kan thleng ve ta hram a nih hi. Golden Jubili thlenga inneite hi ka zah thar ta riau. An inneih chhung zawng khan harsatna tawk lo an ni bik dawn der si lo a. Naktuk, October ni 5, 2015 a an inneih kum 50-na thleng tur ka nu leh pate hi zahna chibai ka buk e.