Chutichuan heng pathum, rinna te, beiseina te, hmangaihnate hi a awm reng ang; hengahte hian a ropui ber chu hmangaihna hi a ni. – I Korinth 13:13 &&&&&& HMANGAIHNA KHAIDIAT Hellen Keller-i chanchin kan hria. Mitdel bengngawng a ni. England Lalnu, Queen Victoria khan vawi khat chu Hellen Keller-i hnenah, ‘hetiang ni chunga hetiang a lo nih theih dan’ hi a zawt a. Ani chuan amah kaihruaitu chawimawiin, “Anne Sullivan-i vang ni lo se khawvel hian Hellen Keller-i hming an hre ngai lo vang” tiin a chhang a. Anne Sullivan-i chu naupan lai atanga harsatna tam tak tuar, khawsikpui avanga mit del ve lo chauh a ni a. Engemaw lai phei chuan ‘Beiseiawm tawh lo’ tih khawpin a rilru a buai a. Boston khaw daia rilru buaite enkawlna hmun lei hnuai pindanah an kalh hnan a. Tumah biak nachang a hre lova, a bulah mi dang awm ve mahse a ngaihsak ngai lo. A thawh fuh loh lehzual tum phei chuan amah rawn hnaih deuhtu apiang chu lo sual vak a ching lehnghal a. Tihngaihna awm tawh loa ngaiin an kalh hnan tawp mai a. Chuta thawk Nurse upa lam tawh tak pakhat chuan a that leh theih a beisei tlat a. Ni tin a kan a, ei tur a ken sak a, aw nem takin a be reng a. Mahse a lo uksak lo a, a biak pawh chu a chhang lo a, a eitur kensak pawh a ei chuang lo. Mahse chu Nurse chuan a thiltih chu a thulh phah chuang lo a, a tlawh reng a, zaidam takin a be zel a, hmangaihna aw nem takin a fuih zui zel a. Hmangaihna a dawn zel chuan a tha chhuak le hang tih chu a ring lui tlat a ni. Ni tam tak hnuah chuan Anne nunah chuan danglamna a rawn lang ta a. Thinrimna leh huatnaa khat thin hmelah chuan ngilneihna leh zaidamna hmel a rawn lang a, engmah ngaihsak ngai lo chuan a bul vela thil thleng chu a rawn ngaihven ve tan a. A enkawltu daktawrte pawh an phur a, inhnuai rip atanga sawn chhuakin in chung lam hmun thawveng zawkah an sawn chho ta a. Enkawlna tha a dawng zui zel a, ‘beisei bo khawpa a nghet tawh’ chuan damin chulai hmun chu a chhuahsan thei ta hial a. A chunga Nurse thil tih chu hre rengin tanpui ngai puih leh hmangaihtu nei lote enkawlna kawngah Anne Sullivan-i chu a inhmang chho zui ta a. Hellen Keller-i pawh a enkawl a, a nunah theihna engemaw a awm tih hriain a kaihruai a, a zirtir a, a zilh a, a hrem a, hmangaihna nen a enkawl a. Hellen Keller-i chu ‘hetiang ni chung hian hetiang hi’ a lo nih theih phah ta a ni. Anne Sullivan-i vang ni lo se khawvel hian Hellen Keller-i hming an hre ngai lo vang. Kha nurse nu zaidam leh hmangaihna ngah tak vang kha ni lo se khawvel hian Anne Sullivan-i pawh an hre ngai hek lo ang a, Hellen keller-i pawh hriat a ni hek lo ang. Hellen Kelleri chu kan hre vek. Mahse Anne Sullivani chu kan hre meuh lo. Chu mai a la ni lo, tun thlengin Anne Sullivani chunga hmangaihna lantirtu Nurse chu a hming pawh hriatzui a ni lo. Tumah biak nachang pawh hre lo naupang rilru buai Anne Sullivan-i chu hmelhriat ngai loh hmangaihna chuan chhanchhuakin zirtirtu tha leh zaidamah a siam a. Chu zirtirtu zaidam chuan mitdel bengawng naupang satliah Hellen Keller-i nuna mei de set set chu hmangaihnaa chhem alhin khawvel tiengtu ropui takah a chhuah leh ta zel a nih chu! Hmangaihna khaidiat kal zel hnathawh hi a va ropui em! Beiseina awm tawh awma a lan loh pawhin hmangaihna chuan a beisei tlat a, engmah tihngaihna awma a lan tawh loh laiin hmangaihna chuan hna a thawk thin tlat. Kan hmelhriat leh hmelhriat ngai lohte lakah hmangaihna hi lantir ni tin teh ang u. Chu hmangaihna khaidiat kal zel chuan tu emaw nunah thu ropui a la sawi ang a, tu emaw nun chu a siam tha thei ngei ang. Hmangaihna mei hi vawi khat chhem alh a nih tawh chuan chatuanin a alh reng thei tawh si a.