“Naupang hian nungchang an pianpui chiah lo, an mahni enkawltute zirtir dan dan kha an nungchang a ni mai,” an ti! Nu leh pa atanga zirtirna an dawn te, an hmuh leh tawnhriatte hi an nungchang siamtu chu a ni e an ti alawm! Ka fate chu an va ngaihtuahawm dawn em! %%%%%%%%% KA ZIRTIR FUH LO TLAT A NI Hman deuh tawh khan Tuikhuahtlang atangin Sikulpuikawn panin ka tlan thla a. Kawn thlen thlak dawn kawng kual laiah chuan Taxi pakhat hi a rawn tlan chho bawrh bawrh a. Ko pang lam nekin sir takah ka lo ding a. A tlan muang ve ang a, zawi tein uluk takin kan inpel ang chu tia ka nghah laiin a tlan dan ngai rengin a rawn tlan chho a, ka motor chu a rawn tai ta hram a nih chu! Ka ngei bawk a, ka’n hau tak tak mai a! “Speed a laklawh a, second gear-in ka tlan laklawh sia..,” tih chu a chhuanlam neih chhun a ni. A dawrawm kher mai! Thiam zawk chan chang ka ni bawk a, ani lah thiam lo zawk tih inhriain a tlawm dai mai a, ka ngam zawng tak hmel pu a ni bawk nen, ka huai tan tan khawp mai! Ka chhuk a, ka motor kan enchian chuan chhia alawi a lo awm mang lo pek a! Mahse ka hau zo vek tawh! Chuti teh hrepa ka hauh chiam avanga inthiam lo deuh roh chuan thiam thu ka dap khawm a. “Ka motor chu chhe viau lo mah se a thiam lo hrim hrim! Engah nge second gear khan tlan tlang kher a tum? A timuang ang a, first gear-ah a lut ang a, tichuan, muangchangin inngaichang chungin, a sir darthlalang hmang tangkaiin kan inpel mai ang a, sam zai tiat leka insi lo pawhin kan inpel thei alawm! Motor khalh thiam mang lo te, hawihhawm lo lutuka tlan phawr phawr thinte hi chuan motor khalh ve lo se a ni mai alawm!” tiin ka inchhan chawp chiam a. A kal tak hnu, ka motor-a ka lut leh chiah chuan ka thil tih dan pawizia ka hrechhuak ta a ni. Ka bula thu ka fapa, min ngaisang em emtu chuan engkim a lo hmu vek! Dik ka intih em avanga dik lo zawk ka hnuaichhiah dan leh ka ngam zawng laka ka inluling vel chu! Ka fapa hian min ngaisang viau thin a. Hmelah mai min chhun lo a, a kal dan thleng hian min copy a, a kal kun ve kheu kheu mai nia! A tet deuh lai khan zu leh ruihhlo dang chungchang seminar-in kan chhuak zing khawp a, a inkhualtelemte hian ipte a khai a, “A pa, bye aw.. seminar kan nei dawn a, zu chungchang a nia..,” te hi a ti mai nia! Naupang thanglian hian zirtirna an mamawh em em a. Thua zirtir chiam aiin kan chet dana kan zirtir hian an zirlai an bel zawk an ti thin. Khami nia ka fapa zir chhuah tur kha a va chhe tehlul em! Thil tam taka ka mizia a lakna hi tawngkama ka zirtir aiin ka tihdan a hmuh atanga a chin ve a ni hlawm si ale! Kha thil thlengah khan, ka sawi tur ngai reng sawi tho khan, awka nem leh vin lo zawk hmangin, mi dang zahna tel chung khan lo hmachhawn ila chu a tha tur a nia le! Ka fapa ka phurh lai ngei hian miin min han su leh det sela (na lutuk loin!), awka dam thluama han chhan a, an thiam lo a nih pawhin zah taka biak a, han ngaihdam vel ka chak kher mai! Chu hun remchang chu ka la nei ta miah lo a nih hi, tun thleng hian! Ka fapa hian a aia hmelchhe zawk leh thiam lo zawkte chu zahpah miah loa a hauh bawih bawih a, a ngam zawngte chu nasa taka diriam a, thiam a intihna thila a thiam lo zawk a tim bawih bawih a, rethei zawkte laka a inlulin hle hun a lo thleng ta a nih chuan tu dang mah dem tur an awm lo ang. Kei, a pa, amah zirtirtu ngei lo hi chu! Ka zirtir fuh lo tlat a ni.