Ka sawi tul lo ka sawi ve chhen tum hi a va tam tawh dawn em! Mi thawh that dan chhui thui duh hauh loa a tihfuh loh lai sawi chhuah ve chhen ka lo tum avanga mi rilru ka hliam tak hi an tam tawh awm mang e! %%%%%%%%% “VE CHHEN A CHE U” Thianpa Padinga Lunglei atangin a lo haw phei lawk a. In pawh a la thleng em lo vang tihah Lunglei lam thiante’n a nupui hnenah, ‘In pa a lo phei em ni?’ an rawn ti hmanhmawh pek a. A pasal lo phei tur hlim tih hriat reng hian Pi Dawngi chuan fiamthu tak meuhin, ‘Ve chhen a che u,’ tiin a lo chhang a (mittui tla phunga nui lem nen!). A lo haw phei ve tuma zalen taka thlah fal ve mai mai tur an nih laia lo va tihbuai ‘ve chhen’ reng reng mai! Thianzaho inngamtlak han infiamna karah chuan eng eng emaw ka ngaihtuah zui ta mai mai a. Tha tetea mi awm mai mai tur nunah hian kan lo va inrawlh buai ve chhen thei dawn a nih tak hi. Tul lem loah hian kan lo inrawlh ve chhen a, pawimawhna nei lem lo hi kan lo inzep ve chhen a, kan hlawkna tur awm miah lo leh mi tana hlawkna tur awm miah loahte hian kan ring kan lo rawlh ve chhen a, sawi ngai kher lote hi kan sawi ve chhen zel a nih hlawm dawn tak hi a! Daktawrte hi damlo enin kan buai ve mawp mawp a. Sawrkar kalphung leh Office dawr dante hi kan hre lo khawp. Office han dawr ve nikhuate hian kan lo mawl thei viau emaw ni dawn ni, “Doctor-ho lah hi in mawl si,” te hi min lo ti ve chhen zel! Doctor-te hna chu damlo enkawl a ni. Chu chu an thiam tur a ni. Thil dang thiam tam chiam lo mah se damlo an enkawl thiam chuan a tawk viau. Kan thiam tur lam pawh ni em em lo thilah, ‘In mawl si,’ lo intih ve chhen mai chu kan hotupa thin Dr. Gordon-a’n chhanlet a châk pek a, “In thawh ang hi chu ni thum chhungin kan thiam vek ang, kan hna hi chu in thiam har ve khawp ang” a’n ti fiamthu mai chu an haw teh asin! Miin kum tam tak an thawh hnu pawha an la thiam kim theih loh ni thum chhunga thiam lo inrin ve chhen pawh kha a dik bik lo reng a ni! (whatsapp ni se aw..Zawngte hmaihup lem leh mitttui per chuai chuaia nui lem bel tel ka va châk em!) Mahni hna lo zawk thiam viau a, mahni hna lama nep viau si hi a pawi zawk mah. Mahni hna thawk tha mang lo leh thiam mang lo, thil danga zei taka inrawlh ve chhente hi a awm theih tak ang a! Mahni engmah ni bik lo chunga mi dang sawisel ve chhente hi ka ching riau pek a nih chu, kei mi sual hian! Mi nihna leh an dinhmun ngaihtuahpui duh hauh loa fing ber niawm taka roreltua tan mai hi a awm thei dawn. Mi thiam loh kan thiam a awm ang a, mi thiam em em a ngaihna kan hriat hauh si loh a tam ang! Thawkaphita insawisel ve chhen zel mai hi a tha ber lo. Politician leh Minister te hian zing thawh atanga zan mut dawn thlengin Zoram tan an ngaihtuahna sengin hna ropui tam tak an thawk a, an tih tamzia sawi tha duh loin an tihfuh loh chhun leh an chet chhiatna lai kher thur chhuakin mi sual leh hlemhle berahte hian kan han sawi ve chhen zel a nia! Doctor-ten zaidam thluama damlo an biak a, tha tak leh dawhthei taka damlo mawl zawkte pawh ‘in mawl hlawm si’ ti duh hauh lo leh, an hmelhriat ngai hauh loh pawh thahnemngai taka tlaivara an enkawl dan chanchin kan sawi duh hauh loh laiin, a tawng fuh lo chhunin ‘Doctor sual kan tawng’ tiin kan chhuah mualpho ve chhen zel mai thin chu a nih tak hi le! Officer leh thawktu dang fel tak tak, biak nuam leh dawr nuam em em, mipui tana inpe tam tak karah a sual chhun hi kan sawi ve chhen zel pek a! Bank-a hnathawk dawr nuam em em mai, thingtlangpa mawl ber pawh dawhthei taka lo pui thin an tam tehlul nen, a inchhuang leh a chapo ber kher thur chhuaka bank hnathawk zawng zawng hawihhawm lo ta vek ang maia kan han vawrh darh ve chhen zelte hi aw! Pastor fel tak tak, an beramte thlarau nun ngaihtuah em ema lei piah lam ram nun tur thlenga ngaihven a, taksa leh thlarau nun tichhe thei laka fimkhur tura min zilh leh min fuihtu an tam em em lai hian, ‘zu chauh do ngam, thawhlawm duh avanga corruption do ngam si lo’ ang maiin kan han sawi ve chhen zel chu a nia leh! Mi chanchin tha lai zawk zel hi sawi ve chhen tawh zawk ila, faktlak fakna ri hi ri ve chhen tawh zawk sela kan insiamtha hma zawk ang em tihte hi ka ngaihtuah ve chhen a nih hi!