Ka fapain pawl 9 a zir lai khan zirlai pawimawh tak mai ka zir chhuak leh ta chauh pek a! A pawi thui hman teuh asin aw! &&&&&& KA FAPA KA CHHAWR HLUM TEP! Ka fapa mal neih chhun chuan, “Pa, ka chau, ka zawi, ka nuam lo,” a ti a, a mu zel zel ta mai a. Chaw a ei tui lo a, mut erawh chu a mu thei. A pang ka khawih a, a dai. A mit ka keu a, a tha. A hlim lo a ni chiang mai. “Bawihte, hlim lohna i nei em ni?” ka ti a. “Nei hran lo a, mahse ka nun hi a hrehawm, ka awm dan a nuam lo,” a ti a. “I rilru a na em ni? Ngaihzawngte i then a ni lo maw?” ka ti zel a. “Pa, chutiang a awm lo, engmah rilru natna tur ka nei lo,” a ti bawk si. A zep a ni ngei ngei ang. A awm dan hi rilru hlim lo awm dan chiah a nih hi. “Deprression i nei ve a ni ang. Han che harh lui la, invai harh la, tlangval i nih kha, i tha mai ang,”ka ti a. In kan sak lai a nih bawk avangin Inrinni chawhnuaah chuan, “Insaknaah chho ila, han thawk harh ang aw,” ka ti a. “Pa, ka zawi e, ka peih lo asin,” a ti a. “Mai mai, i depressed a nih kha, depression chu khatiang khan alawm an awm, an nun a zawi a, an chau a, an ngui a, thiltih phurna an nei lo thin alawm! A damna chu thawh harh, thawh luih, chet tam tur a ni. Hna han thawk ila, i thawk phur ang a, i harh zawk ang,” ka ti tlat a. Pafa inkawmngeih ve tak kan nih avangin ka bula awm nuam a ti a, a bula awm nuam ka ti bawk si. Fapa thuawih a ni bawk a, min hnial zui ta lem lo chuan kan inzui chho ta nge nge a. Ip ruakah balu ka thunpui a, kan thiar dun a. A zawi ngang mai. Hun awl hlekah chuan a thu zen zen zel a. Ka tur a, ka fuih a, ka fiam a, mahse a sawt mawh khawp. Fuih mai chu a sawta ka hriat loh avangin Depression damdawi Flumod chu ka pe zui ta nge nge a. Ni nga hnuah chuan a mit a rawn eng ta pap mai a! A mit a liam a lo nih chu! A mitliam tur intham nun ram chau, zawi, nun ngui, engmah tiphur lo lek chu lo niin! Ka fapa mitliam tur zawi chau em em chu, “Ngaihzawng i then a niang, i depressed a nih kha, thawh harh tur,” tiin ka tur a, ka nawr a, ka chhawr chiam mai pek a nih chu! Ka va han khawngaih leh hnuhnawh em! “Hlim lohna tur ka nei lo,” a ti chung chung khan depression-ah ka puh a, ka fapa thinlian chu depression damdawi ka pe ta pek a nih chu! Patling hi a va mawl theih ve le! Mahni ngaihdan dahlen viau a, thlirna pakhat chauh atanga thil thlir a, mahni hriat zawng ringawt atanga engkim teh fel ngawt zel mai that lohzia ka zir chhuak chiang khawp! Depression enkawl thang, depression hmu hnem, a pawizia leh hlauhawm theihzia intihre takin ka ngaihdan ka siam hmiah a. A chhan dang awm thei ka ngaihtuah thui duh lo a, thlirna tlang dang atangin ka thlir lo a, ka thlirna chu tha ber, dik ber ang maia ngaiin natna dang awm thei pawh ka ngaihtuah thleng duh tlat lo zu nia! Ka fapa kha ka chhawr hlum hman ang tih a hlauhawm asin! Mitliam enkawlna pawimawh ber chu ‘hahdam taka awmtir’ a nih laiin maw! Kei lahin balu ka thiarpui a, suahdur ka lektir a, “ I zawi em mai, nun nguai mai maite chu hneh tur,” tiin ka’n nawr vak vak mai kha a nia! Ngaihdan nghet tlat hi ka nei fo a, ngaihdan dang ka ngaithla duh lo fo. Thil chhe te ka hre ve a, chu ka hriatna tawite atang chauh chuan thil reng reng hi ka teh thin a. Hre tlem hle si hian engkimah inrawlh ka tum ve fo a. Mi dang ngaihdan aiin ka ngaihdan chauh kal tlangpui ka tum fo thin. Tehfung pakhat chauh ka hmang thin a, buklung pakhatin thil tinreng teh fel ka tum fo thin. Chu mi mawl rilru avang chuan ka fapa mitliam tur chau em em chu depression neiah ka puh a, ka chhawr hlum lo chauh pek alawm le! Mahse fin ka tum tawh. Engkim hi tehfung pakhata teh nghal mai ka tum tawh lo. Thil engkim hian pang lehlam a nei vek tih ka hre chhuak tawh. A lehlam lehlam hriatchian hma chuan thutlukna mawl tak siam loh ka tum hram hram ta thin a ni. Tihsual ni erawh ka la nei ta fo pek ang, kei mi mawl hian! Ka fapa hnenah pawh chuan ngaihdam ka dil ta nghe nghe a nih kha. Ka mawl em a ni, kei zawng!