Pian leh thih thuah hian duhthlang thei kan ni lo. A inkar erawh kan duhthlanna. &&&&&& THLAN TUR PAHNIH Pa hlim thei reng mai hi a awm a. A engthawl theih viau dan chu ngeiawm zawk lek lek a ni! Engtia hlim thei reng bik nge a nih tih an zawh chuan, “Hringnun hi chu duhthlanna a ni mai. I nun i hman dan hi i thlan dan dan a ni mai. Hlim leh hlim lohte hi kan thu thu alawm. Duhthlan tur pahnih awmah hian a tha zawk lam hi ka thlang zel mai a!” a ti hmiah! Vanduaina a tawk ve ta a. Zan khat chu a dawr hnung lam kawngkhar a khar theihnghilh a. Rukru an lo lut a. Silaia tin chungin pawisa bawm an hawntir dawn a. A kut khur nasa deuh chuan chabi chu a thlauh ta pek a! Rukru zinga pakhat chiai chuan a kap ta mai a. Vanneihthlak takin tanpuitu an rawn thleng thuai a. Darkar tam tak an zai hnu leh ICU a rei fe a awm hnuah dam takin a chhuak thei ta a. “Min kah hnua chhuata ka leh reng lai chuan duhthlan tur pahnih ka nei tih ka hria a. Thih ka thlang thei a, dam ka thlang thei bawk. Dam chu ka thlang ta zawk a. Min bawihsawm hmasatute chu an fel em em mai a, min thlamuan an tum a, ka that leh mai dawn thu min hrilh reng a. Damdawiin kan thlena doctor leh nurse ho hmel ka va hmuh erawh chuan ka thla a phang ve khawp mai. ‘A thi dawn a nih hi’ tih melhin min melh tih ka hre chiang khawp mai. Eng emaw ka tih a ngaiin ka hre ta pek a. “Nurse nu lianpui chuan eng emaw huat (allergy) ka neih leh neih loh min han zawt a. ‘Nei e,’ ka ti vat a. Chutia ka tih veleh chuan doctor-te chuan an thil tih lai chawlhsanin min rawn melh a, ka sawi zawm tur ngaichangin an ngawi ta thap mai a. Thawk ka’n la halh a, ‘Silai mu’ ka’n ti tuar a. An nui ta ham ham a. Kei ta pek chuan, ‘Dam turin duhthlanna ka siam a nia. Dam lai zaiin min zai rawh u, mitthi zai ang ni loin,’ ka’n ti leh ta a nih kha!” tiin dam a tum dan chu a sawi chhawng a ni. Hepa hi doctor-te thiamna hmangin Pathianin a nunna chu a zuahsak a ni ngei mai. Mahse a rilru puthmang hian dam chhuah hi a phu ve bawk a ni! Ni tin hian duhthlan tur hi kan hmaah hian a inchhawp reng thin. Zinga kan han thawh hian duhthlan tur pahnihin min lo hmuak. Vawiinah hian hlim taka awm nge kan thlan ang ngui taka awm? Duhthlan tur pahnih dangin a zui a, tangkai taka hun hman nge kan duh tangkaina nei miah loa hun hman? Tangkai taka hun hmang apiang an hlim fo. Thil tam tak hi a lo thleng satliah ngawt lo a, kan thlentir theih a tam khawp mai. Kan thuneihna piah lamah leh kan inrawlh sawt ve hauh lo thil thleng thei erawh a tam bawk. Kan duh vang ni hauh loa vanduaina leh thil tha lo engemaw a lo thlen pawh hian kan lo dawnsawn dan leh hmachhawn danah erawh kan duhthlanna a ni thung. A tuartu nih ringawt kan thlang thei a, chumi atanga engmaw zir chhuaktu nih kan thlang thei bawk. Pian leh thih thuah hian duh kan thlang thei lo. A inkarah erawh kan duhthlanna a pawimawh thung. Thlan tur pahnih a awm chawk. I nun duh dan chu thlang rawh le.