Ama duh thu ni lem loa chhungte’n an rawn hruai luih deuh roh nen kan inkawm a. Ruihhlo sim duh hmel a pu vak lo. “Drugs-in i nun chu a tibuai viau lo em ni?” ka ti a. “Ti buai lo, ka chhungte a tibuai,” zuk ti mauh a! %%%%%%%%% RUAM HLAUHAWM ZAWK Ruihtheih thil nghei duh hi ka hmu hnem khawp a. An inang lo ve thei khawp. Nghei duh inti em em mai pakhat chu zu ngheina damdawi, zu inpui hlauhawm zet mai hi ka chawh a. A phur surh surh viau a, a hming a sign thlap a. A tawpah chuan, “Krismas-ah a in leh theih tawh ang em?” a’n ti leh bauh mai pek a! Kan nun hman mek hi kan tan a that lohna hriat si loh chuan nun thlakthleng hi a har khawp mai. Kan thil chin than hian harsatna min thlen loh chuan sim tumna rilru a put hleih theih loh. Mi nun buai vel mai mai avanga mahni nun lo tihdanglam ve ngawt chu har tak a ni dawn reng asin! Nun a tihbuai dan tak tak ngaihtuah thui loh chuan krismas vela ruih leh mai a chakawm tlat a ni. Camping luh dawna ‘last’ la ti talh nun hian ruih hi a la chak em! Nghei duh inti zingah ngheina ei ngam lo, ‘tih leh palh takin,’ tia tih ngam lohna tur damdawi tha hlau zawk tlat te, ruihtheih side effect hlau miah si loa a ngheina tur damdawi side effect hlau leh em em si an awm. Thinlung chhungrila duh rukna a la awm chhung chuan chhuanlam fahrah te te hmangin ‘ex’ te nena ‘renew’ leh a awl tlat thin. Nun tichhetu, hmelma lian, huatthlala ngawih ngawih a ni tih hre chiangtu erawh chuan a then hlen thei khawp. Ka nun a tibuai lo i ti maw? Ruih nawmna leh ruih tur neih theih dan tur i ngaihtuah taimak tluk zet khan a that lohna lam hi ngaihtuah peih la chu i ngaihdan i thlak ngei ang. I hre lo a ni lo, i ngaihtuah ngam lo a nih zawk mah kha. A zunah i uai hneh em a, i pawngpaw tan hlur a, i la ngaizawng em a, i bih chiang duh lo a nih kha.! Inthing harh la, ngaihtuah chiang chin ang aw.. Lehkha phek hlai pui la la, ruihtheih thilin i nun a tihchhiat dan leh harsatna a thlen tawh che kha han ngaihtuah khawm la, ziak thla zel teh le. Ziah tur i hre mang nange? In chhungkua in hlim loh phah hle kha! I pain a hlap hrep phah che kha! I nu thinlung na kha i hmu lo em ni? I sikul kalpui thinte chu officer an ni thuau tawh laiin high school pawh i zawh theih loh phah a ni lawm ni? Miin an hmuhsit che kha! Tuman an biak that peih loh che kha! I bialnu chhungte pawhin an duh loh phah che kha! YMA duty in an hlap che a, lock up leh jail thlengin i fan phah a ni lawm ni? I thin a lian a, i mit a liam a, i thin a sawng tan tawh a ni lawm ni? I kut a vung bur a, i ke a mu chuah chuah a, hri tha lo i vei a, i cher telh telh a, i hriselna a pan hle tawh a ni lawm ni? Ruk i ruk phah a, miin an ring lo che a, zah i hlawh lo a nih kha. In retheih phah a, mi fate a hmasawn zawnga an kal laiin nang chu i hniam tial tial a nih kha! A dang pawh a la tam lutuk. Chuti chung chuan i la tan a, i la sawi mawi a, i nihna i pawm duh lo a, thiam i la inchantir chawp a, i thihchilh dawn ta a ni e. Enge pawi? Duh berte chu kan thihchilh mai ang chu maw le! Mahse i thenrualte hian kan ui em che a, kan ngai em che a, hetiang ngawta i thamral mai hi kan phal lo a, kan han zilh leh ta hram hram thin che a nih hi. Nghei tawh rawh tiin kan innawr sek a. Mahse kan va innawr hlawhchham zing si em! Mahni dinhmun hlauhawmzia hriat loh chuan tumah a pianthar theih loh! Miin sual a nih a inhriatchhuah zet loh chuan chhandamtu hlutna an hriat loh vang alawm, ‘rul thlahte u’ ti bawka kan speaker hoin min au khum leh thin chhan chu! Fapa tlanbo pawh kha ‘vawk chaw ei hial duhna ruamah’ chauh khan alawm a inngaihtuah harh tak kha! Ruihtheih thil hian chu aia ruam hlauhawm zawkah chuan a kai lut che asin! Lehkha pheka i thil ziah kha bangah tar la, i hriat belh apiang ziah belh la, ennawn fo teh. Mahni inthiam chawp tawh lo la. Ruihtheih thil hi sawi mawi tawh suh. I chhungte nun tibuaitu ni loin nangma nun ngei tibuaitu a ni tih hi pawm la. He ‘ruam hlauhawm zawk’ atanga zuang chhuak tur hian insangmar ta che le!