Nupa nun buaiin a nghawng rapthlak tak tak hi hmuh tur a tam khawp mai. Nupaa kan insiam dawn hian thil thui tak ngaihtuah a tul. %%%% LO UIRE LO LA CHU AW! “Ka nu, kan naupan lai khan lo uire lo la chu hetiang hi kan ni bik awm si lo a! Ka hmangaih che a, ka haw bawk si che a,” tia a nu nena an inhmuh tuma hmaichhana a nu a tawng  khum dan a sawi pah chuan nula chu mittui parawl kiang a. A va khawngaihthlak em! A nun beidawng leh khawhar intihhlum tum kha hlawhtling ta se, mahni intihlum nge a nih ang a, a nu thah ni zawk ang? Chutiang thu lungchhiatthlak han hriat ni hi chuan haw veleha nupuite vuak thlawrh mai a chakawm mai dawn alawm maw le! Nu leh pa nun dan dik lo avanga naupang nun keh chhia hi an tam viau ang ka ti! Nupa inlaichinna la lap lutuk leh inneihna thutiam zah lo lutukte avanga naupang mittui tla hi ka hmu ta nual mai. Inneihna hi thil thianghlim, thil tak tak, thil serious em em a ni. Nupa nih hian ken leh kalpui a ngah em em a, puithiam hmaa kan intiam tuk atang hian zirlai phek thar kan keu ni tin a ni mai a, zir belh tur a tam lutuk. Zir belh peih lo apiang an talbuai ni ta maiin ka hria. Mipa leh hmeichhia,thisena inzawmna pawh nei ngai reng reng lo, thlahtu hrang, chhungkaw ze hran daih atanga chawr chhuak, mi hrang daih, mi pahnih ni thin pumkhata han insiam ta hi kan ni a. A harsa reng a ni. Pathian pakhata mi nung pathumte hi pakhat an ni tih thu tluk zeta khirh leh ril a nia! A harsatna tak hi a hlutna chu a ni si! Nupui pasal nei reng chunga ngaihzawng nei an tam an ti teh chawk a! Tak tak ni maw? Uire te hi an tam viau niin an sawi ka ti! Whatsapp-a Mizoram dinhmun tha lo zawnga thlirna thu tawi remkhawm karah, ‘Uire pawh sakeiin a seh seng tawh lo’ tih an ziak tel ka chhiar a. A sakei lam a tlem tawh chu thuhran, a uire pawh chu kan tam ta deuh em ni dawn tak le? Inneihna tam zawk hi chu hmangaihna avang a nih ka ring. Paula te’n “Hmangaihna hi a awm reng ang,” han tihluai mahse mi pakhat laka mihring pakhat hmangaihna hi chuan tawp chin a nei thei pawh a ni mahna! “Ka hmangaih tawh lo a ni,” ti ta hlawl hlawlte pawh ka hria. Mihring hmangaihna hi zawng piang chawp thei, thi leh mai theite pawh a lo nih dawn hi! Uireho hian hmangaih thar an tawngte pawh chu a ni ve mahna le! Miin pakhat kha a hmangaih tawh loh a, pakhat zawk a hmangaih miau si chuan sawi tur a vang deuh tlat! Mahse hei hi ka ngaihtuah :  Hmangaih ngai loh kan hmangaih theih chuan hmangaih tawh sa hmangaih reng dan hi chu a awm ang maw le! A zir theih ang. Zir duh loh leh hmangaih tawh loh tum luih tlat chu thuhran ni se! A lehlam pawh kha hmangaih theih leh hmangaih chakawm taka a awm ve phei chu a ngai ang a. Kan innei ta sa sa, kutsuihin kan intiam ta sa sa, karah fanau an awm ta sa sa, inhmangaihzui zel hi zir tum hlawm tawp mai teh ang u! Uire lo ila, inthen lo ila a tha mai. Naupang thinlung na nghawng kal zel hi a rapthlak thei thin si a. “Fate avangin kan la inthen lo mai mai,” tihte hi tawngkam mawi a ni lem lo. “Fate avangin hlim taka inhmangaih dun kan zir zui zel,” tihte hi a mawi zawk! Tih tak emah chuan hmelchhe ve te tete pawh hian uirena tur zawng ta chiam ila, kan hmu khiah hlawm vek lo’ng maw? Mahse chutiang duh tlat loa thinlung thianghlim nei lui tlat, nupa nun hlim nana invawng fel lui a, fate avanga inngeih zui tum lui tlat, mahni chak zawng aia chhungkaw hlimna dah pawimawh luitute inneihna chu a hlawhtling mai zawk. (Lui tih hi ka dah lui duh vek tlat!) Nu emaw pa emaw zawk chauhin theihtawp chhuah a tawk chuang lo. Two-way traffic a ni tur a ni. “Ka nu, ka pa, lo uire lo la chu hetiang ringawt chu kan ni bik lovang maw le!” tia naupang mittui tla hi hruk hul a harsa em mai! Naupang thinlung tikeh lo turin tan i la tlang nupa zawk teh ang u.