Thihna hneha tho leh tur a nih miau avanga a chet dan kha..
&&&&

HARHFIMA TUARTU ISUA A THO LEH E
Krawsa khenbeh tur, mi sual boral tur, chhanchhuahna hmabak nei tawh hauh lo ten an hmaa tawrh tur chu nep zawka an tawrh chhuah theih nan Jerusalem milian nuhoin zu an lo tulh rui thin a ni awm e! Tichuan an rui chhawlh ang a, an mawl huih ang a, an tha zungzam a chawmawlh chhuih ang a, an na tawrh tur ang angte chu an tuar ziaawm deuh dawn a ni. Zu hian nate hi a chhawk ve deuh a, ngaihtuah a titawi a, mi a ti-at huai ve thei reng si a.
Thufingte 31 : 6 - 7 ah chuan, “Boral dawn tepte chu rakzu pe ula, Mi lungngai chu uain pe rawh u. In sela, a pachhiatna chu theihnghilh se la, A hrehawmzia hre reng lo rawh se,” a lo ti daih reng a. Chumi chang tlawhchhana nuhoin boral mekte chunga khawngaih rawngbawl hna an thawh thin a ni mai thei, krawsa khenbeh tur zu an lo pek hi!
Lal Isua pawh an khenbeh dawn lai khan uain thur, englo kha nena pawlh (drugged wine tia sawina pawh a awm- lu tihai zual chhawlh thei tur a ni ngei ang) chu a in turin an pe ve a. Mahse a hnar tlat! (Mathaia 27:34)
Hnar lo se chu a kut a perek an vuak luh laite khan a thazam a chawmawlh ve ang a, a na lo deuh tur! A kea thir an vuak luh sawk sawk laite khan a tuar a ziaawm ang maw le! Leia mu chunga an kilh lai mah a nat dawn tehlul nen, krawsa inkhai kangin, a kut an kilhnaah khan a taksa rihna zawng zawng kha an uai dawn a nia le! Kraws an han tun lai vel, a ban khura an han sawh lut chawrh nghawr dawt nat turzia kha aw! Ruih chhalh theihna zu kha lo in ve ta zawk se chu a tuar a ziaawm hret mai thei asin! Darkar ruk zet zangphara uai reng mai hrehawm turzia kha! Lo ‘peg’ ve sek se chu a ziaawm mahna!
Mahse Isua’n zu kha a hnar tlat si. Beiseina nei tawh miah lo, boral hlen hmiah turte in tur kha a in ve a rem lo a ni ngei ang. Beisei bo tawhte tan pawha beiseina nung ni tura tho leh tur a ni miau a!
Chu mai a ni lo. Mihringte hmangaihna avanga an tuar ai a tuarsak dawn lai khan rilru fima tawrh a thlang a ni ngei ang. A tawrh tur chu a nat ang angin, a firin, pawlh dal lohin a tuar tur a ni. Thihna rapthlak tak chu a rapthlak ang angin, luhai leh hriatna chawmawlh hauh loin, rilru fimin tuar a duh. I tan leh ka tana a tawrh tur hi rui chunga paltlang mai mai chi a ni tlat lo. A tawrh tur hi thil tak tak, thil serious, khawvel tlanna thil a ni tlat. Rui pheng phuanga paltlang chi a ni hleinem!
Isua tuarna hi a va hlu em! Hmangaihtu chuan hmangaihte tana tawrh ngai chu a nat ang angin a tuar huam thin a nih chu. Isua hi tunlai tawng takin ‘ A pa rem rem’ em asin!
Harhfima a tuar chu a na em a, tlin rei chi a ni lo. “A kin ta!” tiin a thlarau a thlah ta a. A thi chiang tih Rom sipaiin a naka feia chhunin an finfiah vek! Pilata pawhin a hria. Pa ropui pahnih Josefa leh Nikodema ten a ruang an hlawm lai khan a thi tih an chiang a, thlanah zalhin lung an lum hnan thlap a. Thawh leh a tum thu sawi a awmsa avangin thlan chu sipaiin an veng maw le!
Mahse ven hneh rual a ni lo. Boral hlen tur a nih loh miau avanga zu hnartu, mihringte min hmangaih avanga a tuar tur zawng zawng harhfima tuar a, kraws lera thi a, thlana an zalh ngei, thi chiang em em kha thihna hnehin a tho leh ta tak tak asin!
Thihna ngei a ngam tawh,
Chhandamtu Isuan;
Nunna kawng a ni tawh,
Lalpa Isua.