Pafa hmangaihna inzirtirna chanchin ropui tak hi tlangzarh ka chak tlat! &&&& SAWi aia chiang Nu leh pain an hmangaih lo nia inhria thalai ka hmu hnem hle a. Nu leh pate’n fate an hmangaih loh theih hi ka ring ngai lo. Zawt vek pawh ni ila, “Hmangaih e,” an ti vek ang. Mahse thalaite rilru erawh a dang lawi si! Nu leh pa laka vui tleirawlte leh fate avanga rilru hah nu leh pate buaipuia ka phili nilen ni takin he thu ngaihnawm tak hi whatsapp group pakhatah a lo thleng a. Chu thu ngaihnawm, HMANGAIHNA DIK tih ziaktu chu Lalbiakdika Hmar @ Padika, Mission Veng Kohhran upa min, Upa Chhawnvunga fapa a ni. Hei hi a ni, thawnthu ngaihnawm chu : “Tun Pathianni zan khan, kohhran zaipawl hla ka zirtir laiin, kan hla zir tibuai lek lek khawpin ruah leh thlipui na tak a rawn thawk a. Chutih lai chuan , zan dar 10 a ri thuak tawh, Hall kawngka rawn inhawng rawk rawk karah ka pa hmanhmawh hmel taka rawn lut chu ka va hmu hlawl mai! Hemi hma lawk hian kan zaipawl member pakhat chu a nu a that loh thut avangin a hla zir lai an rawn ko haw bawk nen, ka rilru te te chuan, “Kan chhungkuaah harsatna a awm em ni ang aw?” tiin ka thin a phu dep dep a. Mahse ka pa chuan sound control-na bulah nihliap pakhat a dah ka hmuh chuan ka hrethiam ta! He a fa, patling thankin tawh, nupui fanau pawh nei tawh, mahni kea ding thei tura a enkawl seilen tawh, ruahsur leh thlipui aia tawhkhirh harsatna tam takin a nuai ve tawh hi ruah mal khat lek pawn a tihhuh phal loin kha nihliap kha hla zir bana ka khum haw atan a rawn dah a lo ni. Kum lamah chuan Sam ziaktuin mihring dam hun chhung a sawi aia tam a hmang mek. Zan a rei tawh a, a hah loa a mut a chhuak lo pawh a ni bik lo, mahse hmangaihna vang a ni. Chumai a la ni hleinem, a hnu deuhah a nihliap dah tawh chu a aia nihliap lianin a rawn thlak leh lai ka hmu bawk. Ka thianpa, tet te atanga unau ang maia ka en nen kan haw dun dawn tih a hria a, hul thlapa in kan thlen ve ve a duh a ni. Pa tam tak, fate aia thil dang hmangaih zawk tlat te, mahni fate ngei pawh pawngsual duh khawpa rilru piangsual chhungkaw pa an awm laia hetiang pa ka nei hi ka va lawm em! Lal Isuan, “ Pain a fate a hmangaih angin ka hmangaih che u hi,” a tih a, heta pa hmangaihna a sawi ang hi ka pa hmangaihna chu a lo ni ngei mai. Ka pa ka lawm e! Nagmah anga fate hmangaih thei ni turin tan ka la sauh sauh ang.” A ngaihnawm ka va ti em! He mite pafa hi zahna chibai ka buk e. Nu leh paten fate zilhhauh pahin kan hmangaihzia kan sawi dup dup fo a, mahse fate thinlung a tawk che mang lo fo. Khami zan thlipui tleh leh tek tla karah khan, kha pa ropui khan tawngkam khat mahin a fapa a hmangaih thu a sawi ri lo. Mahse a fapa thinlung kha chhunin a awm tlat! Pain fa a hmangaih dan turah piantharna changin a inhlan zui thlap bawk! “Ka hmangaih che a, i tan si-ar lak pawh ka huam, ka hmangaihna che hi engmahin a dal lo ang..zaninah pawh ka lo leng ngei ngei ang.. ruah a sur loh chuan!” titu hmangaihna hian zawhna a siam thin alawm! Kawlphe leh thlipui karah pawh hmangaihna chuan ngawi rengin a chettir mai zawk a ni. Hmangaihna hi sawi duah aia a taka lantira chiang chi a ni ngai e.