“Min ring chuang lo a, ka rilru a na a, ka rui leh law law mai,” an ti fo nia! &&&& AN AWIH NGEI TUL HUN A LA AWM DAWN Ama chanchin a ziahna lehkhabu Days of Grace-ah chuan tennis khel thiam hmingthang Arthur Ashe chuan kum 17 a nih laia a thil tawn chanchin a ziak a. West Virginia-a tournament an khelh tuma thil thleng a ni. Chu tournament-a mihang inkhel awmchhun a ni lehpek bawk a. Zan khat chu tleirawl thenkhat hian infiam mite thlen in pakhat chu an suasam chiam a, an tichhe nasa hle mai a. Arthur Ashe-a tih anga sawi turin an inthurual thap mai a ni awm e. Chu thil thleng chu chanchinbu lamah te hial a lang zui ta bawk si a. Arthur-a chuan han pha ngial mah se tleirawl rual lam chu an tangrual ruh ve tlat bawk si a. A hrehawm a ti em em mai a. Arthur-a hlauh ber zawk phei chu a pain a lo hriat hunah eng nge a sawi ang a, engtin nge a tih ang tih a ni. A tawpah chuan hreh takchungin a pa chu biakhlatnain a be hmasa ta nge nge a. A pa chuan thil thleng chu a lo hre tawh nghe nghe a. Lungngai aw ki hniam vawt raih mai hian a pa chuan zawhna pakhat chiah a zawt a. “Arthur Junior, ka hriat duh zawng chu.. I tih a ni em?” a ti a. Arthur-a chuan, “Aih, ka pa, ka tih a ni lo,” a ti mai a. A pa chuan vawikhatmah a zawt nawn leh tawh lo. Chumi tum chuan Arthur-a chuan dawt sawi ngai lo tura zirtir thin a nih chhan chu a hre chiang ta uar uar a. Engtikniah emaw chuan a thil sawi chu miin an awih ngei tul hun a awm dawn a, chumi hun chu tun hun hi a ni tih a hre thiam chiang khawp mai. Tun hma atangin a pa rin a hlawh tawh miau a, chumi tum pawh chuan a thusawi chu a pain a awih tih a hre chiang khawp mai. A pa berin a thusawi a awih avang chuan hlauh tur dang a nei tawh lo. Chumi ni atang chuan dikna nunpui a tum nghet lehzual ta a ni. Drug addict ka enkawl thin a. An han nghei ve renrawn a, an rawn ti leh thin a. An chhuanlam tam tak chu, “Min ring chuang lo a, ka rilru a na a, ka rui leh law law mai,” tih zuk ni fo a! Drugs an tih laiin dawt an sawi a, mi an bum a, thil sual an lo ti hnem tawh a. Nun han siam that ve an tum pawhin miin rin mai harsa an ti tawh thin reng a ni. Dawt sawi fo thinte hian thu dik an sawi pawhin awihsak an har fu. Esopa thawnthu fingah kan zir thin kha. Naupang pakhatin beram a veng a, beram seh tum chinghnia an lo kal miah loh laiin, “Chinghnia! Chinghnia!” tiin a au chiam thin a. Thu tak emaw tia amah tanpui tuma mipui lo tlan khawm vel thin chu a lo nuihzat thin a, a hlimawm riauin a hria a ni awm e. Ni khat chu chinghnia a lo kal ta tak tak a, mangangin a au chiam chiam a; mahse, miin dawt bawk a sawi leh a nih an ring a, engahmah an ngaihsak duh ta lo va, Chinghnia chuan a beram chu a sehsak ta teuh a nih kha. Dawt sawi hrat takte pawh hian engtik niah emawchuan thu dik an sawi ni chu a awm ngei ang. Miin kan thu sawi an rin ngei a ngaih hun a la awm dawn. Rin kan hlawh ang em le? Mi min rinna hi hlawhchhuah chi a ni. Hlawhchhuah dan kawng khat chauh a awm. Dik taka nun a ni mai. Mi kan rin takte kan rin loh taka an awm hian rin leh an har khawp. Mi rinna hloh hi a pawi thui thei. Inrintir leh tur chuan hun rei fe dik taka nun phawt a ngai. Thu dik kan sawi ve tumah pawh miin an awih tlat loh chuan buaithlak khawp ang. “Min ring mai rawh,”ti tun tun kher lo pawha kan thusawi an awih ngei tul hun a la awm dawn si a.