Chhul leh rilru hi a awmna ainhlat tehlul nen, kan sawi zawm fo mai.
&&&&&&&

CHHUL THA LO LEH RILRU BUAI
A chhul hi min paihsak mai teh u, a buai leh zel” tih te, “Ka pu, a chhul a tha lo a, a buai, kan rawn hruai e,” tihte hi kan tawng fo a.Chhul tha lo leh rilru buai hi a inzawm tlatinkan hria a, chhul paihin emaw, chhul lam enkawl that khan an dam an beisei thin. Chhul hrisel hi kan duh khawp a, chhul chaknate hi kan lawm a nia!! A tha, a pawi lo. Lo hrisel hrim hrim se a tha e. Mahse rilru lam nen hian a inzawm em?
Chhul leh rilru lam natna sawi zawm hi thil thar a ni lem lo. Mizo chang kan ni lo e. Tun hma atang tawhin hnam fing hmasa ho pawhin an lo suih zawm daih tawh a. Rilru buai, mi a, kan tih mai ai mahin, hmeichhe hlauthawng vak vak thin te, a chhan tak hmuhchuah tur awm si loa taksa lam natna chi hrang hrang nei te, khawng leh thawhah vak vak thin te leh zeng ang mai taksa che tha thei lote ho hi hmanlai damdawi thiam hmasa ho pawhin chhul vang a nih an ring ve a. A natna hming atan pawh Hysteria an ti a, Hystera tih, chhul sawina tawngkam atanga lo chhuak a ni. Hysteria tih chu Mizo tawng chuan ‘chhul vak vel’ tihna a ni.
An rindan chuan taksa chhungah hian chhul khawhar chu mipa chi zawngin a vak kual ta a, a thlen chinzel kha va tibuaiin, a kalna azirin an natna kha a lang chhuak thin an ti. Hmeichhe thianghlim leh hmeithai ten an nei duh bik niin an sawi reng a! A enkawlna lam pawhin an tum ber chu chhul chu vak vel loin, a awmna hmun pangngaia awmtir tumna lam a ni a. Taksa chunglamah a rawn chho thui viaua an ngaih chuan thil rimchhe takan hnim tir a, chhul chu a awmna ngaiah a let thla leh zul zul theiah an ngai a. A chang leh serh bulah thil rimtui deuhte chhawp hnaiin chhul chu serh bulah, a awmna turah an thlem thla leh thei niin an ngai.Chhul khawhar, mipa mamawh vanga chutianga vak vel ruai chu nia an rin avangin pasal neihte pawh a damdawi tha nia ngaiin an lo chawh thin. Pasal neiha hlim tak leh lungawi taka nupatna hman hian rilru lam a tihahdam bawk si a, a ngeih hmel ve fu bawk a ni!!
Mahse mipa zingah te, hmeichhe pasal nei laiahte pawh chutiang Hysteriaang natna chu a lo awm ve zel tak avangin ‘chhul theory’ chu an paih ta hret hret a, tunah chuan he natna hming pawh hi rilru lam natna hming atangin an paih daih tawh a ni. Psychiatrist ten an hmang ngai tawh lo.
Mizorama hriselna lam enkawltu tam tak pawh hian hmeichhe thawhah vak vak, nikhaw hre mang lo awm taka khawng vak vak ho kha “A hys a nih kha,” tiin na der, ti der, engemaw beisei deuhah kan ngai deuh thin a. Anmahni tihharh nana ben pawp te, hrawk hrep te leh thil rimchhe tak hnimtirte pawh kan ching ve.Keini doctor zir zawh hlim, hman ni lawk tak tak pawh khan hetiang hian kan la ti fo mai. Han ben pawp emaw, han hrawk hrep emaw, thil rimchhe takhan hnimtirte khan an lo harh ve kawk fo bawk si a, tifuh leh thiam inti takin kan hawtir nal nal thin. Harhin an haw ngei a, mahse an harsatna tak chu kan lo enkawl si lo.
Chhul leh rilru buai kan sawi zawm fo chhan hi rilru buai leh rilru lam natna dang eng eng emaw hi hmeichhiaah a tam zawk avang te, an thi neih a buai tel duh phian bawk si avangte, thi neih leh nau neih zawh hlimahte rilru lam natna hi a lo awm ve fo avangte a ni. A nih hmel ve em alawm!
Mahse hei hi chiang takin hriat tur a ni. Chhul tha lo leh rilru natna hi a inzawmhranpa lo e. Chhul hi hniam takah, khutah a awm a, rilru hi sang takah, khitah, thluakah a awm aw!