Mi tan ka buai a, ka phili a, ka intinelawm vel a. Mahse min mamawh em emtu, ka mawhphurhna lian ber mai tan erawh hun ka nei lo fo si! %%%%%%%%% “HAWH, IN-BARBIE ANG” Chumi ni zet chu ka buai kher mai. Tuk danga damlo en tur nei vak lem lo kha chumi tuk kher chu ka rak vei phian a. Dar 9 a rik hnaih tawh avanga rilru a hmanhmawh ruk tawh viau laiin, “Kan mangang em mai, min en hram teh,’ tia min han ngen lui tlat han kalsan chu rilru a nuam si lo. ‘Daktawrte hi an clinic ah rei tak an awm a, Damdawi In lam an ngaihsak lo,’ tihte hi mipui phunna a nih fo avangin Ofis kal tlai hrat tak tan pawh clinic-a cham rei hi a nuam lem lo a. Sawrkar ta kan nih avangin sawrkar hun tibuai khawpa lo inham buaite kan hlau ve deuh bawk si. Chu rilru nuam lo pahnih insual karah chuan han vin deuh maite pawh hi awl ve tak a ni a. Mahse insangmarin ka’n intinelawm lui a, ka en hman ta hram a! Chhunah Damdawi In lam hna thawh zawh lamah sawrkar meeting pawimawh a awm zui a. Buai lutuk nilen hi a hahthlak em em laiin ka inti polite lui tluanchhuak zel thei a. Sana ka’n en a. Ka stress management atana ka ngaihpawimawh em em ‘inkhelh’ hman loh hlauin rilru a hmanhmawh ru viau tawh a. Ka inkhelh loh hi chuan chau tlata ka inhriat thin miau avangin baklengin ka tlan haw a, hah sawi miah loin ka zuk inkhel hman hram a. Inkhelh zawhah thlan tla phungin damlo ka en leh a. Nilai zan a nih avangin inkhawm chu ‘a mawi’ a, inkhawm ngei a tul bawk si! Inah pawh haw hman loin inkhawmna thawmhnaw ka chah a, chaw pawh ei loin thlan rim nen ka inkhawm leh hram a. Chumi ni zet chu ka hah a, titha pawh ka inti viau! Inkhawm bang ka haw chu ka fanuin, “A pa, hawh, in-Barbie ang,” a’n lo ti cheng mai pek a nih kha! Nilenga intihawihhawm lui khan ka tlin ta lo va, ka’n vin ta thawt mai a nih chu! Ka fanu chu a kimki ta a, a men ta piai piai mai a. Nilengin ka buai a, ka hah em em a, hahdam mai maite ka chak ve tawh a, inkhualtelem mai mai chu ka peih tawh lo. In-Barbie mai mai a ho lutuk! Damlo tan hun ka nei a, sawrkar tan hun ka nei a, inkhelh nan hun ka nei a, kohhran tan hun ka nei a, ka fanu min lo ngai em emtu tan chuan hun ka nei ve ta lo a nih chu! Damlo tan ka nui lui thei a, mi dang lakah ka intinelawm der peih a, thiante zingah ka nui uar uar a, mahse ka fanu tan ka insang mar peih ta lo a nih chu! Ka fanu khan ka awl hun a lo chang ve ngar ngar asin! Amah nena kan in-barbie ve hun tur khan ka eng hun dang mah kha a ei hek dawn lah a ni bawk si lo. Ka damlote tana ka hun pek tur a tibuai lo a, ka sawrkar hna pawh a tibuai hek lo. Ka in-barbie-pui avangin kohhran lama ka tihtur ka tih loh phah chuang dawn lo bawk a, ka inkhelh lah a tibuai der si lo. Mahse ka peih ta lo a nih chu! Ka hun dang zawng zawng pawh ei hek dawn ta pawh nise thlan tur zawk tak a nih laiin maw! Ka inthing harh a, “Lo kal rawh, Mate, in-barbie ila,” ka ti leh ta zawk a. Naupang rilru tha chuan titau hauh loin min la in-barbie-pui duh zuk nia!