Hualtu Keite kha ka ngaisang thin a, Hualtu tlangvalin zirlai thar min pe thung! &&&&&& HUALTU TLANGVAL Hualtu tlangval nen kan inkawm a. Hrisel lohna eng emaw a nei a, daktawr hrang hrang a rawn kual fe hnuah ka hnen a rawn thleng ve hlawl mai a. Hualtu khua a nih thu an sawi chuan, “Hualtu Keite i hria em?” ka’n ti thla ngawt a. Hualtu khua hian ka lung a tileng hranpa ve ringawt mai a nih chu. Ka la kal hauh lo a, a awmna tak pawh ka hre chiang lo. He khaw hming ka hriat apiang hian ka rilruah thil pakhat a lut ziah. ‘Hualtu Keite’ tih hi. Kan tleirawl chhuah tirh laia infiamna lar tak chu inchai a ni. Lalkulha te, Tlangsiama te, Chalchungnunga te kha inchai chak, kan ngaisang em em an ni. Anni hma deuha inchai chak an sawi thin ka hriat rengte chu Sakawra leh Chhundenga an ni. Chanmari venga kan awm laia kan kawmthlangah khan Pu Chhundenga chu a awm a. A tute nen kan inkawm thin. Hualtu khawchhuak inchai chak Chhundenga kha a hming lemah ‘Hualtu Keite’ an ti thin a ni awm e. A chanchin sawi thui tur chu ka hre hauh lo. Sakawra nen an inchai thute chu thawnthu sawiin an sawi thin. ‘Hualtu Keite’ tih hming lem lo invuah kha a changkang hle. Mike Tyson-a hming atana ‘Iron Mike Tyson’ han tihte nen a inhlat lo tlat. Hualtu tlangval ka hmuh khan, “Hualtu Keite i hria em?” ka’n ti ngawt kha a nia. Mahse he Hualtu tlangval hian Hualtu khaw chanchin ngaihnawm dang min hrilh ta zawk a.A hriselna a that tawk loh avangin a inentir fo a. Dam loh hrehawm a tih thu mai bakah zahthlak a tih thute a sawi a. “Dam loh chu a zahthlak hranpa em ni? I thiam loh pawh a ni si lo va..” ka ti a. “Tlangval engmah thawk thei loa awm hi a zahthlak alawm. Kan khuaah chuan hnathawk lova chhuna tlangval ina awm hi a zahthlak lutuk,” zuk ti a. Hualtu Keite kha hmana ka ngaihsan, ka thinlunga Hualtu khaw ngaih lunglen tuhtu a ni a. He Hualtu Tlangval hian zirlai thar min pe ta thung a nih hi. Hualtu khuaah chuan, tlangval ni ve si, hnathawk loa chhuna ina awm chu a zahthlak a nih chu! Dam loh vang pawh ni se, Hualtu tlangval chuan, hnathawk lova ina awm chu a zak tlat! Hualtu khawho rilru chu a va changkang em! Kei, hnathawk lova awm mai mai nuam ti, mi thawhchhuahsa ei leh ina hahdam taka nilenga TV leh phone nena inawmtlei thin hi min tizak ta hle a nih hi. Nu leh pain an thawhchhuaha min chawm zawh thote chuan hnathawh ve kher pawh tul ti lo, engmah thawk loa chhun pachanga len mai mai zahthlak tih hre miah lo chu ka zak ta a. Engmah thawh loh hi a lo zahthlak a nih chu. Keimah anga tlangval dam sen lul si, engmah thawk lova chhuna tei mai mai hi an awm ve nual ang a! Mizo tlangvalte hian ‘hnathawk lova chhuna awm mai mai chu a zahthlak’ tih nachang hriain, kan phak tawk leh theih tawk theuh thawk ta suau suau mai ila kan ram hian hma a sawn chak viau lo’ng maw? Ka ngaihtuah vang vang hian, nilenga hna ka thawh a, tangkai taka hun ka hman ni apiang kha ka hlim ni ber a lo ni ta zelin ka hria. Hualtu tlangvalho chu an hlim viau ang a! Tunlaia an sawi sek Depression te hi an nei ve mang lo ang ka ti! Hualtu Tlangval thusawi hian mizo thlaite min kai harh hlawm teh se la aw!