Nupa mangang an lo tlan fo! An hrin loh fa duat, an hmangaih em em si chu tute emawin he thu hi an lo hrilh thin a.. &&&& “AN FA PAWH I NI LO” Hmanah Thenawm Ninawm tih thupui hmangin heti hian ka Titi tawh : Fa nei thei lo thenkhatin mi fa an la a. Pathian remruat remchang tak a ni a. Fa lak tak tak, an nu leh paten an la hrilh loh, hrilh pawh an tum tho, hun remchang leh a hun dik ngaihtuaha an buai ruk em em laia lo tikhawlhkham thinte an awm! Thenawm ninawm bengvarin, “An fa tak i ni hleinem..” an lo tih hmanhmawh avanga chhungkaw buai ka hmu fo. Thil hre thei ber nih chak, engemaw sawi chhuaktu nihte hi kan chak a ni awm asin! Kan chhungkua a nghawng pawi dawn lem loh avanga duh duh sawi mai maite hi a pawi thin. Ka’n titi zui leh deuh teh ang. Miin fa an neih loh avangin tu fa emaw an la a, inhmangaih tawna hlim em ema an awmho laiin mi thenkhatin an chhungkaw boruak kan lo tihchhiat pui pek thin a nih chu! An fa chuan ‘lak’ a ni tih inhre lo se, inhmangaih takin awm kumkhua se an duh tehlul vei nen maw! Mahse thudik puangtu nih hi ropui riauin kan hria ni maw! Thudik zawng zawng hi puan vek kher a ngai lo tih hre leh bawk si lo! Naupang baihvai thenkhat, nu leh pa thihsan emaw, chhungkaw harsatna eng emaw avanga enkawltu tur mumal nei lote chu mi thenkhatin an fa atan an la bawk a. Hmangaihna mawi lutuk a ni. Intihhmuh atan pawh a tha. “Naupang pakhat i lak avangin khawvel a danglam lo a ni thei. Mahse, naupang tan erawh a khawvel a danglam vek thei thung ang,” tia thahnemngai em ema mi thahnemngaite an au laiin, chu khawvel danglam mek lo chawkbuai zawnga tawngkam thlahdah thin, intifing si, mawl si kan awm thin hi a pawi a ni. Kan inrawlh lohna tura inrawlh hi kan tam lutuk a. Vantlang leh ram tan, thenawmte leh mi dang tana thil tha tur zawkah thahnemngaia kan lo inrawlh ve a nih lem loh hi chuan ngawih hi a finthlak fo. Mi huat hlawhna tur a nih dawn pawhin a chhan a that phawt chuan tawng hun a awm ngai e. Chutiang ni lem lo, mi chhungkaw boruak tichhe zawnga lo inrawlh ve fo mai hi thenawm ninawm nihna mai a ni! Miin fa an lak hian hlauhthawn lian tak an nei sa a. An fa chu thudik hrilh pawh an duh. Mahse hrilh hun tur te, hrilh dan turte an thiam mai rih loh vangin an nghak a. Hmangaihtuin an hmangaihte rilru hliam lo thei ang ber tura tihdan tur an ngaihtuah ve reuh reuh laia mi rilru tina zawng a, “An fa pawh i ni lo,” lo tih ve thawr zel mai hi chu sim a hun tak zet! Mi fate hi lo hmangaihpui harsa kan ti a nih pawhin an rilru lo va hliam kher a ngai lo. Kan lo duatpui thei lo a nih pawhin lo va sawisak kher tur a ni lo. Mi chhungkua kan tanpui thei lo a nih pawhin lo va chawhbuai kher a tul lo e. Miin, “Kan fa a ni e,” an tih chuan, “An fa pawh i ni lo,” tiin bengvar lo chhuah duh lem lo teh ang u. An fa lak hi an fa dik tak an ni asin!