William Oak-a lehkhabu, “For Love or Nothing” tih bua mi tawite la chhuak teh ang. &&&&&& ZIAK LOH PHEK Tlai khat chu tleirawl pakhat hi tuipui kamah kelawngin a leng vel a. Ni a tla fel tawhna a a la engsut mai a. A kal lai chu dingin a inher a, tuipui kam tiauvuta a kehniak chu thlir let a’n tum a. Mahse, tuipui rawn fawn hlep hlep chuan a lo len bo vek tawh mai a. Kal leh zel turin a inher a. A hmaah chuan pitar, kawmawl sin hlen chunga meilum aia lo thu reng mai hi a hmu thut mai a, a phu zawk mai a. Chu pitar chuan savun kawm nei lehkhabu hi a lo keu melh melh a. A va hnaih a, “Khawi atangin nge i lo kal a? Tun maiah khan ka hmu miah si lo che a. Mei lah chu i lo tuah alh hlet hlet hman tawh bawk si a,” tiin a’n zawt a. A zawhna pawh chhang ta lo chuan pitar chuan, “Thu teh, ka nau, thil entir tur che ka nei,” a lo ti dam dap a. Tim deuh tak chung hian meilum bulah chuan tleirawlte chu a thu ve ta a. Pitar chuan lehkhabu chu a lo pe a. Nula chuan a la a, a phek hmasa ber atang chuan a’n keu chho ta a. A naupan lai atanga tun thlenga ama chanchin zawng zawng lo inziak vek mai a hmuh chuan mak a ti em em mai a. Vawiin tlaia tuipui kama pitar meilum ai nena an intawn lai chu a chhiar thleng ta a. Chumi dawt chiah phek an keu leh chuan a lo ruak vek a, engmah a inziak tawh lo. Phek dawt a’n keu leh a, a keu belh leh sawk sawk a; mahse, a ruak vek tawh! A mangang ta hle mai a, pitar hnenah chuan, “Zaninah hian ka nunna hi a tawp dawn ta tihna em ni?” tiin thlaphang takin a zawt ta chul mai a. “Ni lo e, ka nau. Zaninah hian i nunna a intan chiah tihna zawk maw le!” tih pahin lehkhabu chu tleirawl kut atang chuan a la let a. Lehkhabu chu a keu a, thuziak awm tawhna phekte chu a mal tetein a pawtthla a, meiah chuan a rawh ta zel a. A tawpah chuan engmah la inziah lohna phek ruak zawng chauh chu an awm ta a. Nula hnena lehkhabu pek let leh pah chuan, “En teh, tuifawnin i kehniak a len bo zel ang mai khan i hun kal tawhte chu an liam tawh a, an lo let leh tawh dawn lo. I hun neih tak tak chu tuna mi chiah zel hi a nia sin. “I hun tawn thar apiang mai hi i nun thar bul intanna zel a nia sin. Nuam ti taka chen mai tur a ni. Hetiang hun ang chiah hi vawikhatmah i tawng leh ngai dawn tawh si lo a. I hun hman laia i hriatreng tura pawimawh ber erawh chu, ni thar lo chhuak hian tu emaw hmangaihna hun tha a pe leh che a ni tih hi. Chumi chu i tawng leh tawh kher awm si lo a! “I naktuk lam hun tur chungchang thu-ah chuan, i duh anga i siam theih nan izalen e. Ziahfel a la ni lo, i kut a ni e,” a ti ta a. A sawizawh chuan pitar chu a ding a, mak tak maia a lo lang hlawl ang khan zan thimthamah chuan a kal bo leh ta daih a. Nimin kha a zo tawh a, naktuka lo la thleng lo. Vawiina i awm dan hian naktuka i nun dan tur a hril thung dawn a ni.