Engkimah hian zirlai zir tur a lo awm vek mai! &&&&&& KHUANGCHERA PUK LESSON Mission Veng Tleirawl Inkhawmte chuan November 19, 2016 khan outing neiin Khuangchera Puk leh Reiek Tlang kan tlawh a. Zirlai zir chhuah ka nei nual mai. Khuangchera Pukah chuan Gate an lo siam tawh a. (1985-a ka luh khan gate a la awm lo.) A luh mante pawh a lo awm tawh a. Lut zat chiah kan hriat loh avangin YMA hruatu fel tak pakhat hnenah khan ka rin tawk vel pawisa ka pe mai a. Receipt phei chu min pe lem hlei lova. A lut duh zawng an pil tak vang vang hnu chuan gate chu kalh tur a ni. Kan kalh hma chuan chhung lam atangin min rawn au a, “Pakhat a lo chhuak leh duh,” an rawn ti a. Azaitei a lo chhuak leh hlawl mai a. A chhungah a thawpik a ni. A demawm lem loh. Mahni tihtheih zawng a awm vek. Ngam loh zawng te, theih loh zawngte kan nei thin. Ani pawh hi zaithiam, stage-ah chuan thawchham miah lo, huaisen tak a ni. Puk a luh tlang ngam loh avangin a nun a buai zui miah lo a, Reiek Tlang velah nilengin a hlim zui em em tho. Mi pakhat hian engkim a thiam theih loh a, engkim a tih theih loh a, engkim a hneh vek theih loh. Thil pakhata kan hlawhchham hian kawng engkima hlawhchham kan ni lo a, kawng pakhat kan zawh chhuah theih loh hian ngui nilen tur a ni chuang lo. Khawvel tawp ta ang maia indawm kun hauh tur a ni lo. Hlimna dang tawn thar tur hi nunah hian a tam lutuk. Ka zir chhuah pakhatna chu. A lutho chu an reh tak vang vang hnu chuan gate kan kalh a, kan chhohsan ta daih a. Lut chhuak leh ngam si lo, lo let leh duh awm ta se a buaithlak viau ang. Luh chhuah ngei ngei tur a ni tawh mai. A nih loh chuan hrehawm taka tan reng a ngai dawn a ni mai. Puk kawngka lama lo chhuah lehna chu kalh tlat a ni tawh a, hawngtu an awm dawn tawh lo. Mihring nunah pawh hian thil kan tih tawh, kan luh chilh tawh chu chhuahsan a rem tawh lo fo a, duh mah ila a chhuah theih mai tawh loh fo. Thil reng reng hi kan luhchilh thui hma hian ngaihtuahna fim tak nena thutlukna siam a finthlak dawn fo reng a ni. Kan luhchilh tur ‘Puk’ kawngkaa inngaihtuah fel hmasak emaw, kan thlen thui tak tak hmaa inlamlet nachang hriat thuai thin hi a fuh viau. Ka hriat chhuah pahnihna. Puk lut chhuakte chu a kotlangah kan lo hmuak a. A then chu kan lo khai chhuak vel a. Puk luh chu nuam an ti em tih te ka zawt zui hlawm a. Min chhanna chu a inang lo thei fu mai. Moimoii chuan, “ Nuam ka ti a, ka hlim bawk a, ka khup a na bawk!” a ti a. Sawma chuan, “Lut leh ila,” tih bak sawi thui tur a hre map lo! Rinpuia chuan, “ Mizoten pasaltha kan neih zinga kan chhuan ber pawl Khuangchera hnungzuia Khuangchera puk ka lut chhuak thei kha vannei ka inti hle a. Kan pasalthate  experience ang ka experience ve thei kha a nawm dan a dang khawp mai. Mizo ka ni inti tawh phawt chuan kan thih hmain vawi khat tal tlawh i tum ang u,” a tih chiam chiam laiin Mois-a chuan, “Nuam ka ti, lut leh ang u,” a ti mai a. Mi tam zawkin “Nuam” an tih laiin mi thenkhat chuan (an hming sawi lo mai ang), “Nuam lo!” “A hrehawm lutuk!” “Ka lut duh tawh teuh lo!” an ti thung. Puk pakhat, a kikawi dan leh a thim dan te, a rim chhiat dan leh a pik dan inang renga lut vek site ngaihdan chu a inang lo khawp mai! A puk chu a ngai reng, a lutte rilru zawk hi a ni danglam ta chu! Thil reng reng hi a tawngtu rilru azir hian kan dawnsawn dan a lo inang lo thei hle dawn a ni. Thenkhatin ngaihzawng thente chu chaw ei tui loh phah nan pawha an hman loh laiin thenkhatin thihpui an lo tum ve mek a nih tak kha! Indem ngawt chi a ni lem lo mai thei. Mahse kan rilru azir hian kan thil tawn leh hriatte hi kan inhneh hleih hle dawn zawng a lo nih hi. Nunah hian tawn tur a tam ropui si. Kan thil tawn lam aiin a tawngtu rilru lam hi a lo pawimawh ber mai tih hi khami nia Khuangchera Puk chhehvela ka zir thar pathumna chu a ni.