Tleirawl sexy ho ka fuihna lo chhiar vetu hmeichhe doctor thiam tak Dr. Mahruaii thahnemngaiin (helam hi an tawng tam si a) ‘mipa lam pawh..mi pahnih thil tih a ni si a,” tiin min rawn fuihpawrh a. Ka lo ruahman lawk ka’n phawrh zui ang e. &&&&&& “YOU GIVE LOVE A BAD NAME” Tleirawl leh nula mangang tam tak ka kawmna atanga ka thin tirimtu, tlangval huatthlala, hmangaihna tihmingchhe thintu chi hnih ka hria. E! Chi thum pawh a ni thei e! A chi khatna chu : Nula ngaih phet tum tlangval, an hlawhtlin veleha tlansan leh si hi. Tlangval duhtak, ‘Di nei lo Pawla’n a sai an ti’ tih culture kha hunin a liampui tawh asin! Mahse, hmangaihna chhuanlama nula kar I la ching a, ‘hmangaihna chu a inhlan famkim thin’ tih thu changchawiin tleirawl lungmawl bumin a thianghlimna chu tihchhiat phet i tum a. Hmangaihna leh sex chu kalkawp ngei tura ngai thin hmeichhe rilru tha chuan a awih ta mai a. Mipa thinlungah hian sex leh hmangaihna hi a kal hrang thei tih a hre der si lo. A mawlna chu remchangah i la a, a hmangaihna che chu nawmsip bawl nan i hmang hreh loa maw? Hmangaih belh sawt tura i insawi tlat avang khan tleirawl hmangaihna thlahlel chuan a ringhlel phal ta lo che a. In lo khati ta kha ni a. Mahse ka rei maw! I duh i hmu ta cheng a, i tum i hlawhtling ta ngei a, hmangaih sawt tura intiam si khan i hlat ta hret hret si maw? Chenna ngai loh ram thar fang leh turin hnutiang i chhawn leh si maw? Ui puar koh an sawi ang maiin i kal bo ta nal nal mai a nih kha! Hei zawng a dik mawlh lo. A thianghlimna, a hmangaih tana a lei khek chu hmangaihna avangin a hlan che asin! I tana a inhlanna hlutzia hrethiam lo tawk vel hian i mawl a, hmeichhe thianghlim tichhe duh tawk vel hian i sual roh a nih hi maw le! A rilru na kehchhe puak ri hi a ring thin teh asin! Hmangaihna hi a tan chuan thil tenawm a lo ni ta a, mipa zawng zawng hi a ring ngam tawh lo fo thin. Nangmahni ang hi alawm hmangaihna hming tichhe zo vektu chu! Thianpa Dr. PC Hminga’n kan thianpa kawngkhar nem hawn rawk paha Bon Jovi hla, “You give love a bad name!” tih a va sak khum fiamthu ngawt laite kha ka hre chhuak e! Hmangaihna tih tawngkam hlu leh ril lutuk mai hi in tithangtlawm a, in titenawm zo ta a nih hi! I rilru tenawm hi hmutlang thei lo tur khawpin a hmangaihna mit chu a del ve a ni si ale! Hmeichhe rilru thianghlim tan hian sex leh hmangaihna chu lakhran theih loh a ni asin. Nangmah ang mipa rilru danglam tak, hmangaihna tel miah lo pawha sex hmang thei thin thinlung hi hmu tlang se a heti bik lo tur. Mahse a tawpah chuan a hmeichhia zawk bawk an hmingchhe leh thin si! An lainatawm asin! I demawm a ni. Khawvel hian a dem che a ni. I then leh dawn tho anih chuan engati nge a parmawina hi i thliah kher le? I duh zui leh dawn loh si chuan kar kar lul tawh teh suh. Nangmah avang hian nula thianghlim chu a bal zo ta a, i rilru tenawm avang hian a chingpen zo ta si! A rilru na inchhir lungchhiain tih loh loh tur a tih a, ngaidamtheitu ngaihdamna a chan hmaa famkhawpui a lawi anih ngat chuan a chan tur chu a chhe khawp ang! Chu hmuna thawn luttu chu nangmah i ni ngei dawn si a, a thisen mawh chu i chungah a tla khawp ang maw le! I phur zo dawn em ni? Ngaihzawng i nei a nih pawhin ninhlei viau teh suh. Kan thil duh em em hi chul chul a, khalh khalh kher hian thlauh keh a awl zawk a nia! I duh a, I hmangaih a nih tak tak chuan palai tir la, nupui atan nei mai rawh. Puithiam hmaa ‘a nuamah pawh, a hrehawmah pawh’ tia in damdun chhung atana nei tura thu I tiam zanah inthlahrung hlek loin i ninhlei dawn nia! Tuman kan dem lo ang che! Tlangval, thurawn pe ve dawn khanglang ta che ila i dawngsawng duh ang em? Hmeichhia hi duat ve la. An rohlu ber hi damchhung atana i duh a nih si loh chuan laksak tawh suh. Hmangaihna hming hi zawng tichhe lul tawh lo teh. Hmeichhe tana virgin a hlu ang tho hian mipa tan pawh virgin hi a hlu asin! A vanram kai chaw zawk.