Hauh ngai si, hauha sawt tawh lo leh awmze awm tawh si lo hi a awm fo! %%%%% HAUH A SAWT TAWH LO Ka fanu exam zo chu ngui nghiaiin a lo haw a. “Pa, Hindi ka tichhe lutuk, ka fail ang,” a rawn ti a. Ka rilru hmasa chuan, “I zir tlem a nih kha, thu i awih lo a nih kha, nizanah pawh zir rawh ka ti ka ti che a ni lawm ni? I thatchhia a nih kha! I fail vaih chuan ka hlapngei ngei ang che!” tih hrep kha ka duh a. Mahse a va ekzam zo tawh a, a rawn tichhe zo vek tawh a. Hau hrep ta ila a mark a san phah dawn tawh lo a, a hlim lo sa chu a ngui leh zual dawn a, kan boruak a chhe mai mai dawn tih ka hre chhuak hman a. “A nih chu! I ekzam zo tawh a, i tihchhia a nih pawhin siam that theih a ni tawh lo. Hahdamsan daih rawh. Exam lehah chuan nasa deuhin i zir ang a, i titha ngei ngei tawh ang,” nui chungin ka lo ti ta zawk a. Ka fanu chuan mak tih hmel leh hlim deuhin min en a, “Pa, min hauh ka ring a! Exam leh chuan ka tang viau ang” a ti ta zawk a. Hau ta hrep ila, ka demawm lem lo ang. A zirna tur sum ka tum a, a zir theihna turin theihtawp ka chhuah a. A tih tur a tih ve loh avang khan hauhtlak chu a ni teh meuh mai. Mahni tih tur theuh hi tha tak hian ti vek ila chu kan nun hi a hahdam hle hlawm tur hi a ni a. In tinah hian mi tin hian ‘role’ kan nei vek. Mahni role theuh kan tih theuh hian chhungkua hi a nuam a, kan hlim a, hma kan sawn thei thin. Chhungkaw buai tam takah hian mi tinin an tih tur theuh an tih loh vang a ni fo. Mahni tih tur theuh hi tha takin hlenchhuak vek ila chu chhungkua hi kan hlim khawp ang maw le! Nu leh pain fel takin rorel ila, fate tan theihtawp chhuah ila, faten nu leh pa thuawihinlehkha zir leh thil dang an tih tur theuh ti ta se, insawisel tur leh hlim lohna turte hi a tlem dawn si a. Khami ni khan ka fanu khan a tih tur chu a ti tawk lo ngei mai a. Mahse a ekzam a rawn tichhe zo tawh a. A rawn lungchhe sa tawh a, dawih zawk hawnin meikhupin a rawn haw a. Ti dekin ngaihdam dil mitmeng nen min melh tawh a. Han diriam zui nghal a, han cheksawlh zui chiam kha a fuh ber tawh lo thung si.Khami tuma Hindi a tihchhiat avanga hauh kha a tul tawh lo. Dawih zawk sa han chin zui châk thin mihring rilru hian han nawp zui deuh kan châk ta fo thin a. Min ngam lo sa han sawisakte hi nuam kan ti fo. Kan lalna leh thuneihna han tihlan belh hramte kan châk thin. A hau theitu han nih a, tuma ngam loh huai ber ni tih inhre chunga han hram kuk kuk maite hi a chakawm thin. Ui tak ngial pawh hian a meikhup tawh zawk chu a seh zui duh tawh meuh lo asin maw le! Mihring rilru hi chuan a na thei ang bera chin zui kan châk fo. Mahse chu chuan mihring rilru hi a siam tha lo fo a. Mihring thinlung hi a hneh lem lo thin. Vawi tam tak ka tisual tawh thin a. Ka fate thinlung leh ka nupui thinlung hi ka tina fo tawh thin ngei ang. Khami nia ka fanu ka hau hrep lo kha a fuh ta phian a. Mittui parawl kianga a lo haw kha a hlim zui thei ta a. “A pa hi i fel e.. min hau miah lo a..” a ti nawn sek a, pa fel nih hi a lo har loh tawp hi! Hindi pawh chu a fail ta chuang lo lehnghal a. Tui baw hnu a ruh theih tawh loh an ti a. A buak nawn tawh loh nana tan lak erawh a ngai si. Hauh sawt tawh loa inhauh chiam ai chuan hun lo kal tur atana infuih mai hi a fuh fo zawk dawn a lo ni. Infuihna leh inzilhna hi inhauhna leh insawiselna anga a rik loh hram dan tur hi zawn hram hram tur a lo ni e.