Hmanah an phalna ka la tawh. Ka puangchhuak mai lo. Kan phawrh tawh teh ang! Ka lehkhabu ziah tum ami a nia.. &&&&&& DAM HI NUAM AN VA TI EM! Ka thian tha, harsatna pawh tawk ve thina ka rin, an nun pawh ‘bed of roses’ a ni reng bik lo ang tih ka hriatte chu engvangin nge intihhlum an duh loh a, eng nge dam hi nuam an tih chhan ka zawt hlawm a. Min chhanna hi a ngaihnawm asin. Mi tlemte chhanna chauh pho chhuak rih ang : PU VL MUANCHHANA - Mission Veng KTP Leader kal chhuak, CKTP a OB ni tawh, MSV Kohhran Upa-a thlan thar) “Engvak ni lo mah ila, mi dang min mamawhtu an awm ve a ni tih hriat te, engmah pawh tithei lo mah ila kan awm ve ringawt avanga nuam titu chhungte ka neih avang te leh harsatna tawh chang pawha beiseina hope tha lam, Pathianah ka neih tlat avang te, chakna leh tuartheihna nei theitura Pahianin min siam vang a ni ang. DR. LALHUTHANGI HMAR (MAMI) – Eye specialist Chhan neiin ka lo piang a, chu chu min siamtu duh dana nun hi a ni. Tuk tin ka han thanharh hlawl hian ka rilrua thil lo lut hmasa ber chu ni hlimawm takin min hmuak tih hi. Ka mihring puite tana ka theihtawp chhuah theia ka awm hi ka lawm thin. Ka pasal leh fate tana NU ka ni thei hi ka hlimin ka nun hi nuam ka ti hliah hliah thin. Ka damlo enkawl ten damna an han chang ka hmuh hian ka nuam veng veng thin. Ni tina ka thil tawnte hi min chotuh ka hmang a, ka tih puitiln theihin ka lawm a, ka hlawhchhamin ka bei nawn thin ANDREW VARTE – Veng pakhata Br KTP Commiittee member ni thin, tluk leh tlak fawm ve fo, pa pawh nei tawh lo Damdawiinah han kal ila,keini aia chanchhia hmuh hian min chhawk berin ka hria. Chan chhe riaua ka inhriat chang chuan an mahni lam chu ka ngaihtuah thin. Ka hnara oxygen a luh theih theih chuan ka duh tawk el awl viau a. Naktuka thil lo thleng tur hriat lohte hi nuam ka ti tawk hle thin. Phurna min pe tlat. Ho ang reng tak, nuam ka tih mai mai chu - Khawimaw hmun hla tak atanga han zin haw a, mahni toilet ngei a, thamuang taka inthiar paha lehkhabu chhiar veng veng hi nun timanhltu a ni tlat. MALSAWMZUALA – Mizorama KTP branch lian ber Secretary Mihring nun hi kawng hi chhuk leh chho in lal chawkna a ni, vanduaina leh harsatna a lo thlenin a cham hlen dawn lo a, a hnung lawkah vanneihnain mathei loin a rawn zui dawn tih hriat tlatna te, kan nuna chona chi hrang hrang awm thin, mahni phak tawka hmun sang zawka pen kai thei tura hmachhawn theihna te hian dam a tinuam hliah hlaih Hlim leh lawm laiin kan lawmna thlenna tur Pathian kan nei, lungngaih leh mangan rilru hah em em lai pawhin a thlenna tur Pathian kan nei. Kan nei chang pawh a ni lo, kan dil kan sawi a ngaithla thin hian dam man a ti awm hliah hliah. Enge ka hlauh ang? Pathian ka nei miau a. Tum tawk ngaihzawngte han neih a, phak ang tawk tawka han duat a, an lo lawm der ve em em te, (tun hnai khan a tum tawkte chu a neih ve tak nghe nghe kha!) thiante nena tumah inngaichang bik miah loa rik luih luih te, tu emaw a lan dan leh incheina avanga tawngkama sawisak a, nuih thler duai duai, U Rinliana leh Pa Chhuana hoa kan tih thin ang chite khan dam man a ti awm ve khawp nia! GRACE – MZU zirtirtu Miin min kidnap ta se, ka pa hnenah pawisa tam tak ransom an phut ang a. Ka pa’n a pek tlak dan harsa chung pawhin a ngaihtuah ang. Setana’na bawih atan min kidnap a, Pathianin ka ransom atan a fapa neih chhun, ama anpui, Pathian Lal Isua a pe. I cost too much to say my life is nothing Inthah chak hial lai ka nei ve tawh alawm. Piang lo tur lo piang ve, khawvel tana hnawmhnawk pakhat lo awm belh ve mai nia inhriat lai pawh ka nei. Pathian hi ka dem a, ka ngei a, anchhe lawh ka chak thin. Mi tangkai lo leh khawvel tana awmze nei ve lo tur min piantir ve avang khan. Mahse Sam 139 : 13 – 16 leh Jeremia 29 : 11 hmang khan ka hnenah thu a sawi ta a. Lo thi ta ila, tlai ni tla eng sut mai mawi em emte hi ka hmu thei tawh dawn lo a, thli thawin ka baksam a chhem leng siau siau nawmnate hi ka hre thei tawh dawn hleinem! Thil hlimawm takte ka ngaihtuah thei tawh dawn lo a, thil nuam te hi ka hre tawh dawn lo asin! Keimah ka inhmuh nep ang ngawt hian ka nep lutuk bik lo tih hi khawvel hriatah ka pho lang thei dawn tawh lo a. Ka laka ka chhungte thatna leh min duatna hriat tawh lohte hi ka phal lo. Kan chhungkaw ‘beram dum’ kha ‘beram var’ ka ni leh thei tihte hi ka lantir thei nang le!