Thil tenawm tak ka hriat chu hei hi a ni : Duh zawng kar chhuah nana inawhhluma mi vau chingte hi. &&&&&& INVAUNA TENAWM Nula mangang pakhatin min rawn bia a. “Ka bialpa hi then ka duh. A chhan chu a tam mai. Mahse then ka tum hian intihhlumah min vau zel bawk si a, keimah vanga a intihhlum chuan ka inthiam thei dawn si lo a..” a rawn ti a. A va zahthlak tehlul em! Invauna tenawm tak a ni, mi dang kar nan intihhluma invau hi. Nula leh tlangval inngaizawng zingah a awm zeuh zeuh. “Min then chuan ka intihlum ang..min neih duh loh chuan ka inthat ang,” an ti a ni awm e. A luck loh thlak ve haih haih khawp mai! Chu nula chu heti hian ka hrilh. “E, then i duh anih phawt chuan then rawh. A intihhlum leh hlum loh chu ama thu ni se. Invaubehtir hauh suh. A rawn vau leh che chuan, “ I thu thu alawm. Ka duh tawh lo che a ni mai. Inthahah chuan min vau suh. Min vau chhuak chuang lo ang. I thih pawhin i thu a nia, ka inthiam lo hran lo ang. Mahse thi lo la ka duh a, intihlum lo la ka duh khawp mai. I rilru a na anih chuan rilru daktawr pan ve mai rawh” tiin lo chhang la, ka number hi lo pe nghal bawk la, ka puih a duh chuan ka lo pui dawn nia” tiin. Mahni intihhlum hi a poi hle a, thil runthlak tak a ni. Ven kan duh a, tumah hi intihlum lo se kan duh a, kan inzirtir hlawm mek a. Chumi remchanga laa mi vau beh nana hman erawh hi chu a zahthlak hle thung. Verther taka mi rilru kar behna emotional blackmail tenawm tak a ni. Kan bialnu / bialpain min duh tawh loh chuan min duh tawh lo a ni mai. Sawi tur pawh a awm lo. Sawi duh kan la neih talh pawhin, “E, a nih chu. Ka ngai viau ang che ang a, ka lung pawh a leng hle ang, mahse min ngaihtuah suh, ka dam khawchhuak thei ang,” tih mai tur a ni. Miin min duh leh duh loh hi an thu a ni ve alawm. Ngaihdan an nei ve a, duhdan an nei ve a. Zahsak tur a ni. Nula kan va try a, min lo duh lohte hian tlawmah lak chiam tur pawh a ni lo. Inthaha vau beh hmangaihna chu chen pawh a chakawmzui vak chuang em ni? Mi hian min duh chuan keimah ka nih avangin, ka vau leh kar beh vang ni loin min duh mai se. Ama rilru puakchhuaka zalen taka duhthlanna siama min hmangaih hi a hlu ber. Kar beh chawp hmagaihna lem chuan nun tuihal a fah tak tak chuang lo. Nun a hlim famkim tak tak chuang ngai lo. Hetianga inkar bet innei zui ta, a kar bettu awmkhauh zawkin, ‘min hmangih vanga min nei pawh i ni lo’ tia a awm nem zawk a tihduhdah zui leh lawi site pawh ka hria maw le! A sual thlak mai mai a nia! An tel lo pawn kan awm thei a, kan dam khawchhuak thei tih an hriatte hian an mang a ang ru letling zawk thei a nia! I can live with or without you tih hla tlarte hi a mawi asin! An tel lo hian kan nung thei lo tak tak emawte an tih ngat phei chuan tuemaw chu kan chungah an inluling zui reng mai dawn asin! Mi duh lo chung leh remchang lo na nan na kar kar hi chu i ching lo teh ang u. Intihhluma invau phei hi chu invauna tenawm tak a ni. Thih chak khawpa kan rilru a na a nih chuan min pui theitu tur tuemaw pan ve mai tur a ni ngai e. Tenawm taka invau beh avanga kan vau chhuah hi a hlu tak tak chuang ngai lo e!