Kumhluiah mi tha tam tak an thi a, kumtharah keini kan la dam bik tlat si hi a mak ka ti! &&&&&& Hun remchang Hmeichhe naupang hmeltha em em mai a thi ringawt a. A va uiawm tehlul em! Naupang duhawm leh hmeltha, sualna reng reng la nei lo an han thi ringawt mai thin hi hriattham a har a ni. Nupui fanau ten an mamawh em em mai ‘pa ber’ an han thi ngawt maite hi a va hun lo tak em! Chhungkuain an la mamawh asin! Naupang thanglian tur hian pa kaihhruaina an la mamawh asin! Nausen pawm nu duhawm tak a thi a, a fanu chu engmah hre loin a nu ruang bulah chuan tui takin a muhil vei sak sak tak sia maw! A lo harh ang a, a nu hnute ngenin a’n rawn tap ngei ang a. A va hrilhhaithlak dawn em! Pa berin hnute tui siamchawp a tulh laite chuan inlengte chu insum a har khawp ang maw le! Chhungkaw khaikhawmtu nu leh pa an thi a. An kaihhruaina leh an upana kan la mamawh tehlul vei nen maw! An tel lo chuan chhungkaw rorel a buai dawn a, an uapna tel lo chuan chhungkua a kehchhe mai ang tih a hlauhawm asin! ‘Piang lo law law sela a tan a tha zawk tur’ tih ang chi kha kan piang teuh a, thi ‘hrih lo atana tha zawk’nia kan hriatte an thi mek lawi si a. Dam la thlahlel ngawih ngawih an thih laiin dam peih tawh lo, thih chak zawk, mahni nunna lak hreh si, Pathian hnena thih dil hialte an la dam lul bawk si. Thih leh dam thuah hian thu kan nei der si lo a le! Hriatthiam loh kan ngah a, zawhna chhan theih loh a tam a ni. Mi tha tak tak rapthlak tak maia an thi maite hi hriatthiam a har a. Mi sual tak tak kan la dam lawi site hi a mak bawk a. Thihna leh vanduaina te hi chunglam hremna ang hiala han sawi mai duhte kan awm. Hrem ngai zawk awm tak takin kum thar kan han dam thleng leh lawi site hian chu ngaihdan mawl tak chu a sawifiah zo em ni? Zawhna hlir zawhna hlir! Nakinah vanah kan la zawt dawn nia. Mi tam tak an thih laia kan la dam bik nachhan zawk hi ka ngaihtuah zui ta a. Ka rilrua chhanna ka hmuh chu hei hi a ni : Thuneitu hian ka nunah remchang min la siam sak a, chance min la pe a nih dawn hi. Kum tharah hian bul tan tharna hun rem chang min pe a, tuk tin hian insiamthatna tur ni thar min pe a ni ang. Piangthar lo tan piantharna hun remchang, sual sim lo tan inchhira simna hun remchang min pe a nih dawn hi. Rui thin tan ngheina tur hun remchang , mi dang la ngaidam hman lo tan ngaihdamna hun remchang, ngaihdamna la chang lo tan ngaihdamna hun remchang min pe a ni ngei ang. Nikumah tihsual ka ngah lutuk a, tihdikna hun remchang min la pe a niang. Hna zawh loh ka la ngah lutuk a, thawh zawhna hun min la siamsak a niang. Ka tangkai loh thin em avangin tangkai ve tawhna hun remchang, mi ka la tanpui tlem lutuk a, mi dang tanpuina hun remchang min la siamsak a niang. Dawt ka sawi nasa lutuk a, thudik ka tan vena hun remchang min la pe a niang. Ka eiru nasa em a, a let lia rulh lehna hun min hawnsak a ni ang. Mi huat ka ngah em avangin mi dang hmangaih ve tawhna tur hun remchang min la pe a ni ang. Ka koa tla ka hna ka thawkchhe lutuk a, thawh that vena tur hun remchang min la pe a niang. Chhungkua ka timangang thin em a, thlamuan ve tawhna tur leh chhungkaw hlim siamna hun remchang min la siamsak a niang. Ram leh hnam hmangaih inti siin ram tan ka thawk nep em a, mahni pumpui aia ram hmangaih tak takna hun remchang min la pe leh a niang. Zing tina kan harh hi ngaia neih a awl mai dawn. Mahse zinga kaihthawh zawh loh an awm fo hi! Hun remchang hi kan nei fo dawn lo tih hi ka ngaihtuah thleng ta a. Esauva chuan a upatna chu chaw vawikhat eiin a hralh a, chumi hnuah chuan malsawmna rochun a duh pawhin mittui tla chungin thahnemngai takin zawng mah sela, rilru lamletna remchang a hmuh loh avangin paihin a awm tho a nih kha! Miitui tla chungin, bawkkhupa vaivut puan sin chung pawhin dil thin mah ila, hun remchang kan neih loh ni hi a la thleng dawn khawp. Kum thar, ni thar, hun thar peka la awm zawng zawngte hian he hun remchang kan neih mek hi eng remchang tihna atan nge kan hman dawn le?