Naupang himna hi ngaih pawimawh a tul tak zet! Kan faten khawihchhiat an tawh loh nana kan zirtir tur leh fimkhurna tur thu thenkhat ka’n ‘titi’ pui leh ang e. &&&&&& AN TAKSA CHU AN TA A NI Chhungkuaa mi tupawh hi mi pawimawh an ni a. Zah an phu vek. Mi mal ramrite hi siam a, inzahsak tur a ni zawk. Naupang pawh an kumrual milin zalenna pek chhoh ve an ngai fo. An tet deuh lain kan bual hawl hawl a, an enkim kan silfaisak a, kan bulah an inthlak tawng tawng a ni mai thei. Zah a hriat ve a, mahnia inbual a duh tawh zawk emaw, khawih phal loh chin leh hmuh phal loh chin an neih ve tawh chuan zahsak tur a ni. Tuma hmuh loha inthlak a duh ve tawh chuan zahawm takin tihtir mai tur a ni. Naupang an nih avanga an mi mal ramri kânsak fo bik a rem lo. Mi tinin zalenna kan nei a, chu chu inzahsak tur a ni a, inbihthlakte, an phal lo chunga tu taksa eng emaw lai inkhawisak loh tur a ni tih te kan zirtir nghal tihna a ni. Nu leh paten an taksa kan zahsak thiam chuan mi dang taksa an zahsak thiam ve a, mi duh lo chungkhawihte chu a dik lo tih an hre ve thin. Mi dang pawhin an taksa chu an zah turah a ngai ang a, an duh loh zawng thil a thlen pawn an hnial thiam bawk ang. Kan fate hnenah hian an taksa chunga thuneitu chu anmahni a ni tih hrilh tur a ni. An phalna lovin an englai mah tumahin an khawih ngawt thiang lo tih hrilh tur a ni a. Inkhawih dan tha leh tha lo a awm tih hrilh tur a ni a. Inchibai hi a him tawk mai tih hi hre teh se. An duh lo chung chu tuman an pawmin an kuah tur a ni lo va, an duh loh zawng leh nuam an tih loh zawnga lo khawih emaw, an awm chuan nu leh pate emaw, tupawh, an mi rin zawng kha hrilh ngei tur an ni tih zirtir tur a ni. Thuruk awmzia zirtir tur a ni. Thil tha lo zep hi thuruk vawn dan tha a ni lo tih hrilh tur an ni a. Miin an khawih a, “Tumah hrilh suh aw, i sawi chhuah vaih chuan..,” tia zep tura an tih chuan an khawih dan chu a tha lo a, zep loa sawi zawk ngei ngei tur a ni tih mai tur a ni. An duh loh zawnga thil thlengchu an sawi chhuak thiang a, kan hau dawn lo a, kan ngaihthlaksak dawn tih an hriat chuan an sawi ngam chauh thin bawk. An hrilh ngam turin awm ve bawk tur a ni. Naupang tê zual deuh phei chu, “Mi tupawh, chhungte pawh, chhungte lo pawh, unaute leh mi dang an nih pawhin, i serh bawr leh i hnute an khawih emaw reng rengin min hrilh ngei ngei tur,” tih mai tur. Naupang thenkhat chuan miin an khawih dan chu an hrethiam lo fo a, nuam lo ti tak siin, tih dan tur ve reng emawte an ti ve fo. Thil dik lo hi hrilh chat chat an ngai thin. An taksa chu miin an zahsak tur a ni ang chiahin mi dang taksa pawh an zahsak tur a ni tih zirtir tur a ni a. Infiam nana hnute inkhawihsak tum te, mawngin kawmsak te leh mawi lo zawng dangin tumah an fiam tur a ni lo tih hrilh tur an ni. Naupang vuak pawp pawp te, ben chawrh te, phih lawp lawp te hi tih loh tur a ni. Puitling hian an len bik leh an huai zawk avangin an duh duh ang anga an tih vela, an taksa khawilai pawh chu ‘puitling tan khawih a thiang’emaw an ti thei. A pawihle dawn si. An taksa an ta a ni a, a zahawm a, anmahni leh mi dangin an zah ngei tur a nitih hi an thinlungah a intuh nghet tur a ni. An ta humhimpui turin an lamah kan tang dawn a ni tih hre teh se.