Sex kaihhnawih harsatna tawk kan tam viau! Sex chungchang inzirtirna tha tawk kan hmuh loh vang ni maw? &&&&&& FATE BULA SEX TITI Sex chungchang zirtirtu tha ber chu nu leh pate kan ni. Inzirtirna hun remchangpawh kan ngahber. Sex chungchang hi inchhungah zalen taka sawi mai mai thin tur a ni. Sex chungchang sawi chu zahmawh sawia inngaih tlatna rilru hi paih a ngai phawt. Kan tih a, kan zah lutuk hi a fuh lo. Sex hi a zahawm ve deuh roh a. Serh hmingte pawh hi kan lam tha ngam meuh lo. Sakei ti tha ngam loa Sapui an ti thin ang deuh hian serh hming tha tak kan neihte pawh hi a tihawm deuh roh a. Chhu leh zang han tih bawl mai hi chu a ‘hur’ riau hian kan hre tlat. Hmulthite pawh a tiding thei deuh roh tak asin! Chuti a nih pawhin kan chhungkuain a hmingkan phuah bik hi inang tlangin hmang mai mai ila,?‘Pate’ ‘Nute’ ‘Kawhte’, ‘Sazu’ ‘Kakuk’ tiin emaw hi a tha vek. Kan sawi dan a inan hian eng emaw sawiho a ngaih hunah titi a tiawlsam thin. Sex kaihhnawih a nih takavanga khunkhan taka sawi kher a ngai lo a, kimki chunga sawi pawh a tul lo. “I ha nawt rawh, ke sil loin mu suh,” kan ti thin mai ang?hian, “I serh kha inbual leh inthiar zawhah silfai ziah tur,” tih mai tur a ni. Buaina an tawk palh ang tihhlauhthawn lutuk avanga sex chungchang hi hlauhawm leh thil pawi anga sawi vak a tul lem lo. Pathian siam, a hun tak leh hmanpui tur dik tak nena hman chuan Pathian remruat a ni tih hi sawi mai tur. Sex hlauhawmna sawipui hma lutuk hi a finthlak ber lo. Sex chungchanga zawhna an neih chu dik takin chhansak tur a ni. Dawt hrilh loh tur. Ni tin nuna thil thlengte, chanchintharte, lehkhabua an chhiarte, thiante titi atanga an hriat dan an sawite, chhungkuaa TV enho laia sex kaihhnawih lo langte hi anmahni zirtir nan hman tangkai thiam fo a tha. Condom hman te, zanghrawt te, nau tihtlakte, pawngsual chungchangte hi zawhna an zawt a nih chuan zahawm takin hrilhfiah mai tur a ni. Engmah hi ‘sawi thiang lo, zawh thiang lo’ ni suh se. Mipa leh hmeichhe inlaichinna hmuhnawm tak hi kan nupa nun atangin an zir tur a ni. Sex chungchanga fate zirtir tur hian mahni lam pawhin zir ve fo tur. Hahdam tak leh zak hauh lo, zahawm taka sex chungchang hi sawi thei tura inpuahchah ve tur a ni. Fate nena sex chungchang titi dawna hriat mai mai atana tha thil thenkhat dang leh chu: • I fa lakah chuan i thlirna leh i ngaihhlut zawng ang chiah kher phut ve suh. • An ngaihdan chu ‘a dik lo hulhual’ tiin hnial suh. Ngaihdan awm ve thei a nih thu pawmsakin, ngaihdan dang awm thei hrilh tel mai rawh. • Engpawh sawi se, sawisel ngawt lo la, makti hmel pu lo la, thinrim suh ang che. • Thil an sawi laiin lo pawtchat zung zung suh. • Ngaithla reng rawh, kalsan daih suh. Sex chungchang sawi pumpelh luih tum suh. • I puihna leh kaihhruaina an mamawh niin ring nghal ngawt suh. Thurawn i pe dawn a nih pawhin, i pek duh chhan hrilhfiah phawt ang che. • Intirum lo la, biak ngam loh hmel pu suh. “Nau i pai a nih vaih chuan, lo haw tum buai ting tang lo mai rawh,” tih ang chi vaunate hi pumpelh hram ang che. • I faten sex chungchang an zawh tak mai che avangin an hmang ve duh taah ngai ngawt lo la, buaina an tawk taah ngaihsak nghal ngawt suh. I lo phili ruai chuan sex chungchang kher chu a zawt nawn ngai tawh hauh lo mai ang che.