Ngai rawh, thu fing tawi hmang apiangin he thu fing tawi hi an hmang ang. “A fanuin a nu a chhun,” tih hi. &&&&&& NU SIAR, NU SIAR Aizawl nu hausa pakhatin zing dar 5:30-a a thawh thin thu min hrilh a. “I va tho hma ve, eng nge i tih thin?” ka ti a. “Chhuat ka nawt a, ka insu thin,” a ti a. Mak ka ti deuh a. Ama thawhchhuah ringawt pawh a tam bakah a pasal chu officer lian a ni leh nghal a. Tunlai tehna atanga ka tehin, chutiang nu-in zing taka tho a, chhuat a nawt a, a insu chu mak ka ti deuh a ni. “Awmpui in nei teuh awm sia..” ka’n ti ringawt a. “Nei tho e, mahse ka thawk lui. Ka fate entawn atan,” tiin min chhang a nih chu! A va zahawm em! Ka zak chem chem mai! Kan fate hian entawn tur dang an nei lo tak asin! Ka fate hian ka nun atang hian eng tak chu lo entawn hman tawh ang maw aw?? Ka tlai chhe zo ta vek pek ang a!! Awmpui kan neih ve avangin engmah tih tum loin ka inti-babu vel a, thutna dup ul maia bawp khawkherha thuin ka ke ka phut hleuh hleuh a. ‘Thupek’ chu ka hna a nia, ka ‘thupek’ angin engkim chu a awm tur a ni mai! Kekawrbul var haa uite var kaiin, mi lian dang zing walk ho ve nena ‘good morning’ intih talh talh kha ka zing thawh hma ve tuma ka tih thin, ka thlan tihtlak ve dan ve chu a ni mai. Ka intih ropui lehzual duh tuk phei chuan ear-phone nen ngat! Nupui neih ka duh ve tawh laia ka pa nena kan indawr dan kha ka ngaihtuah chhuak a. Ka nupui tur ka pa’n min approve-sak dan kha! “A fel alawm, a hmel pawh a tha alawm,” ti ta lo chuan, “A neih tlak ang, a nuin a pasal a zah em mai!” zuk ti daih a. A hmelte pawh kha comment ve awm a nia! Chhe lo ka tih tehlul nen! Mahse hmel aia ril kha ka pa ngaihtuahnaah a awm a ni. Ka pa khan hmeichhe tha kha an hmelah a teh ve lo a, an pianah a teh lo a, an hausaknaah a teh hek lo! A pa sakhaw mi leh mi loah a teh lo a, a pa zu in leh in loah a teh lo a, thlahtutea phungzawl an awm leh awm loah a teh hek lo. Congress nge MNF nge ZNP an nih a ngaihtuah lo a, Sawma Pakhat an pek leh pek loh pawh min zawt hek lo. A fapa nupui atana a duh ber chu pasalte zah thiam kha a ni ta ber awm asin! Chumi tehfung atan chuan, ‘a nu chuan a pasal a zah thiam em?” tih kha a hmang hmiah mai a ni! Pa ber rorelna hnuai atanga han inlakhran hnua ‘thu ber’ han nih ve takah khan engkim mai hi tih a lo ngai a. Ek ina thil tla chhar a lo ngai a. Tawp hnawk tak leh tenawm takte hi khawih a lo ngai ta thin a. Chutiang tumah chuan, Chanmari Pastor Quarters-a kan awm laia ek in pipe chhia tawp tak mai, kawmchhak kil thima ka pain a kuta a hai fai lai kha ka mitthlaah ka hmu ziah thin nia! Ka nu hian fanu nei se a taima ngawtin ka ring. Ka nu hian ‘nu ropui’ nih a hlawh kher lo mai thei. Lo thi ta se, a thih nia thusawi reng rengin an sawi tur leh an inlungrual vekna tur thu pakhat awmin ka hria. A taima tih hi! Fakna tur dang hre miah lo pawhin hei hi chu an pha thei lo ang. Thil hote teah hian nu leh pa atanga kan kan zir hi a lo lang chhuak fo mai. ‘Ka nu tih dan, ka pa tih dan’ hi kan hriat loh hlana min kaihhruaitu a lo ni fo. Khi Aizawl nu hausa khian a tifuh dawn! Ngai rawh, thu fing tawi hmang apiangin he thu fing tawi hi an hmang ang. “A fanuin a nu a chhun,” tih hi (Ezekiela 16 : 44).