Naupangte hnena dikna chungchang zirtir hi kan in chhung atanga a intan a ngai.. &&&& Rinawmna Scho’ Zirtirtu tha Lalnunpuia Hrahsel nen kan titi dun mai mai a. Zirlaite tana scholarship sem thinah mi tam takin a dik loa an dil thin thute min hrilh a. A fate a diltir ve ngai loh thu leh an thiante scho lak laia an hawihhaih lutuk loh nan ‘Rinawmna Scho’ a pek ve thin thute min hrilh a. Scho dil ve thei zirlai kan nih laia kan dil ve thin dante ka ngaihtuah chhuak a. Thianten an dil rual khan dil ve kan châk thin si a, mahse a hmu thei tur chin chhungkaw sum lakluh bithliah a awm tih kan hre ve tho. Kan dil ve duh tho si avang khan ka pa khan a hnial lem lo a. A hlawh dik tak kha an puntir chhuakniap niap a, dik takin a ziak a, a hming a ziah hnan a. Kan thehlut ve thlap thin. Khatih laia a hlawh chu tlem tê a ni a, mahse kum khat lakluh han chawh chhuah khan scho hmu thei tur bithliah chin ai khan a tam hret ve khanglang si a. Kan hmu ve ta miah lo kum tin thin. Han ziak tlem ve zeuh se, kan hmu ve ni mai tur! Kan mamawh tehreng nen khan aw! Ka pa’n a tihdik tlat avang khan kan hmu dawn lo tih kan hre sa tho a, rilru naa it ve lutuk chuan kan awm lem lo. Lalnunpuia Hrahsel hlawh chu scho hmu thei tur chin aia a san ve miau si avangin a fate a diltir lo mai thung a. A fate rualawt tur erawh a venpui thiam ka ti hle. An thianten scho an lak rual khan ‘rinawmna scho’ tiin ama pawisa a pe ve thin a nih chu. Rinawmna hi a hlawk ve tho tih an hriat phah ngei ang. A fing ka ti hle. Ka pa khan ‘rinawmna scho’ kha min pek nachang hre ve ta pawh nise min pek ve tur kha a nei lo hrim hrim ang tih ka hria. Mahse tun thlenga scho dik loa la thin an sawi apianga inthiam lohna kan neih ve miah lohna hi kan ‘rinawmna scho’ chu a lo nih ve reng hi a! Mahni inthiam loh hi rilru lam harsatna hrehawm tak a ni tih ka hmu ta fo lehnghal a. Ka lawm ta viau mai. Ka pa khan rinawmna leh dikna chungchang min zirtir chu a tum hle. A zirtir ang hian ka awm hleithei lo mai pawh a. Min zirtirna zawng zawng kha zawm vek ila chu mi nawi leh nep tak kan ni lo ve mai tur hi a nia! Naupangte hnena rinawmna leh dikna chungchang zirtir hi kan in chhung atanga a intan a ngai tih erawh ka hre chhuak a. Fate hnenah hlanchhawn dan tur zawn luih hram hram a ngai ta a ni e. “Scho la thei lo tur tam takin dawt hmangin an la teuh” an ti teh fo a. An dilna form-ah hian nu leh pain hming ziah hnan a ngai a ni lawm ni kha? Nu leh pate chuan a dik loin an fate hriatah ngei an hming an ziah hnan tihna a ni ang em? Ni ta se, kan fate hi engnge maw kan zirtir chhuah tak ang le? Nge, naupang hian an nu leh pate hriat lohin an pate hming ziak niawm takin an lo ziahsak zawk thin? Pate hming ziak lem duh fate chu tu zirtir chhuah nge ni leh ta tho si le? Scholarship la hrim hrimho zingah hian an zirlai atana hmang tangkai nge tam ang a, thil dang nawmsakna atana hmang tam zawk ang aw tihte ka ngaihtuah zui mai mai a. An scho laka pheikhawk te, kawr te leh phone leite an sawi thin ka hria. Zirlai atana tangkaia sawi luh hram theih an ni ve tho ang chu maw!? ‘Dik loa kan hming ziah hnante chu dik loin lo hmang mai mai hlawm teh se’ tiin nu leh pate pawhin kan en liam ta vel mai mai fo ang em? ‘Rinawmna hi nunpui atan a tha ber e’ an ti thin. A dik ang. A har hle si. “Thih thlengin rinawmin lo awm rawh, tichuan nunna lallukhum ka pe ang che” tiamin tiamtu hianvanah ‘rinawmna scho’ pek tur ‘kristian rinawm’ a hmu zo ang chu maw!