Drugs chu i nun atan a pawi a, i hmelma a ni tih i hriat tak avangin Drugs chu i nghei duh ta a. Rilru lam inbuatsaihna i nei fel ta bawk a. A taka hmalak dan tur sawi ang le.Drugs chu i nun atan a pawi a, i hmelma a ni tih i hriat tak avangin Drugs chu i nghei duh ta a. Rilru lam inbuatsaihna i nei fel ta bawk a. A taka hmalak dan tur sawi ang le.&&&& DRUGS NGHEI TAN DAN TUR CHU LE Pui theitu che an awm tih hria la, an puihna zawng rawh. Drugs-in taksa rei tak a lo khawih tawh avangin nghei thut dawn hian a harsa ve a. Nghei thut nghawng (suffer) hi mahni maia tuar chhuah theih loh chu ni hauh lo mah se puitu neih a nuam zawk. I chhungte kha nangmah hmangaihtu che an nih avangin i tan an pawimawh hmasa ber. I chhungte hian i ti tih an la hre lo a nih pawhin an hnenah inpuang la, an ngaihdamna leh an puihna dil ang che. An tel loh chuan thil hi a buaithlak nuaih mai a ni. A tawp thlenga nagmah puitu tur, a chhe ber i tawn pawha i tana awm tur, i ruang chungah pawh mittui nena i thatna lai sawi hram hram duhtu tur chu i chhungte an ni. I chhungte tanpuina hi a tawp thlenga i mamawh tur a nih avangin pun hmasa ber rawh. A ‘raw’ a i tuar ngam lo a nih chuan i chhungte hruaiin daktawr rawn ang che u. Daktawr  chu dawt pakhat mah hrilh loin i tih tan hun te, i tihchhan te, i tihzat te, i tih hnuhn berte hrilh la. Anni chuan i tihdan azirin i suffer hrehawm lutuk tur chhawkna an pe dawn che a ni. Daktawr damdawi chawh chu in lamah, chhungte enpuinain i ei thei. Lengchhuak hauh lo la, inah tawm tlat la, daktawrin a chawh bak chu engmah tihbelh suh ang che. I tuar chhuak dawn lo a nih chuan daktawr chu va rawn leh mai thin rawh u. An lo pui zel ang che. Nangma thuin a chhawk belhna dang lo ti hauh suh ang che. Damdawi ei chung pawhin na tawrh ve deuh te, mut loh ve deuh te a tul tih theihnghilh suh. Nuam in lo addict tawh avangin nunna thar nei tur chuan nuam lo paltlang  ve a ngai tih hriat tur a nih kha. Nawm i tum chuan i hlawhchham sa.  I ruih thin lai ang khan a nuam dawn lo a; mahse, i hrehawm zualpui chu a chhawk dawn che tih pawm mai a tawk. Doctor remtihnain damdawiinah a awm theih bawk. I chhungte bawkin awmpui che se la a tha. Khawiah pawh awm la, tuar zuau hauh suh. Damdawiinah hian kar hnih tal inkhung a tha. Doctor damdawi chawh kengin a zin bo daih theih bawk.  Thingtlangah emaw, phaiah emaw, drugs awm lohna hmuna kal bo daih hian tuar a chhel duh bik. Camping emaw, centre-ah emaw pawh a luh theih. Centre a indahluh hi inhremna a ni lo tih hria ang che. I nun kal buai laklawh siam thatna tur kawng dik zawh tanna tur hmun tha a ni.  Addict tam tak hian inhremna emaw an ti nge ni, luhul rilru puin an lut a, an chhuah veleh thinrimna leh runluihna avangin an ti leh duh viau. Rilru puthmang dika lut tan chuan ‘centre’ hi hmun remchang tha lutuk a ni tih hriat tur a ni. (Titi peng lawk teh ang. Centre thenkhat hian daktawr chawh ngei pawh lo pe duh lem lo a, lo laksak vek a, anmahni style ngai lo hmang ve hi an awm thin a. Chumai bakah daktawr rawn lem loa lute pawh an lo enkawl ve mai thin bawk. Thawktute hi fimkhur a ngai hle. Daktawr chawh loh damdawi lo pek ve ngawt a thiang lo.  Chuvang chuan centre te hian daktawr an nei ngei tur a ni. An neih loh chuan an hnena lut turte hi daktawr rawn hmasaktir zel se a tha hle. Centre tha tak tak kan neih, mi inpe tak takten an vilte hi a hlu em em a, a that lehzualna tur thli pakhat leh kan titi belh hlek a nih hi. An himna tur a ni.) Nun phung pangngai hman tum reng chunga nghei tum hi a harsa. Ina tawm, damdawi ina awm, zin bo, inkhung hran daih hi inhremna emaw, tawrhna emaw a ni lo tih hria la. Nun tan thar tumna atana ‘bethel’ hmasa, Lal Isuan rawngbawlna bul atan dawna ni 40 leh zan 40 zet a fianrial angah khan inngai la, a hahdamthlak mai!