“Hetiang rilru hi a pu ang tih ngaihna reng kan lo hre lo a ni,” tia hamhaih taka inthlahliam leh ringawt thin lo tur hian tih theih kan nei ang em? %%%%%%%%% THAWNTHU LUNGCHHIATTHLAK CHU A tan kawng dang a awm tawh lo, thihna mai lo chu. A nun chu a’n thlir kir thin a, vanduai bik tura lo piang ni maiin a inhria a. A’n hlim ve dawn chauh thin a, engemaw a lo thleng leh a, mittui tlakna bawk. Harsatna tam tak pawh su tlang ve thei thin kha a ni a, tun tum zet zawng a va han khirh tak em! A tawrh mek hi chu a na em asin! A tan chuan khawvel hi hremhmun a ni berin a hria a, heti hrepa nun hi zawng nun a tling tawh lo. Nunna nei lo chunga dam ve reng hi tuman an tlin bik lo ang. Thi se a tan a hahdamthlak zawk ang a, mi dang tan a thawven thlakin a ring bawk. Mahse han thih ngawt mai chu…Aw, puitu tur han awm hlauh se, a harsatna hriatthiampuitu han awm teh hlauh se…Thihna lo hi kawng dang awm teh hlauh sela aw! Sawi tur a va la ngah em! Mahse tuman an ngaithla peih lovang. A harsatna hi an tan chuan a nep awm em mai. Hrilh pawh ni se an hriatthiampui leh chuang lo ang a, “A nep em mai,” tih bak a hlawh leh dawn chuang lo. Miin nep ti dawn viau mahse a tan chuan tuar a har em asin! Mi chak lo, dawihzep, tuar zuau, a phu tawk lek hmu, harsatna su ngam loa tlanchhiat tumah an puh tho ang. Chutianga dem leh nuihsawh tur ringawt atan chuan tu hnenah mah a inpuang thei si lo. A thinlung a va han pik tak em! A nun chu a va hahthlak ve le! Thihna chu a chawlh hahdamna tur hriat chhun a ni. Chawlh hahdam a mamawh tawh em em si a. Vawi tam tak a mitthlaa a lo tihchhin tawh ang chiahin hruihrual chu a awrh ta a. Thihna kut vawt nena han inchibai tak tak dawn chuan a lo va han khawhartlak leh si em! A mittui rawn luang ngiai ngiai chu mahni inkhawngaihna mittui kha a ni tawh lo a, thinlung kehsawm atanga mittui rawn insawr chhuak kha a ni tawh hauh lo. Thih dawn khawhar mittui a ni. A khua a va han har tehlul em! Thih ngawt mai chu a va han hreh em! Mahse kawng dang a hre mawlh si lova le! Kir leh rual lah a ni tawh si lo. A thleng thui lutuk tawh. “Lalpa, ngaihdam tlak loh hi min ngaidam hram la ka va ti em! Ka chhungte u, ka hmangaih che u,” tiin phun sep sep chung chuan a khawvel chu a lo thim ta a. A chhungte tah hla chu ngaihthlak a va’n hrehawmin zir tur a va tam em! An lungngaih tahna mittui kara an thu chham zozaite chu a dam lai khan hre hman se chu a heti lo tur a nia le! An hmangaihzia te, a harsatna an lo hriatpui loh avanga an inchhir zia te, an tana a pawimawhzia leh a hlutziate kha lo hrilh hre hman se chu aw! Puih an inhuam asin maw le! Mahse engmah a sawi si lo. Sawi se ngaihthlaka hriatthiampui an duh asin. A nun ngui kha chu an hmu ngei a ni lawm ni kha? Tum dangah pawh vawi tam a nun ngui an hmuh hnuah a rawn nui leh thin a nih si kha! Nui leh mai tura an beisei laiin heti lam zawk hi maw lo ni ta? Nimin chhunte khan a nuih leh seih seih tawh kha maw le. Pawn lam lan dan hian chhungril thinlung hi va lo thup thiam thin em! “Bawihte, i va hlim lo ve,” tiin vawi khat tal pawh an lo zawt si lo. Chen ho ngawt hi inngaihsakna a lo ni lo tih an hriatchhuah meuh chuan phengphehlepa khua a tlai zo tawh. A dam lai khan lo ngaihsak tak tak hman se chu he thihna rapthlak leh mualpho thlak tak hian an inchhungah thla a zar lo tur a nia le! Mahse an lo inhrechiang lova, an ngaihdan a inang lo a, an lo inngaihsak tawn thiam lo va, an lo inhmangaih thiam lo a ni. Hmangaih chu an inhmangaih asin! Mahse tuman engmah an sawi si lo. Chu thihna lungchhiatthlak tak avanga kal khawmte chu zirtur tam tak neiin, lungngai tak si, hma thar lak tum tak siin an haw ta thliai thliai a. ‘Kan hmangaihte hi kan lo hrechiang lo thei a, lungngaihna leh manganna hi inchhawk tawn tur chuan chengho satliah ngawt loa inngaihsak tak tak a lo tul a ni,’ tih hi an hre chiang thar hlawm khawp mai. Chu zirlai thar an zir theihna tur thawnthu erawh chu a lungchhiatthlak thung a nih hi!