A fel a, i ngawih reng a, a sual a, i ngaihsak leh vak si chuan, engtin nge a awmzel dan tur chu i hre mai lawm ni?
%%%%

A FELNA ZAWKIN LE
Ka fate hian fiamthu an thawh fuh chang te, nuihzatthlak deuha engemaw an tih fuh tum hian chhungkuain kan hlim em em a, mittui tla phung leh dul thuar na vek khawpa nuih bawk bawk tum kan nei fo. Kan han nui zo chu, an tih ngai bawk kha an ti leh a, an sawi ngai bawk kha an sawi leh a, mahse nuih a za vak tawh lo. A chang phei chuan an tinawn rei lutuk a, “A tawk tawh e,” tia nuihza tawh hauh loa khap hial an ngai fo!! An hrilhhai viau ta ve ang!
Engati nge an tihnawn leh thin? Min tihlim tih an hria a, min tihhlim leh an duh a ni. Anmahni kha ‘a changtu’ an ni ve tlat bawk a, ‘a changtu’ nih zel an duh. Mahse fiamthu ngai kha kan hlim nawnpui reng thei bik si lo.
Naupangte hian mi hlimna siam a duh ve a, nu leh pa tihlawm a tum ve a, mi pawh an tlawn thiam narawh e! Fiamthu ngai hian min tinui nawn thei reng lo tih an hre thiam ve rih lo a, an fiamthu thawh khan nu leh pa a tihlim tih erawh chu an hrethiam ve si. Chuvang chuan min tihhlim duihn an tinawn leh thin a ni. Naupang hian ngaihsak an mamawh a, ngaihsak nih nuam an ti a, ngaihsak hlawh dan tur an zawng reng thin.
Naupang an fela kan ngaihsaka kan lawm hian an fel zui fo. An fel tum pawha kan ngawih reng a, lawmthu pawh kan sawi loh hian an hrilh a hai fo a. Tha nia an hriat leh kan lawmna tur nia an rin anga an khawsaka kan ngawi tlat a, kan ngaihsakna an dawn si loh chuan an rilru a hliam thin. An fela ngawi reng khan an tihdik loh leh an sual veleha kan ngaihsak a, kan phul ta hlut chuah a nih hian buain a awm ta thin. Sual chauha ngaihsak hlawh chu an sual nawn duh fo e an ti! Nu leh pate ngaihsakna (attention) la thei apianga awmzui kha an tum ta thin a ni awm e an tih chu!
Naupangin thil a sawi a, kan ngawi reng a. Kan hna kan thulh lo. Anmahni pawh en mang loin kan ‘um e’ liam mai mai a. Thil min dil a, kan ngawi reng a, kan ngaihsak chuang lo. Naupang chu a hrilhhai ta a, a mangang a, a tap ta a! Chhuatah a tlu a, a tal a, a ke a leng a, te tuar tuarin a huaibak ta a. Chuveleh kan tho a, kan pawm a, a duh zawng kan buaipui ta chauh si thin a!
Chutiang chu a thlen nawn fo chuan naupang huaibak ching, naupang sual kan lo nei ta a. Vuak a tuar phah a, ben a tawk a, a luhlul telh telh mai tawh a. Duh zawng hmuh nana huaibak dan chi hrang hrang a thiam belh zel a. A lo tlangval meuh chuan darthlalang a hnek keh a, a lo nulat meuh chuan zan riah bo a ching tawh mai!
Kan fate hi an fel a, kan duhzawnga an awm hian lawmthu sawi ila, ngaihsak ila, an fel zui thei vek ang maw le. An fel tuma ngawi reng, an sual veleha ngaihsak leh lawi si nu leh pain ‘fa sual’ kan nei a nih pawhin a mak vak lo ang. Mi tin hian ngaihsak te, hriat nih hlawhte kan duh vek. Hriat hlawh nan leh lar nih chak avangte pawhin mi tam takin thil maksak tak tak an tih fo hi!
I fa chuan a felna leh thuawihnain i ngaihsakna leh lawmthu hlawh chhuak se la, a sualna leh nawrhna chuan engmah hlawh chhuahtir suh. Naupang huaibakin a duh a hmuh phah chuan a huaibak leh thin ang. A felnain i ngaihsakna hlawh chhuak zawk rawh se. A fel a, i ngawih reng a, a sual a, i ngaihsak leh vak si chuan, engtin nge a awmzel dan tur chu i hre mai lawm ni?