Chhan tha tak avangin dan ka bawhchhia a… &&&&&& TRAFFIC PULIT-IN MIN MAN Kum 8 lai a liam tawh. Civil Hospital OPD-a thu turin ka inkhalh chhuak a. Ka phone chu a lo ri sek a. Motor khalh laia phone khawih chu dan kalh a ni tih ka hria. Tleirawl Inkhawm Kaihhruaina ka ziah laiah pawh motor khalh laia Phone khawih avanga accident tam thute ka ziak mek bawk a, ka fimkhur viau. Phone chu a rawn ri leh thin a. Trafic jam lai chuan ka’n la zawk a, “Ka pu, ka thi dawn, min pui teh!” tiin patling zu rui aw tak mai hian min rawn bia a. “Hei, motor ka khalh a, nakin deuhah min rawn be rawh aw,” ka ti a, phone chu ka dah leh mai a. Ka inkhalh phei zel a. Tennis court velah chuan a rawn ri leh a. “A mangan hmel bawk sia,” ti rilru chung chuan trafic jam din det lai chuan ka la leh a, a thu ngai bawk! Motor chu an kal leh tan ta mai si a. Mi thi tep mangang em em chu motor khalh chung chuan ka be zui ta lawk a. Rei tak pawh kan inbe lo. Treasury lamah ka kual chho a, DC ofice thlangah chuan trafic pulit chuan min lo phar ding a. “Ka pu, motor khalh chungin phone i hmang em ni?” a lo ti a. “Aw, hmang zawk e maw le,nichin deuh khan,” ka ti a. “Kan puin a lo hmu che a niang, lo man rawh min rawn ti a,” a ti ta mai a. An inbiakhlatna te hi ka ngei reuh ngawt mai! Ka’n insawi fiah dawn deuh a, mahse an pu thu hmu a nih avangin Traffic ofis chu thlen phei a ngai ta tho a. OPD-a ka thut zawh chuan Traffic ofis ah chuan ka va in-report ta a. “Damlo mangang pakhatin ‘ka thi tep’ a rawn ti reng a, kan chhhang zawk alawm maw le..” tiin ka insawifiah ve a. Duty ho chuan min hrethiam viau a. Mahse min mantirtupa chu an hlau si a. “Lo nghak la, kan pute an lo haw trep ang..lo sawi ve la,” an ti a. Kan bul lawkah chuan traffic dan bawhchhia nih hmel ve tak, patling kum 30 bawr vel, a lua hliam tuar niawm taka bandage-a intuam, hausak hmel lem loh tak hi a thu ran bawk a. Nu berh ve tak hi a bulah a thu bawk a. An ngawi reng a. Nupa an ni ang em aw? tihte chu ka ngaihtuah mai mai a. Kan inbiakna chu an hre pha ve vek a. Min melh deuh zuk thin a. Eng dan nge an bawhchhiat ve ang aw? Doctor ka ni a, ka dan bawhchhiat chhan lah chu ‘chhan tha tak’ niin ka hria a, pulit-ho pawh chuan min hriatthiam an chak viau a. An pute chu lo haw se min hrethiam duh mial thei bawk a. Engmah chawi loin ka chhuak thei mai thei a. Mahse hepa hian hrethiamtu a nei ve ang em? tihte chu ka ngaihtuah pah a. Tu emaw thi tur nunna chhan nana motor khalh chunga phone ka hman khan dan bawhchhia ka nihna a bo dawn em ni? A chhan tha viau mahse dan bawhchhiat ngawt chu a thiang chuang dawn em ni? Mahse, dan chungah khawngaihnain ro a rel theih tho alawm! A nih chuan he pa hian khawngaihna chu a dawng ve ang em? Chupa chuan min rawn melh rulh a. “Doctor chu an ngaidam a, kei chu min ngaidam ve duh lo. Mi lian leh mi te inthliarna a nasa em!” tizui tur melha min melh ni tlatin ka hre pek a! Chu pa chu ka zah ta deuh tlat a nih chu! Duty hnenah chuan ka dan bawhchhiat hremna chu enge tih ka zawt a. Pawisa chawi a nia, a tam berah Rs 700 a nia, a hniam berah Rs 375 a nih thu min hrilh a. Chu pa hriat phak tura ring deuh leng lawng chuan, “Dan ka bawhchhe miau a, ka lo chawi ang e, in pute chu ka nghak lo mai ang,” ka ti ta a. Dan chunga khawngaihna lantir theih a ni tih hriain a hniam ber chu a chawi theih mai em tih ka zawt bawk a. Rs 375 chu ka chawi a, ka haw ta a. Khami hnu khan motor khalh chungin phone ka hmang ngai ta lo. Thununna ka tawh avang khan dan chu ka zah a, ka hlau tawh a, kha dan kher kha chu bawhchhiat ka tum tawh lo! Dan hi lal se la a tha hrim hrim. Kan tihdik loh chu kan tuar tur a ni mai. Tu emaw ka nih avanga ka him bik chuan rorelna dik a awm thei nang! Tu fapa emaw, tu hmelhriat tha emaw kan nih avanga dan laka kan him bik zel hian mihring hi kan insiam tha thei lo. Dan chunga khawngaihnain hremna nep deuh min pe phal a nih pawhin dan bawhchhiat man hremna chu tawrh ngei tur a ni ang. Dan bawhchhetu hrem loha chhuah ngawt zel hian dan a tizahawm lo a, mihring hi min khalhngil lem lo. Chhanchhuaktu nei zelho hi an insiam tha mawh khawp!