“Tun tum chhuak tur Zalen-ah ka mamawh deuh rawn ziak rawh aw,” min titu nula tan bik pawh ni chuang lo, Depression neia nun hrehawm taka hmang mekte tan aw.. %%%%%%%%% DEPRESSION HNEH DAN – I I nun a hlim lova, i chau ngawih ngawih mai a, engmah ti lova mut ngawih ngawih i duh tiraw? Natna dang avanga chauh ngawih ngawih hi chu han chawlh hahdama ziaawm theih a nih laiin depression vanga i chauhna kha chu chawlh leh mutin a chhawk meuh lo. Che tam lui zawk ang che. I peih lo a, i phur lo maw? Eng tih mah a nuam si lo tiraw? Chutih laia ‘che tam rawh’ in tih chu awm lo i ti deuh em ni? Phurna hi nghah chhuah chi a ni lo. Nuam hi amahin a lo awm ngawt thei hleinem! Nuam tihna hi tawn pawp chi a ni zawk. Che tam lui la, thawk tam la, i inche phur ang a, nuam a rawn awm chawp ang. I peih hun leh phur hun i nghah chuan i hrehawm rei lutuk dawn. Hun hi a uihawm a nia. Engmah ti lova awm mai mai hi a uihawm lutuk. A hlauhawm lutuk! Mihring awlthawng lutuk leh thatchhe lutuk nun hi ngaihtuahawm tak a ni hrim hrim. Mahse nang chu i thatchhiat hrim hrim vang a ni lo, i nun hlim loh avangin engmah i tiphur lo a nih kha. Chumi hneh nan chuan alawm ‘che tam lui rawh’ ka tih che. Depression neih lai chuan engkim hi tih luih a ngai deuh vek. Mahse chu chuan rah tha a chhuah ngei dawn si. Tihtur pawh i ngaihtuah chhuak thei mang lo tiraw? I ngaihtuah a tawi tuk a, engmah i hre rei thei bawk si lo. Ruahmanna engmah i siam thei lo tiraw? Zing a lo nih hian engmah tih chak lohna bawk khan a rawn bei leh dawn che a. Chuvang chuan zan ina i mut hma khan pen leh lehkhapuan la la, naktuka i tihtur ruahman chhin kha ziak chhuak la, chu chu zawm tum ang che. Ziak kher rawh. I ruahmanna ang i tihhlawhtlin apiang khan i tih chin kha thai nghauh nghauh nghe nghe ang che. Ziak meuha i dah chu nangmah nawr kaltu tur che a ni. Nawrtu i neih loh chuan ngui bura i zing tho, engmah ngaihtuah peih mang si lo khan tihtur hre mang lovin i thu chawhma leh thak ang a, hmai pawh phih fai peih mang lo hian a hoh nilen mai theih asin. Zan a lo ni leh ang a, vawiina i tangkai lohzia i ngaihtuah leh si ang a, mut hmunah muhil thei si loin ‘hlu lo leh tangkai ve lo’ i inti leh mai mai ang a, dam ve reng pawh a sawt ta lo riauin i hre leh mai ang. Nileng hun tangkai taka kan hman hian min tihlim thin alawm. Kan lo la tangkai ve a, kan la hlu ve a ni tih kan inhre thar thin. I chet mang si loh chuan tangkai lo i inti ang a, hlu lo riauin i inhre thuai mai ang. I la tangkai thei a, i la hlu ve a ni tih hi a taka i lantir a ngai alawm! Hna bik i neih chuan kal lui la, thawk lui rawh. I hna bik neih chu nangmah tichautu che a nih zawka chawlh i la hrih duh zawk anih pawhin awm mai mai turin chawlh la suh. Tih tur dang i hriat mai loh chuan hmun phiat la, chhuat nawt la, darthlalangte nawtfai la, lehkhabute kha rem tha mai rawh. Engemaw thil tangkai ti hrim hrim rawh. I hlim nghal hurh beisei lem lo la, tilui zel rawh. Mi fakna beisei vangin thawk hek suh. Nangma tan thawh harh kha a tangkai tih hriain thawk mai la. Nangma tana i thawh laia mi fakna i dawng ta a nih leh a ‘bonus’ a ni mai. “E khai, ka lo la tangkai thei alawm, ka lo la hlu hle alawm le, thi hman ka nih loh hi,” tih hi i hmu chhuak ngei ngei ang maw le!